ރިއޯ ޑި ޖަނެއިރޯ، ބްރެޒިލް (ސެޕްޓެމްބަރު 2) - އިނގިރޭސި ޕްރިމިއާ ލީގުގެ ގިނަ ކްލަބްތަކަކުން މިދިޔަ އަހަރުތަކުގައި ފެނުނު ވިންގް، ޖޭޑަން ސަންޗޯ، ބްރެޒިލް ލީގުގެ ޕަލްމެއިރާސް އަށް ބަދަލުވާން ނިންމާފައިވާ ކަމަށް މީޑިއާ ރިޕޯޓްތައް ބުނެފި އެވެ.
އުމުރުން 26 އަހަރުގެ ސަންޗޯ، މެންޗެސްޓާ ޔުނައިޓެޑާ އެކު، ހަދާފައިވާ އެއްބަސްވުން ޖުލައި 1 ވަނަ ދުވަހަށް ހަމަވުމުން، މި ވަގުތު އޭނާ ހުރީ އެއްވެސް ކްލަބެއްގެ ކޮންޓްރެކްޓެއްގައެއް ނޫނެވެ. ބޮޑު އަގުގައި ޑޯޓްމަންޑުން މެންޗެސްޓާ ޔުނައިޓެޑަށް ސަންޗޯ ބަދަލުވީ 2021 ވަނަ އަހަރުގަ އެވެ. އޭރު ޔުނައިޓެޑުން ސަންޗޯ ގަތީ ޖުމްލަ އެެކު، 103 މިލިއަން ޑޮލަރު ދައްކައިފަ އެވެ. އެކަމަކު، އެ ޓީމުގައި އެންމެ ރަނގަޅު ކުޅުމެއް ނުދެއްކި ފަސް އަހަރު ތެރޭ ލޯން އެއްބަސްވުމެއްގައި ތަފާތު ތިން ކްލަބަކަށް ވަނީ ކުޅެފަ އެވެ. އެއީ، ކުރީގެ ކްލަބް، ޑޯޓްމަންޑްގެ އިތުރުން، ޗެލްސީ އާއި އެސްޓަން ވިލާގަ އެވެ.
ލޯން އެއްބަސްވުމެއްގެ ދަށުން ކުުޅުނުއިރު، ޑޯޓްމަންޑާ އެކު، ޗެމްޕިއަންސް ލީގުގެ ފައިނަލުގައި ކުޅުނުއިރު، ޗެލްސީއާ އެކު ކޮންފަރެންސް ލީގުގެ ތަށި ހޯދި އެވެ. އަދި، މިދިޔަ ސީޒަނުގައި އެސްޓަން ވިލާއާ އެކު، ޔޫރޮޕާ ލީގުގެ ޗެމްޕިއަންކަން ހޯދި އެވެ. ޔުނައިޓެޑާ އެކު، އެފްއޭ ކަޕާއި ލީގު ކަޕްގެ ޗެމްޕިއަންކަން ހޯދި ސަންޗޯ އަލުން ގެންދަން ޑޯޓްމަންޑުން ޝައުގުވެރިކަން ފާޅުކުރި ނަމަވެސް، މުސާރަައިގެ ކަންތައްތަކާ ހެދި އެ ޑީލް ކުރިއަށްނުދިޔަ އެވެ.
ޕަލްމެއިރާސް އިން ސަންޗޯ ގަންނަނީ ދެ އަހަރުގެ ޑީލެއްގައި ކަމަށް ރިޕޯޓްތައް ބުނެ އެވެ. އަދި، ޕަލްމެއިރާސްއާ އެކު ސޮއިކުރާ އެ އެއްބަސްވުމުގައި ހިމަނާ ބައެއް މާއްދާތައް ފުރިހަމަވެއްޖެނަމަ، އިތުރު އެއް އަހަރަށް ކޮންޓްރެކްޓް އާ ކުރެވޭ ގޮތަށް ވެސް ވަނީ ހިމަނައިފަ އެވެ.
މި ފަހަރުގެ ޓްރާންސްފާގައި ސަންޗޯގެ ސޮއި ހޯދަން އެތުލެޓިކޯ މެޑްރިޑުން ވެސް މަސައްކަތްކުރި އެެވެ. އެކަމަކު، ފަހުން އެ ކްލަބުން ނިންމީ ޕީއެސްޖީ އަށް ކުޅޭ ދެކުނު ކޮރެއާގެ ލީ ކަންގް އިން ގަންނާށެވެ. މިހާރު އެ ޓީމުން ވަނީ އެ ޑީލް ނިންމައިފަ އެވެ.
ގަތަރުގެ އަލް ރައްޔާނުން ވަނީ ސަންޗޯ އަށް ރަނގަޅު މުސާރައެއް ލިބޭ ގޮތަށް ބޮޑު ކޮންޓްރެކްޓެއް ދޭން ނިންމައިފަ އެވެ. އެކަމަކު، ސަންޗޯ އެ ޑީލަކަށް ނޫނެކޭ ބުނެ، މިހާރު މި ވަނީ ބްރެޒިލް ލީގަށް ދާން ނިންމައިފަ އެވެ. ސަންޗޯ އަށް އިޓަލީގެ ބައެއް ޓީމުތަކުގެ އޮފާތަކެއް ވެސް ލިބިފައިވެ އެވެ.
