ރޯމް (އޮގަސްޓް 6) - ޕީއެސްޖީ އަށް ކުޅެމުންދިޔަ ނެދަލޭންޑްސްގެ މިޑްފީލްޑަރު ޖޯޖީނިއޯ ވައިނަލްޑަމް ލޯނު އެއްބަސްވުމުގެ ދަށުން އޭއެސް ރޯމާ އަށް ބަދަލުވެއްޖެ އެވެ.
ލިވަޕޫލްގައި ފަސް އަހަރު ހޭދަކުރުމަށް ފަހު ވައިނަލްޑަމް ،31، ޕީއެސްޖީ އަށް ބަދަލުވީ މިދިޔަ ސީޒަންގަ އެވެ. އެކަމަކު، ލިވަޕޫލްގައި ދެއްކި ފޯމެއް، ޕީއެސްޖީގައި ވައިނަލްޑަމްގެ ފަރާތުން ނުފެނުނެވެ. ފްރެންޗް ލީގުގެ ސަޕޯޓަރުންގެ ޕޯލް އަކުން ނެގި އެންމެ ދަށް ކުޅުންތެރިންގެ ތެރޭގައި ވައިނަލްޑަމް ހިމެނުނެވެ.
މިދިޔަ ސީޒަންގެ ފްރާންސް ލީގުގައި ޕީއެސްޖީގެ ފުރަތަމަ 11 އިން ވައިނަލްޑަމް އަށް ޖާގަ ލިބުނީ 18 ފަހަރެވެ. އަދި ޗެމްޕިއަންސް ލީގުގައި ފުރަތަމަ 11 އަށް އެރީ ތިން މެޗުގަ އެވެ.
ވައިނަލްޑަމް ރޯމާގެ ހެޑްކުއާޓަރުގައި އެ ކްލަބްގެ ޖޯޒީ ހިފައިގެން.--- ފޮޓޯ: ގެޓީއިމޭޖަސް
"ވަރަށް އުފާވެއްޖެ ރޯމާ އަށް އާދެވުނީމަ. އަހަރެން މި ޓީމަށް 100 ޕަސެންޓް ދޭނަން. އަދި ޓީމުގެ ޓާގެޓްތައް ހާސިލްކުރުމަށް އަހަންނަށް ކުރެވެން އޮތް ހުރިހާ މަސައްކަތެއް ކުރާނަން،" ވައިނަލްޑަމް ބުންޏެވެ.
ހޯސޭ މޮރީނިއޯގެ އިރުޝާދުގެ ދަށުން އާ ސީޒަނަށް ތައްޔާރުވަމުންދާ ރޯމާ އިން ދަނީ ސްކޮޑް ވަރުގަދަކުރުމަށް ގިނަ މަސައްކަތްތަކެއް ކުރަމުންނެވެ.
މެންޗެސްޓާ ޔުނައިޓަޑްގައި ހުރި ސާބިއާގެ މިޑްފީލްޑަރު ނެމަންޖާ ވިޑިޗާއި ޔުވެންޓަސް އަށް ކުޅެމުންދިޔަ އާޖެންޓީނާގެ މިޑްފީލްޑަރު ޕައުލޯ ޑިބާލާ ވެސް ވަނީ ރޯމާ އަށް ބަދަލުވެފަ އެވެ.
މީގެ އިތުރުން، ޓޯރީނޯ އަށް ކުޅެމުންދިޔަ އިޓަލީގެ ފޯވަޑް އަންދްރެއާ ބެލޮޓީ ގެންދަން ވެސް އެ ކްލަބުން މަސައްކަތް ކުރަމުންދާ ކަމަށް ރިޕޯޓްތަކުން ބުނެ އެވެ.
ރޯމާގައި ހޭދަކުރި ފުރަތަަަމަ ސީޒަނުގައި މޮރީނިއޯ ވަނީ އެ ޓީމަށް ޔުއެފާ ކޮންފަރެންސް ލީގުގެ ޗެމްޕިއަންކަން ހޯދައިދީފަ އެވެ. މިދިޔަ ސީޒަނުގައި އިޓާލިއަން ލީގުގެ ގަދަ ހަތަރަކުން ފުރުސަތު ނުލިބުމުން މޮރީނިއޯ ވަނީ މި ފަހަރު އެންމެ ފުރަތަމަ ޓާގެޓަކީ ގަދަ ހަތަރެއް ކަމަށް ކަނޑައަޅައިފަ އެވެ.
