ޖަޕާނުގެ އެންމެ އުސް ފަރުބަދަ ކަމަށްވާ މައުންޓް ފޫޖީއަށް އެރުމަށް ކުރި ދަތުރުގައި، ހަތް އަހަރުގެ ފިރިހެން ކުއްޖަކު 2,000 މީޓަރަށްވުރެ އުހުގައި ހުރި ބެންޗެއްގައި 8 ގަޑިއިރު ވަންދެން އެކަނި ބައިންދާފައި ދިޔަ 48 އަހަރުގެ ބައްޕައަކަށް އެ ގައުމުގެ ފުލުހުން ވަރުގަދަ އިންޒާރެއް ދީފި އެވެ.
އެ ކުއްޖާ އެތަނުގައި މަޑުކުރީވީ ފަރުބަދައަށް އަރަނިކޮށް ވަރުބަލިވެގެން ޝަކުވާ ކުރުމުންނެވެ. އެއަށް ފަހު ބައްޕަ، ދެން ހުރި ދަރިފުޅު ގޮވައިގެން ފަރުބަދައަށް އެރި އެވެ.
ވާރޭވެހި، ބޯކޮށް ދުންފުނި ފައިބާފައިވާ ނުރައްކާތެރި މާހައުލެއްގައި އެކަނި އިން މި ކުއްޖާގެ އަތުގައި އޮތީ ހަމައެކަނި ލުއި ބުއިމަކާއި ކާނާކޮޅެކެވެ.
ކުއްޖާ ފެނިފައިވަނީ ބުރާސްފަތި ދުވަހުގެ ހެނދުނު 7:00 އެހާކަންހާއިރު ފަރުބަދައިގެ ހަވަނަ ސްޓޭޝަން ކައިރީގައި ހުންނަ ހަޓެއްގެ މުވައްޒަފުންނަށް ކަމަށްވާއިރު، ކުއްޖާގެ ބައްޕަ ފެނިފައިވަނީ އެތަނުން ފެށިގެން 3 ގަޑިއިރުގެ ރާސްތާގެ ދުރުންނެވެ.
މި ހާދިސާއާ ގުޅިގެން ފުލުހުން ވަނީ ފަރުބަދައަށް އެރުން ހުއްޓާލަން ޖެހުނު ކަމުގައިވިޔަސް، ކުޑަކުއްޖަކު އެފަދަ ނުރައްކާތެރި މާހައުލެއްގައި އެކަނި ދޫކޮށްލުމަކީ އެއްގޮތަކަށްވެސް ބަލައިގަނެވޭނެ ކަމެއް ނޫން ކަމަށް ބުނެ އެ ބައްޕައަށް ވަރަށް ބޮޑަށް ފާޑުކިޔާފަ އެވެ. ކުއްޖާގެ ބައްޕަ ވަނީ އޭނާ ނިންމީ ގޯސް ނިންމުމެއްކަމަށް އެއްބަސްވެ މާފަށް އެދިފަ އެވެ.
3,776 މީޓަރު އުސް، އަދި ދުނިޔޭގެ ތަރިކައިގެ ދަފުތަރުގައި ހިމެނޭ މައުންޓް ފޫޖީއަށް އަހަރަކު 200,000 އަށްވުރެ ގިނަ މީހުން އަރާއިރު، ފަހަކަށް އައިސް އެ ފަރުބަދައިގައި ތަފާތު ނުރައްކާތެރި ހާދިސާތައް ހިނގުން ވަނީ އިތުރުވެފަ އެވެ.
