ސިންގަޕޫރުގައި ހުރި އޮރެންޖު ޖޫސް ބޯ ވެންޑިން މެޝިނެއްގެ ހޮޅިއެއްގައި ދޫލުމަށްފަހު އަނބުރާ އޭގެ ތެރެއަށް ލީ ފްރާންސްގެ ދަރިވަރަކު، އާންމުންނަށް އުނދަގޫވާ ފަދަ އަމަލެއް ހިންގި ކަމުގެ ކުށުގައި 465 އެމެރިކާ ޑޮލަރުން ޖޫރިމަނާކޮށްފި އެވެ.
ސިންގަޕޫރުގެ ކޯޓަކުން މި ހުކުމް އިއްވާފައިވަނީ އުމުރުން 19 އަހަރުގެ ޑިޑިއޭ ގަސްޕާޑް އޯވެން މެކްސިމިލިއަންގެ މައްޗަށެވެ. ސިންގަޕޫރުގައި ކިޔަވަން އުޅޭ މި ދަރިވަރު ވަނީ އޭނާގެ މައްޗަށް އުފުލި އާންމުންނަށް އުނދަގޫވާ ފަދަ ކަމެއް ކުރުމުގެ ދައުވާއަށް އިއުތިރާފުވެފަ އެވެ.
މި ހާދިސާ ހިނގާފައިވަނީ މިއަހަރުގެ މާޗު މަހުގެ 12 ވަނަ ދުވަހު ސިންގަޕޫރުގެ މުއްސަނދި ސަރަހައްދެއް ކަމަށްވާ ގޯލްޑްހިލް ސެންޓަރުގަ އެވެ. ބޮކްސިން ތަމްރީނުތަކަކަށް ފަހު އެ ސަރަހައްދުގައި ހުރި އައިޖޫޒް މެޝިނަކުން ހޮޅިއެއް ނަގައި، އޭގައި ދޫލުމަށްފަހު އަނބުރާ ހޮޅިތައް ހުންނަ ވަށިގަނޑަށް ލާ މަންޒަރު ފެންނަ ވީޑިއޯއެއް އޭނާ ވަނީ އިންސްޓަގްރާމްގައި އާންމުކޮށްފަ އެވެ. އެ ވީޑިއޯއާއެކު އޭނާ ލިޔެފައިވަނީ މި ސިޓީއަކީ ރައްކާތެރި ތަނެއް ނޫން ކަމަށެވެ.
މި ވީޑިއޯ ސޯޝަލް މީޑިއާގެ އެކި މަންސަތަކުގައި ފެތުރި، ގިނަ ބައެއްގެ ފާޑުކިޔުންތަކާއި ނުރުހުން އަމާޒުވި އެވެ. މި މައްސަލަ ފެންމަތިވުމާއެކު، އެ މެޝިންތައް ހިންގާ އައިޖޫޒް ކުންފުނިން ވަނީ އެ މެޝިނުގައި ހުރި ހުރިހާ ހޮޅިތަކެއް ބަދަލުކޮށްފަ އެވެ. އެ ކުންފުނިން ބުނި ގޮތުގައި މެކްސިމިލިއަންގެ މި އަމަލާ ގުޅިގެން ޖުމްލަ 500 ހޮޅި އުކާލަން ޖެހުނެވެ.
ސިންގަޕޫރުގެ ގާނޫނުތައް ބުނާގޮތުން އާންމުންނަށް އުނދަގޫވާ ފަދަ އަމަލުތައް ހިންގާ މީހުން 2،000 ސިންގަޕޫރު ޑޮލަރަށް ވުރެ ބޮޑު ނޫން އަދަދަކުން ޖޫރިމަނާ ކުރުން ނުވަތަ ތިން މަސް ދުވަހުގެ ޖަލު ހުކުމެއް ނުވަތަ މި ދެ އަދަބު އެކުގައި ދިނުމުގެ އިހުތިޔާރު ކޯޓަށް ލިބިގެންވެއެވެ. ނަމަވެސް މި މައްސަލައިގައި ދައުލަތުންނާއި ދިފާއީ ވަކީލުންވެސް އެދިފައިވަނީ އޭނާ ޖޫރިމަނާ ކުރުމަށެވެ.
މެކްސިމިލިއަންގެ ދިފާއީ ވަކީލު ކޯޓުގައި ވިދާޅުވީ، އޭނާގެ މުވައްކިލު ކުރި ކަންތަކަށް ވަރަށް ބޮޑަށް ދެރަވާ ކަމަށެވެ. އަދި އެ ވަގުތު ސަމާސާއަކަށް ކުރި ކަމެއްގެ ނަތީޖާ މިހާ ހިތްދަތިވެދާނެ ކަމަށް އޭނާ ގަބޫލުނުކުރާ ކަމަށްވެސް ވަކީލު ފާހަގަކުރެއްވި އެވެ.
އައިޖޫޒް މެޝިންތަކަކީ ސިންގަޕޫރުގެ ރޭލު ސްޓޭޝަންތަކާއި، ވިޔަފާރި މަރުކަޒުތަކާއި އަދި މީހުން ދިރިއުޅޭ ސަރަހައްދުތަކުގައި ވަރަށް އާންމުކޮށް ފެންނަން ހުންނަ މެޝިންތަކެކެވެ. ދެ ސިންގަޕޫރު ޑޮލަރަށް ތާޒާ އޮރެންޖު ޖޫސް ތައްޓެއް ލިބޭ މި މެޝިންތަކަކީ ގިނަ ބައެއްގެ އިތުބާރު ލިބިފައިވާ ހިދުމަތެކެވެ. ނަމަވެސް މިފަދަ އަމަލުތަކުގެ ސަބަބުން އާންމު ސިއްހަތަށް ނުރައްކާވެ، ހިދުމަތްދޭ ކުންފުނިތަކަށް ބޮޑެތި ގެއްލުންތަކާ ކުރިމަތިލާން ޖެހެ އެވެ.
