ދުބާއީގެ މަޝްހޫރު ވޯލްޑޯފް އެސްޓޯރިއާ ދުބާއީ ޕާމް ޖުމެއިރާގެ ޑައިރެކްޓަ އޮފް ހިއުމަން ރިސޯސަސްގެ މަގާމަށް ދިވެހި ފަތުރުވެރިކަމުގެ ދާއިރާގެ ތަޖުރިބާކާރު ޝާމިން އަލީ އައްޔަންކޮށްފި އެވެ.
ދިވެހި ހޮސްޕިޓިލިޓީ ދާއިރާގެ ހަބަރުތަކަށް ހާއްސަ ނޫސް، ހޮޓަލިޔާ މޯލްޑިވްސްއިން ރިޕޯޓުކޮށްފައިވާ ގޮތުގައި މި މަގާމާ ޝާމިން ރަސްމީކޮށް ހަވާލުވެވަޑައިގަތީ ނިމިގެންދިޔަ އޮގަސްޓް މަހުގެ ތިންވަނަ ދުވަހު އެވެ.
ޝާމިން އަކީ ގަލްފުގެ ގައުމުތަކާއި ދިވެހިރާއްޖޭގެ ފަތުރުވެރިކަމުގެ ދާއިރާގައި އިންސާނީ ވަސީލަތްތައް ތަރައްގީކުރުމުގެ ރޮނގުން ފަންސަވީސް އަހަރަށްވުރެ ގިނަ ދުވަހުގެ ތަޖުރިބާ ލިބިވަޑައިގެންފައިވާ ބޭފުޅެއްގައި ކަމަށް ހޮޓަލިޔާ މޯލްޑިވްސްއިން ބުނެފައިވެ އެވެ.
ހިލްޓަން ގްރޫޕުގެ މި ލަގްޒަރީ ބްރޭންޑާ އަލުން ގުޅިވަޑައިގަތުމަށްފަހު، ޝާމިން އިސްކަންދެއްވާނީ އެ ރިސޯޓުގެ މުވައްޒަފުންގެ ކުރިއެރުމަށް ކަނޑައަޅާފައިވާ ސިޔާސަތުތައް ތަންފީޒުކުރުމަށާއި، ހުނަރުވެރި މުވައްޒަފުން ހޯދުމަށާއި، ލީޑަރޝިޕް ތަމްރީނުތައް ހިންގުމުގެ އިތުރުން މުއައްސަސާގެ ހިންގުން ހަރުދަނާކުރުމުގެ މަސައްކަތްތަކަށެވެ.
ތައުލީމީ ދާއިރާއަށް ބަލާއިރު، ޝާމިން ވަނީ ސުވިޒަލޭންޑުގެ ލޫޒާންގައި ހުންނަ އައިއެމްއައި ޔުނިވަރސިޓީން އިންޓަރނޭޝަނަލް ހޮޓެލް އެންޑް ޓޫރިޒަމް މެނޭޖްމަންޓުގެ ދާއިރާއިން ބެޗްލަރސް ޑިގްރީ ހާސިލްކުރައްވާފައެވެ. މީގެ އިތުރުން ލަންޑަން ސްކޫލް އޮފް ކޮމާސްއިން އޭނާ ވަނީ މާސްޓަރ އޮފް ބިޒްނަސް އެޑްމިނިސްޓްރޭޝަން ނުވަތަ އެމްބީއޭ ފުރިހަމަކުރައްވާފައެވެ.
ޝާމިންގެ މަސައްކަތުގެ ހަޔާތުގައި އޭނާ ވަނީ ބޮޑެތި މަޝްރޫއުތަކަށް މުވައްޒަފުން ނެގުމާއި، އާ ރިސޯޓުތައް ހުޅުވުމުގެ ކުރިން ކުރަންޖެހޭ ތައްޔާރީތަކާއި، ހިންގުން ހަރުދަނާކުރުމުގައި ފާހަގަކޮށްލެވޭ ކާމިޔާބީތަކެއް ހޯއްދަވާފައެވެ. މި މަގާމާ ހަވާލުވުމުގެ ކުރިން އޭނާ ހުންނެވީ ސައުދީ އަރަބިއްޔާގެ ރެޑް ސީ މަޝްރޫއުގެ ދަށުން ހިންގާ އެސްއެލްއެސްގެ ޕްރޮޖެކްޓް ޓާސްކްފޯސްގެ ޑައިރެކްޓަރ އޮފް ޕީޕަލް އެންޑް ކަލްޗަރގެ މަގާމުގައެވެ. އޭގެ ކުރިން އޭނާ ވަނީ ގަތަރުގެ ރިކްސޯސް ގަތައިފާން މަޝްރޫއުގެ ޑައިރެކްޓަރ އޮފް ޓެލެންޓް އެންޑް ކަލްޗަރގެ ގޮތުގައި އެ ގައުމުގެ އެންމެ ބޮޑު ވޯޓަރޕާކާއި، ބީޗް ކްލަބް އަދި ލަގްޒަރީ ހޮޓާ ހިމެނޭ ސަރަހައްދުގެ އިންސާނީ ވަސީލަތްތައް ބަލަހައްޓަވާފައެވެ.
މިއީ ޝާމިން ހިލްޓަން ގްރޫޕާ ގުޅިވަޑައިގަންނަވާ ދެވަނަ ފަހަރެވެ. މީގެ ކުރިން އޭނާ ވަނީ ގަތަރާއި ދިވެހިރާއްޖޭގައި ހުންނަ ހިލްޓަންގެ ރިސޯޓުތަކުގައި މުވައްޒަފުންގެ ކުރިއެރުމަށް ގިނަގުނަ މަސައްކަތްތަކެއް ކުރައްވައި، އެ ކުންފުނީގެ އިތުބާރު ހޯއްދަވާފައެވެ.
ވޯލްޑޯފް އެސްޓޯރިއާ ދުބާއީ ޕާމް ޖުމެއިރާގައި ޝާމިންގެ މައިގަނޑު ޒިންމާއަކަށް ވާނީ އެ ރިސޯޓުގެ އިންސާނީ ވަސީލަތްތަކާ ބެހޭ އެންމެހާ ކަންކަން ބެލެހެއްޓުމާއި، މުވައްޒަފުންގެ މެދުގައި އޮންނަ ގުޅުން ބަދަހިކުރުމެވެ. އަދި އެ ބްރޭންޑުގެ މަތީ ފެންވަރުގެ ހިދުމަތްތަކާ އެއްގޮތްވާ ގޮތުގެ މަތިން ހުނަރުވެރި މުވައްޒަފުން ބިނާކުރުމަކީވެސް އޭނާގެ މަގާމުގެ މުހިންމު ބައެކެވެ. ދުނިޔޭގެ ފެންވަރުގެ މިފަދަ ބޮޑު މަގާމަކަށް ދިވެއްސަކު އައްޔަންވުމަކީ ބައިނަލްއަގުވާމީ ފަތުރުވެރިކަމުގެ ދާއިރާގައި ދިވެހިންގެ ހުނަރާއި ގާބިލުކަން ބަލައިގަންނަކަމުގެ ހެއްކެކެވެ.
