ހިފެހެއްޓުމެއް ނެތި އުފުލެމުންދާ ޑޮލަރުގެ އަގު ރާއްޖޭގެ ކަޅު ބާޒާރުގައި 22.85ރ. އަށް މިއަދު އަރައިފި އެވެ.
މިއީ މިދިޔަ ހަފުތާ ނިމުނުއިރު، ކަޅު ބާޒާރުގައި ޑޮލަރުގެ އަގު ހުރި ވަރަށްވުރެ 15 ލާރި ބޮޑު އަދަދެކެވެ. މިދިޔަ ބުރާސްފަތި ދުވަހު ކަޅު ބާޒާރުގައި ޑޮލަރުގެ އަގު ހުރީ 22.60ރ. އަށެވެ. މީގެ ކުރިން ދުވަހަކު ވެސް ރާއްޖޭގެ ޑޮލަރުގެ އަގު މިހައި މައްޗަކަށް ނުދެ އެވެ.
މިދިޔަ ޖުލައި މަހުގެ 29 ވަނަ ދުވަހު ކަޅު ބާޒާރުގައި ޑޮލަރުގެ އަގު 21.70 ރުފިޔާގައި ހުރުމަށްފަހު، ފާއިތުވި ދުވަސްތަކުގައި އަގު ވަނީ މަޑުމަޑުން އުފުލެން ފަށައިފަ އެވެ. އެގޮތުން، މި މަހުގެ ތެރޭގައި އެކަނިވެސް ކަޅު ބާޒާރުގައި ޑޮލަރުގެ އަގު ވަނީ 1ރ. ބޮޑުވެފަ އެވެ.
މަރުކަޒީ ބޭންކު، މޯލްޑިވްސް މަނިޓަރީ އޮތޯރިޓީ (އެމްއެމްއޭ) އިން ޑޮލަރު ވިއްކުމަށް ކަނޑައަޅާފައިވާ ރަސްމީ ރޭޓަކީ 15.42ރ. އެވެ. ކަޅު ބާޒާރުގެ މިހާރުގެ އަގަށް ބަލާއިރު، މިއީ ރަސްމީ ރޭޓަށްވުރެ 7.43ރ. ބޮޑު އަދަދެކެވެ. އިންސައްތައިން ބަލާނަމަ މިއީ ރަސްމީ ރޭޓަށްވުރެ 48 ޕަސެންޓުގެ އިތުރުވުމެކެވެ.
ވިދިވިދިގެން ހަތަރު ވަނަ މަހު ބޭރު ފައިސާގެ ރިޒާވު ދަށަށް
ޖުމްލަ ރިޒާވާއި ބޭނުންކުރެވޭ ރިޒާވަށް މި ހީނަރުކަން އައީ ބޭރުގެ ދަރަނިތައް ދެއްކުމާއި ދުނިޔޭގެ އިގުތިސޯދަށް އައި ބަދަލުތަކުގެ ސަބަބުން ކަމަށްވާއިރު، ހަރަދު ކުޑަކުރުމުގެ ހަރުދަނާ ފިޔަވަޅުތަކެއް ނާޅައިފިނަމަ އިގުތިސޯދީ ނުރައްކަލެއް ކުރިމަތިވެދާނެ ކަމުގެ އިންޒާރު މާހިރުން އަންނަނީ ދެމުން.
ކަޅު ބާޒާރުގައި ޑޮލަރުގެ އަގު ހުއްޓުމެއްނެތި އިންތިހާއަށް ބޮޑުވަމުންދާއިރު، ޑޮލަރު ލިބުމުގައި ވެސް ދަނީ ދަތިތައް ދިމާވަމުންނެވެ.
ރާއްޖޭގެ އިގްތިސާދަށް ދިމާވެފައިވާ ޑޮލަރުގެ ތާށިކަން ހައްލުކުރުމުގެ ގޮތުން، ރިސޯޓުތަކާއި ގެސްޓުހައުސްތަކުން ލިބޭ ޑޮލަރު ބޭންކުތަކަށް މާރުކުރަން މަޖުބޫރުވާ ގޮތަށް މުހައްމަދު މުއިއްޒު ވަނީ އާ ސިޔާސަތެއް ތައާރަފު ކުރައްވައިފަ އެވެ. އެ ސިޔާސަތު އިއުލާނު ކުރެއްވުމަށްފަހު ސަރުކާރުން ބުނެފައިވަނީ ޑޮލަރުގެ އަގު ދެން އިތުރަށް މައްޗަށް ނުދާނެ ކަމަށެވެ. ނަމަވެސް ބާޒާރުގެ ހަގީގީ ހާލަތު ފެންނަނީ ސަރުކާރުގެ އުންމީދުތަކާ ދެކޮޅަށެވެ.
