ލަންޑަން (ސެޕްޓެމްބަރު 4) - މި ވަގުތު އެއްވެސް ޓީމަކާ ނުގުޅި ހުރި ނެދަލެންޑްސްގެ މިޑްފީލްްޑަރު، ޖިއޮޖީނިއޯ ވައިނަލްޑަމް އަށް ޗެލްސީން ކުރު ކޮންޓްރެކްޓެއް ދިނުމާ މެދު ވިސްނަމުން އަންނަ ކަމަށް މީޑިއާ ރިޕޯޓްތައް ބުނެފި އެވެ.
ޓްރާންސްފާ މާކެޓްގެ ފަހު ދުވަހު، ޗެލްސީން ވަނީ ބޮުޑު އަގުގައި އެންޒޯ ފެނާންޑޭޒް، މެންޗެސްޓާ ސިޓީ އަށް ވިއްކާލައިފަ އެވެ. އެ މަގާމަށް ޗެލްސީން ގެންނަން މަސައްކަތްކުރީ، ރޯމާގެ މަނޫ ކޯނޭ ނޫނީ މޮނާކޯގެ ލަމީން ކަމަރާ އެވެ. މީގެ ތެރެއިން، ކަމަރާ ގަންނަން 55 މިލިއަން ޑޮލަރުގެ ފީއެއް މޮނާކޯއާ އެކު އެއްބަސްވި ނަަމަވެސް ފަހު ވަގުތު އެ ޑީލް ވީ ކެންސަލް އެވެ.
ޗެލްސީ އަށް އެންޒޯ ދިޔަތަނަށް މިޑްފީލްޑަރެއް ހޯދުން މަޖުބޫރުވެފައިވާއިރު، ގަވާއިދުގެ ތެރެެއިން މި ވަގުތު އެ ޓީމަށް ގެނެވެން އޮތީ ކްލަބަކާ ނުގުޅި ހުރި ކުޅުންތެރިއެކެވެ. އެ ގޮތުން، މިދިޔަ ޖޫން މަހު، ސައުދީ ޕްރޯ ލީގުގެ ކްލަބް، އަލް އިއްތިފާގް ދޫކޮށްލައި، އެއްވެސް ޓީމަކާ ނުގުޅި ހުރި ވައިނަލްޑަމްއާ ޗެލްސީން ވާހަކަ ދައްކަމުން އަންނަ ކަމަށް ރިޕޯޓްތައް ބުނެ އެވެ.
ކުރިން ނިއުކާސަލް ޔުނައިޓެޑާއި ލިވަޕޫލަށް ކުޅުނު ވައިނަލްޑަމް ވަރަށް އަވަހަށް ޗެލްސީގެ ޓީމާ އެކު، ޓްރެއިނިންތަކުގައި ބައިވެރިވާނެ ކަމަށް ނެދަލެންޑްސްގެ މީޑިއާތަކުން އަންނަނީ ރިޕޯޓްކުރަމުންނެވެ. އަަދި، ޓްރެއިނިންގައި އޭނާގެ ފިޓްނަސް ރަނގަޅުނަމަ، ޗެލްސީގެ ކޯޗު، ޒަބީ އަލޮންސޯގެ ލަފާގެ މަތިން އޭނާ އަށް ހަ މަސް. ނޫނީ އެއް އަހަރުގެ ކޮންޓްރެކްޓެއް ދިނުމުގެ ފުރުސަތު އެބައޮތެވެ.
ފެޔަނޫޑުން ސީނިއާ ފުޓްބޯޅަ ކެރިއަރު ފެށި ވައިނަލްޑަމް ވަނީ ނެދަލެންޑްސްގެ ޕީއެސްވީ އަައިންދޯވަން އަށް ވެސް ކުޅެފަ އެވެ. އިނގިރޭސި ޕްރިމިއާ ލީގުގައި އެންމެ ފުރަތަމަ ވައިނަލްޑަމް ފެނުނީ ނިއުކާސަލް އިންނެވެ. ލިވަޕޫލަށް 2016 ވަނަ އަހަރު ބަދަލުވެ، ފަސް އަހަރު އެ ޓީމަށް ކުޅުމަށް ފަހު، 2021 ވަނަ އަހަރު އެ ޓީމު ދޫކޮށް ބަދަލުވީ ޕީއެސްޖީއާ އެވެ. އެ ޓީމުގައި ދެ އަހަރު ހޭދަކުރިއިރު، އެއް ސީޒަނުގައި ލޯނަކަށް އިޓަލީގެ ރޯމާ އަށް ކުޅުނެވެ.
އަލް އިއްތިފާގަށް 2023 ވަނަ އަހަރު ބަދަލުވުމަށް ފަހު، މިދިޔަ ޖޫން މަހާ ހަމައަށް އެ ޓީމަށް ކުޅެފައިވެ އެވެ.
