ދެކުނު އޭޝިއާގެ ގައުމުތަކުގެ މެދުގައި ބޭއްވޭ އެންމެ ބޮޑު ކުޅިވަރު ހަރަކާތް، ސައުތު އޭޝިއަން ގޭމްސް އަކީ ރާއްޖޭގެ ކުޅިވަރަށް މުހިންމުކަން ބޮޑު ގޭމްސް އެއް ކަމަށް މޯލްޑިވްސް އޮލިމްޕިކް ކޮމިޓީ (އެމްއޯސީ) އިން ބުނެފި އެވެ.
މޯލްޑިވްސް އޮލިމްޕިކް ކޮމިޓީ (އެމްއޯސީ) އިން މިހެން ބުނެފައިވަނީ، ތަކުރާރުކޮށް އެކި ފަހަރު މަތިން ފަސްކުރަން ޖެހިފައިވާ، ސައުތު އޭޝިއަން ގޭމްސް އަންނަ އަހަރުގެ ކުރިއަށްގެންދަން ޕާކިސްތާން އޮލިމްޕިކް އެސޯސިއޭޝަނުން ނިންމައި، ސައުތު އޭޝިއަން އޮލިމްޕިކް ކައުންސިލް (އެސްއޭއޯސީ)ގެ އެންމެ ފަހު ބައްދަލުވުމުގައި އިއުލާނުކުރިކަން ހާމަކުރަން ނެރުނު ނޫސްބަޔާނުގަ އެވެ.
ސައުތު އޭޝިއަން ގޭމްސް ތާވަލުކޮށްފައި އޮތީ، އޭޕްރީލް 3-11 އަށް ޕާކިސްތާންގެ އިސްލާމްއާބާދު، ލާހޯރު އަދި ޕެޝާވަރުގަ އެވެ.
ސައުތު އޭޝިއަން ގޭމްސް އަންނަ އަހަރުގެ އޭޕްރީލް މަހަށް
އަންނަ އަހަރުގެ ސައުތު އޭޝިއަން ގޭމްސް އޭޕްރީލް 3 އިން 11 އަށް ޕާކިސްތާނުގެ ތިން ސިޓީއެއްގައި ބޭއްވުމަށް ސައުތު އޭޝިއަން އޮލިމްޕިކް ކައުންސިލް (އެސްއޭއޯސީ) އިން ވަނީ ނިންމާފައި. މި ބައްދަލުވުމުގައި ރާއްޖެ ހިމެނޭހެން ސަރަހައްދީ ގައުމުތަކުގެ އޮލިމްޕިކް ކޮމިޓީތަކުގެ އިސްވެރިން ބައިވެރިވެވެފައިވޭ
ފާއިތުވި ދެ ދުވަހު ޕާކިސްތާންގެ އިސްލާމްއާބާދުގައި ވަނީ ސައުތު އޭޝިއަން އޮލިމްޕިކް ކައުންސިލް (އެސްއޭއޯސީ)ގެ ބައްދަލުވުންތަކެއް ކުރިއަށްގޮސްފަ އެވެ. ސައުތު އޭޝިއަން އޮލިމްޕިކް ކައުންސިލުން ބޭއްވި މި ބައްދަލުވުމުގައި، ބަންގްލަދޭޝް، ރާއްޖެ، ނޭޕާލް، ސްރީ ލަންކާގެ އޮފިޝަލުން ޕާކިސްތާނަށް ގޮސް ބައިވެރިވިއިރު، އިންޑިއާ އިން ވަނީ ވީޑިއޯގެ ޒަރިއްޔާ އިން ބައްދަލުވުމުގައި ބައިވެރިވެފަ އެވެ. ބައްދަލުވުމުގައި ރާއްޖޭގެ ފަރާތުން ބައިވެރިވީ، މޯލްޑިވްސް އޮލިމްޕިކް ކޮމިޓީ (އެމްއޯސީ)ގެ ރައީސް، މުހައްމަދު އަބްދުއްސައްތާރު (ޗަމްޕީ) އާއި ސެކްރެޓަރީ ޖެނެރަލް، ތަމޫހު އަހުމަދު ސައީދު (ތަމޫ) އެވެ.