ތަފާސްހިސާބުތަކަށް ބަލާއިރު، މުޅި ދުނިޔެއަށް ކުރިމަތިވި ކޮވިޑް-19 ގެ ބަލިމަޑިކަމުގެ ތެރޭގައި ރާއްޖޭގެ ބޯޑަރުތައް ބަންދުކޮށް، ފަތުރުވެރިކަން މުޅިން ހުއްޓިފައި އޮތް ދުވަސްވަރުވެސް ޑޮލަރުގެ އަގު އެންމެ މައްޗަށް ދިޔައީ 19.50ރ. އަށެވެ. އެއީވެސް ވަރަށް ކުޑަ ދުވަސްކޮޅަކަށެވެ. އަދި މުއިއްޒު ވެރިކަމާ ހަވާލުވެވަޑައިގެންނެވި އިރު ކަޅު ބާޒާރުގައި ޑޮލަރެއްގެ އަގު ހުރީ 17.45ރ. ގަ އެވެ.
ހިފެހެއްޓުމެއް ނެތި ޑޮލަރުގެ އަގު އުފުލެމުންދާއިރު، ސަރުކާރުން ބުނަމުން ދަނީ ޑޮލަރުގެ އަގު މައްޗަށް ދަނީ ހަބަރު ސުރުހީތަކާ ހެދި ކަމަށެވެ.
ޑޮލަރުގެ އަގު އުފުލުމާއި، ނޫސްތަކުގައި ޖަހާ ސުރުހީތަކާ ގުޅުމެއް ނެތް: މާހިރުން
ޑޮލަރުގެ އަގު އުފުލުމާއި ނޫސްތަކުގެ ސުރުހީތަކާ ގުޅުމެއް ނެތް ކަމަށާއި، އަގު ބޮޑުވަނީ އިގުތިސޯދީ ހަގީގަތްތަކުގެ ސަބަބުން ކަމަށް މާލީ މާހިރުން ބުނެފި. މާހިރުން ފާހަގަކުރި ގޮތުގައި ޑޮލަރުގެ މައްސަލަ ހައްލުކުރެވޭނީ ރުފިޔާގެ ސަޕްލައި ކޮންޓްރޯލްކޮށް، ސަރުކާރުގެ ސިޔާސަތުތަކަށް ބަދަލު ގެނެސްގެން.
ޕީއެސްއެމްއިން އިންތިޒާމުކޮށްގެން ރޭ ގެނެސްދިން އިގުތިސާދީ ފޯރަމްގައި ވާހަކަދައްކަވަމުން މި ސަރުކާރުގެ އިގުތިސާދީ ވަޒީރު، މުހައްމަދު ސައީދު ވިދާޅުވީ ބްލެކް މާކެޓުގެ އަގުތައް ނޫސްތަކުން ގެނެސްދެނީ އާންމުންގެ މެދުގައި ކަންބޮޑުވުން އުފައްދުމަށެވެ.
ސައީދު އެހެން ވިދާޅުވި ނަމަވެސް، އެއީ އެކަން ހިނގާ ގޮތް ނޫން ކަމަށް އިގުތިސާދީ މާހިރުން ވަނީ ވިދާޅުވެފަ އެވެ. އެގޮތުން، ސްޕެކިއުލޭޝަންގެ ސަބަބުން މާކެޓަށް ކުރާ އަސަރަކީ ވަރަށް ކުރު މުއްދަތެއްގެ ތެރޭގައި ފިލައިގެންދާ ކަމެއްކަމަށް އިގުތިސާދީ މާހިރުން ވިދާޅުވެ އެވެ.
"ހަގީގަތަކީ، ސަރުކާރަށް ޑޮލަރެއް ނުހޯދޭ. ފައިނޭންސިން ނުކުރެވޭ. ދިވެހި ރުފިޔާގެ ސަޕްލައި އިތުރުވެއްޖެ. އެހެންވީމަ އޭގެ ސަބަބުން އާންމުން ޑޮލަރަށް ޑިމާންޑު ކުރާ ވަރު ގިނަ ވެއްޖެ," ފިނޭންސް މިނިސްޓްރީގެ ކުރީގެ ޗީފް ބަޖެޓު އެގްޒެކެޓިން މުހައްމަދު ސަރުވަޝް އާދަމް މީގެ ކުރިން އަދަދު އަށް ވިދާޅުވި އެވެ.
