އަމިއްލަ ކުދި ވިޔަފާރިތަކަށް ސަރުކާރުން ދަރާފައި ހުރި ފައިސާ ބައިބަޔަށް ބަހާލައިގެން ދޫކުރަން ފަށާފައިވާ ކަމަށް ފިނޭންސް މިނިސްޓަރު ހަސަން ޒަރީރު މިއަދު ވިދާޅުވެއްޖެ އެވެ.
މަޖިލީހުގައި މިއަދު ވާހަކަ ދައްކަވަމުން ޒަރީރު ވިދާޅުވީ، 500،000 ރުފިޔާއަށް ވުރެ މަދުން ފައިސާ ދޭންޖެހޭ ކުންފުނިތަކަށް، ފައިސާ ދޫކުރަން މިހާރު ފަށާފައިވާ ކަމަށެވެ. ނަމަވެސް ފައިސާ ދައްކަމުންދަނީ ބައިބަޔަށް ބަހާލައިގެން ކަމަށް އޭނާ ވިދާޅުވި އެވެ.
"އަޅުގަނޑުމެން މިހާރު މި ދަނީ ފަސް ލައްކައަށްވުރެ ދަށުން ފައިސާ ލިބެންޖެހޭ ފަރާތްތަކަށް ހަމަ ގަވާއިދުން ޕްރޮސެސް ކުރަމުން. ކުރިން ވެސް އަޅުގަނޑު ދެންނެވިން، އަޅުގަނޑުމެން މިހާރު އެއްވެސް ބޭފުޅަކު ބާކީނުކޮށް، ދައްކަންޖެހޭ ފައިސާ ކޮންމެވެސް ޕޯޝަނެއް [އެތިކޮޅެއް] އަޅުގަނޑުމެންގެ ކޭޝްފްލޯ އެވެއިލަބަލްވާ ވަރަކުން މި ދަނީ ދައްކަމުން،" ޒަރީރު ވިދާޅުވި އެވެ.
ސަރުކާރުން ދޭންޖެހޭ ފައިސާ ދޫނުކުރާ މައްސަލައިގައި ވިޔަފާރިތަކަށް އަންނަނީ ވަރަށް ބޮޑެތި ގެއްލުންވަމުންނެވެ. ބައެއް ވިޔަފާރިތައް ވަނީ ބަނގުރޫޓުވެފަ އެވެ. ވިޔަފާރިވެރިންނަށް ފައިސާ ދޫކުރުން މަޖިލީހުގެ އިންތިހާބާއި ލޯކަލް ކައުންސިލް އިންތިހާބާ ދިމާކޮށް ރައީސް މުހައްމަދު މުއިއްޒު ވައުދުވެވަޑައިގެންނެވި އެވެ.
ވިޔަފާރިވެރިންނަށް ފައިސާ ދޫކުރަން މުއިއްޒު ހަ ތާރީހެއް ދެއްވި އެވެ. ނަމަވެސް ކޮންމެ ފަހަރަކު ވެސް އެ ސުންގަޑި ހަމަވުން އައު ތާރީހެއް ދެއްވަނީ އެވެ.
ވިޔަފާރިތަކަށް ލިބެންޖެހޭ ފައިސާގެ އިތުރުން، ޑޮލަރުގެ ވާހަކަ ވެސް މިއަދު މިނިސްޓަރު މަޖިލީހުގައި ދެއްކެވި އެވެ. އޭނާ ވިދާޅުވީ ޑޮލަރުގެ ދަތިކަން ކުރިމަތިވެގެން މި އުޅެނީ މިދިޔަ އޭޕްރީލް މަހު 500 މިލިއަން ޑޮލަރުގެ ލޯނު ދައްކަންޖެހުމުން ކަމަށެވެ.
"ޑޮލަރުގެ ދަތިކަން އެންމެ ބޮޑަށް އަޅުގަނޑުމެންނަށް ތަހައްމަލް ކުރަންޖެހުނު އެއް ސަބަބު އެއީ އަޅުގަނޑުމެން 500 މިލިއަން ޑޮލަރުގެ ސުކޫކެއް ދައްކަންޖެހުން އެއްފަހަރާ. މިދަތިތައް ހައްލުކުރަން ކުރަންޖެހޭ މަސައްކަތްތައް އަޅުގަނޑުމެން މި ދަނީ ކުރަމުން،" މިނިސްޓަރު ޒަރީރު ވިދާޅުވި އެވެ.
މާލީ ތަޖުރިބާކާރުން ބުނަނީ ޑޮލަރުގެ އަގު އުފުލުމުގެ މައިގަނޑު އެއް ސަބަބަކީ އައު އިންވެސްޓްމެންޓެއް ނުވަތަ ލޯނެއް ނުނަގައި، އިގްތިސާދުގައި އެނބުރެމުންދިޔަ ޑޮލަރުން 500 މިލިއަން ޑޮލަރުގެ ލޯނު ދެއްކުމެވެ. އެއާއެކު ޑޮލަރުގެ ހަރަދު ކުޑަ ނުކުރުމަކީ ވެސް ޑޮލަރުގެ އަގު ބޮޑުވާ މައިގަނޑު ސަބަބެއް ކަމަށް މާހިރުން ބުނެ އެވެ.
