ޖަޕާނުގެ އިބަރާކީ ޕްރިފެކްޗާގެ ކޮގާ ސިޓީގައި އުމުރުން 42 އަހަރުގެ އަންހެނެއްގެ ތުންފަތް ތިނޯހަކުން ފަހާލައި، އޭނާއަށް އަނިޔާކުރި ކަމުގެ ތުހުމަތުގައި 49 އަހަރުގެ އަންހެނަކު ހައްޔަރުކޮށްފި އެވެ.
ކޮގާ ޕޮލިސް ސްޓޭޝަނުން ހާމަކޮށްފައިވާ ގޮތުގައި، މި ހާދިސާ ހިނގާފައިވަނީ ޖޫން 29 ވަނަ ދުވަހު އެ ދެ މީހުން ދިރިއުޅޭ އެޕާޓްމަންޓުގަ އެވެ.
ހައްޔަރުކުރި އަންހެން މީހާ ވަނީ އޭނާއާއެކު އެ އެޕާޓްމަންޓުގައި އުޅޭ އަންހެން މީހާގެ ތުންފަތުގެ އެކި ތަންތަން ފަހައި، އޭނާއަށް ބޮޑެތި ޒަހަމްތަކެއް ދީފަ އެވެ.
މި ހާދިސާ ހިނގިތާ އެއް ދުވަސް ފަހުން، ޖޫން 30 ވަނަ ދުވަހު، ތުހުމަތުކުރެވޭ އަންހެން މީހާ ބޭރަށް ދިޔަ ވަގުތު ބަލައި، އަނިޔާ ލިބުނު އަންހެން މީހާ ވަނީ އެ ގެއިން ފިލައިގެން ގޮސްފަ އެވެ.
އޭނާ އެ ގެއިން ނުކުމެގެން ކައިރީގައި ހުރި ފިހާރައަކަށް ގޮސް، "އަހަންނަށް އެހީތެރިވެދީ" މިހެން ލިޔެފައިވާ ކަރުދާސްކޮޅެއް އެ ފިހާރައިގެ މުވައްޒަފަކަށް ދެއްކުމުން، އެ މުވައްޒަފު ވަނީ އެ މައްސަލަ ފުލުހުންނަށް ރިޕޯޓްކޮށްފަ އެވެ.
މި ހާދިސާއާ ގުޅިގެން ލިބުނު އަނިޔާތަކުގެ ސަބަބުން، އެ އަންހެން މީހާއަށް ވާހަކަދެއްކުމަށާއި ކެއުމަށް އުނދަގޫވެފައިވާ ކަމަށް ރިޕޯޓްތައް ބުނެ އެވެ.
ފުލުހުން މިހާރު ދަނީ މި ހާދިސާ ހިނގަން މެދުވެރިވި ސަބަބާއި ކަން ހިނގައިދިޔަ ގޮތް ތަހުގީގު ކުރަމުންނެވެ. ނަމަވެސް، ހައްޔަރުކުރި އަންހެން މީހާ އެ ކުށަށް އިއުތިރާފުވެފައިވާ ކަމެއް ފުލުހުން އަދި ހާމައެއް ނުކުރެ އެވެ.
