ޗައިނާގެ ބައެއް ސިނަމާތަކުގައި މިހާރު އެންމެ ބޮޑު ސަމާލުކަމެއް ލިބެމުންދަނީ، އާދައިގެ 3ޑީ އެނިމޭޝަން ބޭނުންކޮށްގެން އުފައްދާފައިވާ، ބަލާލަން "ހުތުރު" އެނިމޭޓެޑް ފިލްމަކަށެވެ.
"ނިއު ލައި" ނަމަކަށް ކިޔާ މި ފިލްމަކީ ގެރިއެއްގެ ހުވަފެންތަކެއް ދައްކުވައިދޭ ފިލްމެކެވެ. މި ފިލްމަށް ބޮޑު މަގުބޫލުކަމެއް ލިބި، ބޮކްސް އޮފީހުގައި އާދަޔާ ހިލާފު ކުރިއެރުމެއް ލިބެން ފެށީ އިންޓަނެޓުގައި މި ފިލްމަށް އަމާޒުވި ވަރުގަދަ ފާޑުކިޔުންތަކާ ގުޅިގެންނެވެ.
މިދިޔަ އޮގަސްޓް މަހުގެ 5 ވަނަ ދުވަހު މި ފިލްމު ރިލީޒްކުރި ފުރަތަމަ 10 ދުވަހުގެ ތެރޭގައި ބޮކްސް އޮފީހުން ލިބިފައިވަނީ އެންމެ 10،000 ޔުއާން (1،480 ޑޮލަރު) އެވެ. ފިލްމުތަކުގެ ތަފާސްހިސާބުތައް ބަލަހައްޓާ "މާއޯޔަން" ޕްލެޓްފޯމުން ބުނާ ގޮތުގައި، ބައެއް ދުވަސްދުވަހު މި ފިލްމަށް ލިބިފައިވަނީ އެންމެ 200 ޔުއާން (30 ޑޮލަރު) އެވެ. މިއީ ވާދަވެރި ހޫނު މޫސުމުގެ ފިލްމީ ސީޒަނަކަށް ބަލާއިރު އާދަޔާ ހިލާފަށް ދަށް އަދަދެކެވެ.
ނަމަވެސް، "މާއޯޔަން" ގެ ހިސާބުތަކުން ދައްކާ ގޮތުގައި މިދިޔަ ހޯމަ ދުވަހު މި ފިލްމުގެ އާމްދަނީ ވަނީ 8.2 މިލިއަން ޔުއާން (1.2 މިލިއަން ޑޮލަރު) އަށް އަރާފަ އެވެ. އަދި އެ ދުވަހު އެކަނިވެސް 300،000 އެއްހާ މީހުން ވަނީ މި ފިލްމު ބަލާފަ އެވެ. މިހާތަނަށް މި ފިލްމަށް ޖުމްލަ 17.1 މިލިއަން ޔުއާން (2.5 މިލިއަން ޑޮލަރު) ގެ އާމްދަނީއެއް ވަނީ ލިބިފަ އެވެ.
ޗެންގްދޫގެ ލޯކަލް ނިއުސް ވެބްސައިޓެއް ކަމަށްވާ "ރެޑް ސްޓާ ނިއުސް" އިން ރިޕޯޓްކޮށްފައިވާ ގޮތުގައި، ފަސް އަހަރު ދުވަހުގެ މަސައްކަތުން މި ފިލްމު އުފެއްދީ އެންމެ ދެ މީހުންނެވެ. އެއީ ޑައިރެކްޓަރު ޝިން ޔޫމެންގް އާއި އޭނާގެ މަންމަ ސުން ލިފާން އެވެ.
ޗައިނާގެ މަގުބޫލު ފިލްމު ރިވިއު ޕްލެޓްފޯމެއް ކަމަށްވާ "ޑޫބަން" ގައި ގިނަ ބަޔަކު ދަނީ މި ފިލްމަށް މަލާމާތްކޮށް، ހައިރާންކަން ފާޅުކުރަމުންނެވެ.
