ރައީސް އޮފީހާއި ރައީސް މުހައްމަދު މުއިއްޒުގެ ނޫސްވެރިންގެ ބައްދަލުވުންތަކަށް "އަދަދު" ނޫހަށް ފުރުސަތު ނުދެނީ، އެ ނޫހުގައި ހުރި މައުލޫމާތުތަކުގެ ސަބަބުން މުއިއްޒު އިތުރަށް ފަޟީހަތްވެވަޑައިގެންފާނެތީ ގަންނަ ބިރެއްގެ ބޮޑުކަމުން ކަމަށް ކުރީގެ ރައީސް އަބްދުއްﷲ ޔާމީން އަބްދުއްގައްޔޫމް ވިދާޅުވެއްޖެ އެވެ.
ރައީސް އޮފީހުން އަދަދު ނޫހާ ދެކޮޅަށް ފިޔަވަޅު އަޅާފައިވަނީ މެއި 11 ގައި މުއިއްޒު ބައިވެރިވެވަޑައިގެންނެވި ޕްރެސްއެއްގައި އަދަދުގެ ނޫސްވެރިޔާ މުހައްމަދު ޝަހުޒާން ކުރި ސުވާލަކާ ގުޅިގެންނެވެ. އެ ސުވާލާއެކު، އެ ނޫހުން ނެރުނު "އައިޝާ" ޑޮކިއުމެންޓްރީގެ މައްސަލައިގައި ކްރިމިނަލް ކޯޓުން ނެރެފައިވާ އަނގަބަންދުކުރުމުގެ އަމުރާ (ގެގް އޯޑާ) ހިލާފުވީ ކަމަށް ބުނެ، މުއިއްޒު ވަނީ ޝަހުޒާން ބައްދަލުވުމުން ބޭރުކޮށްފަ އެވެ.
އޭގެ ފަހުން، ރައީސް އޮފީހުގެ މީޑިއާ ވަޓްސްއެޕް ގްރޫޕުގައި ހިއްސާކުރި މެސެޖަކުން އަދަދު ނޫހަށް ނުވަދެވޭނެކަން އަންގައި، ފަހުން އުފެއްދި އާ ގްރޫޕުގައިވެސް މި ނޫހުގެ ނޫސްވެރިން ބައިވެރިއެއް ނުކުރެ އެވެ.
ނަމަވެސް ރައީސް އޮފީހުން އެޅި މި ފިޔަވަޅު ލިޔުން ހޯދަން ތަކުރާރުކޮށް އެދުމުންވެސް ޖަވާބުދޭން އިންކާރުކުރުމަށް ފަހު، ހޮނިހިރު ދުވަހު ސަރުކާރުގެ ތަރުޖަމާނު މުހައްމަދު ހުސައިން ޝަރީފު ވިދާޅުވީ އަދަދު ނޫހަށް ލިޔުމުން ޖަވާބުދޭން ނުޖެހޭ ކަމަށެވެ.
އާދީއްތަ ދުވަހުގެ ރޭ ބޭއްވި ޕީޕަލްސް ނޭޝަނަލް ފްރަންޓް (ޕީއެންއެފް) ޖަލްސާގައި ޔާމީން ވަނީ މި މައްސަލައިގައި ވާހަކަ ދައްކަވާފަ އެވެ. އެމަނިކުފާނު ވިދާޅުވީ ރައީސް އޮފީހުން އަދަދު ނޫހަށް ޖަވާބުދޭންޖެހޭނެ ކަމަށެވެ.
"އަދަދު ނޫސް ކީއްވެގެންތޯ މުއިއްޒުގެ އިންޓަވިއުތަކަށް، ރައީސް އޮފީހުގެ އިންޓަވިއުތަކުގައި ބައިވެރި ނުކުރަނީ. މުންދު [މުހައްމަދު ހުސައިން ޝަރީފު] އެބައޮތް ޖަވާބުދީފައި ތިއީ [އަދަދު ނޫހަށް] ޖަވާބުދޭންޖެހޭ ކަމެއް ނޫނޭ. ނޫން، ޖަވާބުދޭންޖެހޭ ކަމެއް،" ޔާމީން ވިދާޅުވި އެވެ.
އަދަދު ނޫހަށް ލިޔުމުން ޖަވާބު ދޭން ނުޖެހޭނެ ކަމަށް ވިދާޅުވެ ތަރުޖަމާނު ގާނޫނުއަސާސީއަށް ގޮންޖައްސަވައިފި
ތަރުޖަމާނު މިހެން ވިދާޅުވި ނަމަވެސް، އިދާރީ ފިޔަވަޅެއްގެ ސަބަބުން ހައްގަކަށް އުނިކަން ލިބޭނަމަ އެކަމުގެ ސަބަބު ލިޔުމުން ލިބުމަކީ ގާނޫނުއަސާސީން ކަށަވަރުކޮށްދޭ ހައްގެކެވެ. މި ފިޔަވަޅު އަޅާފައިވަނީ ނޫސްވެރިންގެ މައްޗަށް ހިނގާ ޖިނާއީ ތަހުގީގުތަކަކާ ގުޅިގެން ކަމަށްވެސް ތަރުޖަމާނު ފާހަގަކުރެއްވިއެވެ.
