ބޮޑު މަގްބޫލުކަމެއް ލިބިފައިވާ "ލަބޫބޫ" ތަކެތި ހިމެނޭ "ބްލައިންޑް ބޮކްސް" ތައްޔާރުކުރާ ޗައިނާގެ ބެއިޖިންއަށް ނިސްބަތްވާ ޕޮޕް މާޓް ކުންފުނިން، އެ ކުންފުނީގެ ވިޔަފާރި ފުޅާކުރުމުގެ ގޮތުން ބައިނަލްއަގުވާމީ ފުރަތަމަ ބޭކަރީ ސިންގަޕޫރުގައި ހުޅުވައިފި އެވެ.
ކުޅޭ އެއްޗެހި އުފައްދާ މި ކުންފުނިން ދަނީ އެ ކުންފުނީގެ އެންމެ މަގުބޫލު ކެރެކްޓާތައް ކާބޯތަކެތީގެ ގޮތުގައި ތައްޔާރު ކުރަމުންނެވެ. މީގެ ތެރޭގައި "ލަބޫބޫ" އައިސްކްރީމާއި، "މޮލީ" ކެރެކްޓާގެ ޑަބަލް ޗީޒްކޭކް ހިމެނެ އެވެ. ސިންގަޕޫރުގެ ޔުނިވާސަލް ސްޓޫޑިއޯސް ކުރިމަތީގައި ހުންނަ ދެ ބުރީގެ މި ބޭކަރީން، ކުޅޭ އެއްޗެހިން އިންސްޕަޔާވެގެން ތައްޔާރުކޮށްފައިވާ 45 ބާވަތެއްގެ ފޮނިކާތަކެއްޗާއި ބުއިންތައް ލިބެން ހުރެ އެވެ. މި ތަކެތީގެ އަގު އުޅެނީ 3.87 އެމެރިކާ ޑޮލަރާއި 24.77 އެމެރިކާ ޑޮލަރާ ދެމެދުގަ އެވެ.
މި މަޝްރޫއުގެ ފުރަތަމަ މަންޒިލަކީ ސިންގަޕޫރެވެ. ޕޮޕް މާޓްގެ "ޕޮޕް ބޭކަރީ" ގެ އިސްވެރިޔާ ޒަންގް ޝިއާއޯޔަންގް ދެއްވި އިންޓަވިއުއެއްގައި ވިދާޅުވީ، ޔޫރަޕާއި އެމެރިކާގައި ވެސް ބޭކަރީތައް ހުޅުވުމަށް ވިސްނަމުންދާ ކަމަށެވެ. އަދި އެއީ ވަގުތަށް ބަލައި، އެ ގައުމުތަކުގެ ސަޕްލައި ޗެއިން ފަދަ ކަންކަމަށް ހައްލު ހޯދުމަށްފަހު ކުރާނެ ކަމެއް ކަމަށް އޭނާ ވިދާޅުވި އެވެ.
މީގެ އިތުރުން ތައިލެންޑް، އިންޑޮނޭޝިއާ އަދި މެލޭޝިއާ ހިމެނޭ ގޮތަށް މުޅި ދެކުނު އިރުމަތީ އޭޝިއާގައި ޑެޒާޓް ޝޮޕް ނުވަތަ ފޮނިކާތަކެތި ވިއްކާ ފިހާރަތައް ހުޅުވުމަށް ވެސް އެ ކުންފުނިން ރާވަމުންދާ ކަމަށް އޭނާ އިތުރަށް ވިދާޅުވި އެވެ.
ސިންގަޕޫރުގައި މި ބޭކަރީ ހުޅުވާފައި މިވަނީ، ޗައިނާގެ އުތުރުގެ އައްސޭރިފަށުގެ ރަށެއް ކަމަށްވާ ގިންހުއަންގްޑާއޯގައި މިދިޔަ އޭޕްރީލް މަހު ޕޮޕް މާޓްގެ ފުރަތަމަ ބޭކަރީ ހުޅުވުމަށްފަހު އެވެ. އެ ކުންފުނިން މި ކޮންސެޕްޓް އެންމެ ފުރަތަމަ ޓެސްޓުކުރީ ޗައިނާގެ 30 އަށް ވުރެ ގިނަ ސަރަހައްދުގައި ވަގުތީ ގޮތުން ހިންގި "ޑެޒާޓް ޓްރަކް" ތަކެއްގެ އެހީގަ އެވެ.
ޕޮޕް މާޓުން ދަނީ ހަމައެކަނި ކުޅޭ އެއްޗެހި ވިއްކުމުގެ ބަދަލުގައި އެހެން ދާއިރާތަކަށް ވެސް ފުޅާވަމުންނެވެ.
މި އަހަރުގެ ތެރޭގައި ޕޮޕް މާޓުން ވަނީ ސޮނީ ޕިކްޗާސްއާ ގުޅިގެން "ލަބޫބޫ" މޫވީއެއް ތައްޔާރުކުރާނެކަން އިއުލާންކޮށްފަ އެވެ. އަދި ބެއިޖިންގައި ހުންނަ އެ ކުންފުނީގެ ތީމް ޕާކް "ޕޮޕް ލޭންޑް" އިތުރަށް ފުޅާކޮށް މިހާރު ވަނީ ހުޅުވާފަ އެވެ.