ކަޅު ބާޒާރުގެ އަގު ކޮންމެ ދުވަހަކު އުފުލެމުންދާތީ، އެކަމާ ދެކޮޅަށް އަޅާ ފިޔަވަޅެއްގެ ގޮތުން ކަޅު ބާޒާރުގައި ޑޮލަރު ވިއްކާ އަގުގެ ހަބަަރު ޝާއިއުކުރުން މަނާކުރަން ބޭރު ފައިސާއާ ބެހޭ ގާނޫނުގައި ހިމަނަން ރައްޔިތުންގެ މަޖިލީހުގެ މާލިއްޔަތު ކޮމިޓީން މިއަދު ވަނީ ނިންމައިފަ އެވެ.
ކަޅު ބާޒާރުގައި ޑޮލަރު ވިއްކާ އަގުގެ ހަބަރު ޖެހުން މަނާކުރަނީ
ރަސްމީ ރޭޓަށް ވުރެ ބޮޑު އަގުގައި ޑޮލަރު ވިއްކާ ކަޅު ބާޒާރުގެ އަގުތައް ޚަބަރުގެ ގޮތުގައި ޝާއިއުކުރުން މަނާކުރަން ބޭރު ފައިސާއާ ބެހޭ ގާނޫނުގައި ހިމެނުމަށް މާލިއްޔަތު ކޮމިޓީން ވަނީ ފާސްކޮށްފަ. މި ނިންމުމަކީ ކަޅު ބާޒާރުގައި ޑޮލަރުގެ އަގު އުފުލުން ކޮންޓްރޯލް ކުރުމަށް އެޅި ފިޔަވަޅެއް.
ކަޅު ބާޒާރުގައި ޑޮލަރު ވިއްކާ ރޭޓު އާންމުކުރާ ފަރާތްތައް ޖޫރިމަނާކުރަން ގާނޫނުގައި ހިމަނަން ވެސް މާލިއްޔަތު ކޮމިޓީން ވަނީ ނިންމައިފަ އެވެ. އެގޮތުން ކަޅު ބާޒާރުގައި ޑޮލަރު ވިއްކާ ރޭޓު އާންމުކުރީ ގާނޫނީ ޝަހުސަކުން ނުވަތަ ރަޖިސްޓްރީކޮށްފައިވާ ވިޔަފާރިއަކުން ނަމަ، 100،000ރ. އާއި ފަސް މިލިއަން ރުފިޔާއާ ދެމެދުގެ އަދަދަކުން ޖޫރިމަނާ ކުރެވޭ ގޮތަށް ބިލުގައި ވަނީ ހިމަނައިފަ އެވެ.
އޭގެ އިތުރުން، ބޭރު ފައިސާ ގަނެ ވިއްކުމަށް މަރުކަޒީ ބޭންކުން ކަނޑައަޅާފައިވާ ރޭޓު ނުވަތަ ބޭންޑަށް ވުރެ މަތީ ރޭޓުތަކުގައި ކުރާ ވިޔަފާރި ޕްރޮމޯޓުކުރުމާއި އިޝްތިހާރުކުރުމަކީ ވެސް ކުށެކެވެ. މި ކުށުގެ އަދަބަކީ 25،000ރ. އާއި 500،000ރ.އާ ދެމެދުގެ އަދަދަކުން ޖޫރިމަނާކުރުމެވެ.
މި ބަދަލުތަކާއެކީ، ރަސްމީ ރޭޓަށް ވުރެ ބޮޑުކޮށް ޑޮލަރު ވިއްކުން މަނާކުރެވޭ މާއްދާއެއް ވެސް ވަނީ ހިމަނާފަ އެވެ. ކޮމިޓީން ނިންމީ ބޭރު ފައިސާ ގަނެ ވިއްކުމުގައި މުއާމަލާތްތައް ކުރަންވާނީ އެމްއެމްއޭއިން ކަނޑައަޅާފައިވާ ރޭޓަށް ވުރެ ބޮޑުކޮށް ބޭރު ފައިސާ ވިއްކާ ނަމަ، 25،000ރ. އާއި 1 މިލިއަން ރުފިޔާއާ ދެމެދުގެ އަދަދަކުން ޖޫރިމަނާ ކުރެވޭނެ ގޮތަށް ގާނޫނަށް ބަދަލުތަކެއް ހުށަހަޅާށެވެ.