އަދަދު ނޫހަށް ފުރުސަތު ނުދޭން ރައީސް އޮފީހުން މަސައްކަތްކުރަނީ އެ ނޫހުގެ ނޫސްވެރިޔާ ޝަހުޒާންގެ އަތުގައި މުއިއްޒުގެ ފޯނު ކޯލް ލޮގުތަކާއި ޗެޓްލޮގްތައް ހުރުމުން އެކަމުގެ ބިރަށް ކަމަށްވެސް ޔާމީން ވިދާޅުވިއެވެ.
"ހަގީގަތުގައި މިވެގެން އުޅޭގޮތަކީ އަދަދު ނޫހުގެ ޝަހުޒާން އަތުގައި އޮތް ދެއްތޯ މުއިއްޒުގެ ޗެޓްލޮގު، ފޯނުކޮށްފައި ހުރި ލޮގު އެބައޮތް ދެއްތޯ. އެހެންވީމަ މުއިއްޒު ހިތަށް މިއަރަނީ މާތް ކަލާކޯއޭ ދެން މިމީހުންގެ އަތުގައި އޮންނާނީ ތިމަންނަ ކާކަށް ގުޅި ޗެޓްލޮގެއްބާއޭ... މީހާ ގަންނާކުރައްވާ ބިރުން އަދަދު ނޫހަށް އިތުރު ފުރުސަތެއް ނުދީ އުޅެނީ،" އެމަނިކުފާނު ވިދާޅުވިއެވެ.
އަދަދު ނޫހުން އުފެއްދި އައިޝާ ޑޮކިއުމެންޓަރީއަށް ފަހު، އެ ތުހުމަތުތަކަށް އިޝާރާތްކޮށް މީހުން ކިޔައިއުޅެނީ 'އެލްސޯފާ'ގެ މައްސަލައެވެ. އެހެންވެ، ޔާމީންވެސް ވިދާޅުވީ 'އެލްސޯފާ' މައްސަލައާ ގުޅިގެން ރައީސުލްޖުމްހޫރިއްޔާގެ މަގާމާއި ރައީސް އޮފީހުގެ ކަރާމާތް ހިފެހެއްޓުމުގެ ގޮތުން މުއިއްޒު މަގާމުން އިސްތިއުފާދެއްވަންޖެހޭ ކަމަށެވެ.
"ރައީސުލްޖުމްހޫރިއްޔާގެ މަގާމާއި، ރައީސް އޮފީހުގެ ކަރާމާތް ހިފަހައްޓާ ކަމަށްވަންޏާ، ކިރިޔާވެސް ދިވެހިރާއްޖޭގައި ގައުމިއްޔަތަށް ކުލުނެއް އޮތިއްޔާ، ވަތަނަށް ކުލުނެއް އޮތިއްޔާ މުއިއްޒު މިހާރު އަމިއްލައަށް އިސްތިއުފާދީފައި ދުރުގައޭ ހުންނަންވާނީ. ހާދަ ހަޑިހުތުރު ބޮޑު ބަދުނާމެކޭ އެޅިގެން މިއުޅެނީ،" ޔާމީން ފާހަގަކުރެއްވި އެވެ.
އެލްސޯފާގެ މައްސަލައަކީ ހިނގާފައިވާ ކަމެއް ކަމަށް ރައްޔިތުންގެ ދަރުބާރުގައި މީހުން ގަބޫލުކުރާ ކަމަށާއި، އެކަމަށް އިތުރު ތަހުގީގެއް ބޭނުންނުވާ ކަމަށް ވެސް ޔާމީން ވިދާޅުވި އެވެ.
އެ ޑޮކިއުމެންޓްރީގެ މައްސަލައިގައި އެ ވާހަކަދެއްކުން މަނާކޮށް ކްރިމިނަލް ކޯޓުން ނެރުނު "ގެގް އޯޑަރާ" އަދަދު ނޫހުގެ ޝަހުޒާން އާއި ލީވާން އަލީ ނަސީރު ހިލާފުވި ކަމަށް ކަނޑައެޅީ، އެކަށީގެންވާ ތަހުގީގެއް ނުކޮށް އަދި ޝަރީއަތުގައި ޖަވާބުދާރީވާން ފުރުސަތު ނުދީ އެވެ. އެ މައްސަލައިގައި ކޯޓުން ވަނީ އެ ދެ ނޫސްވެރިން ޖޫރިމަނާކުރުމުގެ އިތުރުން، ޝަހުޒާން 15 ދުވަހަށް މާފުށީ ޖަލަށްލުމަށް ހުކުމްކުރިއިރު، ލީވާނަށް ކުރީ 10 ދުވަހުގެ ޖަލު ހުކުމެއް އިއްވި އެވެ..
މީގެ އިތުރުން އައިޝާ ޑޮކިއުމެންޓަރީގެ މައްސަލައިގައި އަދަދު ނޫހުގެ ސީއީއޯ ހުސައިން ފިޔާޒު މޫސާ އާއި އެޑިޓަރު ހަސަން މުހައްމަދުގެ މައްޗަށް ގަޒުފުކުރި ކަމުގެ ދައުވާ އުފުލައި، ކްރިމިނަލް ކޯޓުގައި ވަނީ ޝަރީއަތްތައް ފަށައިފައެވެ. މި މައްސަލަތައް އިސްތިއުނާފުކުރަން ހުށަހަޅާފައިވާއިރު، އޭގެ އެއްވެސް މައްސަލައެއް ކުރިއަކަށް ނުގެންދެ އެވެ.