އެމްއޯސީން ބުނީ، ޕާކިސްތާން އޮލިމްޕިކް އެސޯސިއޭޝަނާއި ސައުތު އޭޝިއަން ގޭމްސްގެ އޮގަނައިޒިން ކޮމިޓީން އެ ގޭމްސް ބޭއްވުމަށްޓަކައި ކުރަމުން އަންނަ މަސައްކަތް ބަލައިގަންނަ ކަމަށެވެ. އަދި، ގޭމްސް ކަނޑައަޅާފައިވާ ގޮތަށް ކުރިއަށްގެންދިއުމަށްޓަކައި އެކި ފަރާތްތަކާ ގުޅިގެން މަސައްކަތް ކުރާނެ ކަމަށް ވަނީ ބުނެފަ އެވެ.
"ސައުތު އޭޝިއަން ގޭމްސް އަކީ ސަރަަހައްދުގެ ކުޅިވަރުގެ ގުޅުންތައް ހަރުދަނާކޮށް ކުރިއަށްގެންދިއުމަށްޓަކައި މުހިންމު ޕްލެޓްފޯމެއް. އެތުލީޓުންނަށް މުހިންމުކަން ބޮޑު އިންޓަނޭޝަނަލް މުބާރާތްތަކެއްގައި ވާދަކޮށްލަން ލިބޭ ގޭމްސް އެއް. މީގެ އިތުރުން، އެކުވެރިކަމާއި އެއްބައިވަންތަކަމާ އެކު އެކުގައި މަސައްކަތްކުރުމަށްޓަކައި ކުޅިވަރުގެ ތެރެއިން ގާއިމްކުރެވޭ ގުޅުމެއް،" އޮލިމްޕިކް ކޮމިޓީގެ ބަޔާނުގައިވެ އެވެ.
ސައުތު އޭޝިއަން އޮލިމްޕިކް ކައުންސިލް (އެސްއޭއޯސީ)ގެ ޑެލިގޭޝަނަށް ވަނީ، އަންނަ އަހަރުގެ ސައުތު އޭޝިއަން ގޭމްސްގެ ތައްޔާރީތަކަށް މިހާރު ލާހޯރް އާއި ޕެޝާވަރުގައި ކުރިއަށްދާ މަސައްކަތްތަކުގެ އެންމެ ފަހުގެ މައުލޫމާތު ހިއްސާކުުރުމުގެ އިތުރުން، އިސްލާމްއާބާދުގައި ހުރި ގޭމްސްގެ އިވެންޓްތައް ކުރިއަށްދާ ވެނިއުސްތަކަށް ޒިޔާރާތްކޮށްފައިވެ އެވެ.
މީގެ ކުރިން، ސައުތު އޭޝިއަން ގޭމްސްގެ އަންނަ އަހަރުގެ އެޑިޝަންގައި ޖުމްލަ އެކު، 27 ކުޅިވަރު ހިމަނާފައިވާ ކަމަށް ޕާކިސްތާން އޮލިމްޕިކް އެސޯސިއޭޝަން (ޕީއޯއޭ)އާ ހަވާލާދީ އެ ގައުމުގެ މީޑިއާ އިން ވަނީ ރިޕޯޓްކޮށްފަ އެވެ. އެކަމަކު، މިހާރު ރިޕޯޓްތައް ބުނާގޮތުން، 28 ކުޅިވަރު ބާއްވާއިރު، މި ކުޅިވަރުތަކުގައި ބައިވެރިވުމަށް ޕާކިސްތާނަށް 3200 އެއްހާ އެތުލީޓުން އަންނާނެ ކަމަށް ބެލެެވެ އެވެ.
އެންމެ ފަހުން، ސައުތު އޭޝިއަން ގޭމްސް ބޭއްވީ 2019 ވަަނަ އަހަރުގެ ޑިސެމްބަރު މަހު ނޭޕާލްގެ ކަތުމަންޑޫ އާއި ޕޮކާރާގަ އެވެ. އެ އަށް ފަހު، އެންމެ ފުރަތަމަ 2023 ވަނަ އަހަރު ބާއްވަން ނިންމި ސައުތު އޭޝިއަން ގޭމްސްގެ 14 ވަނަ އެޑިޝަން، އެކި ސަބަބުތަކާ ހުރެ ހަތް ފަހަރެއްގެ މަތިން މި ވަނީ ފަސްކޮށްފަ އެވެ. މީގެ ކުރިން، ޕާކިސްތާނުގައި ސައުތު އޭޝިއަން ގޭމްސް ބޭއްވީ 1989 ވަނަ އަހަރާއި 2004 ވަނަ އަހަރު އެވެ.
