ގައުމީ އެއާލައިން މޯލްޑިވިއަން ހިންގާ އައިލެންޑް އޭވިއޭޝަން ސާވިސަސް (އައިއޭއެސް) އިން ޓޫރިސްޓުންނަށް ވިއްކާ ޓިކެޓު އަގު މުރާޖާކޮށް، މިހާރަށް ވުރެ ޓިކެޓުތަކުގެ އަގު ހެޔޮކުރަން ސަރުކާރުން މިއަދު ނިންމައިފި އެވެ.
ރައީސް އޮފީހުން މިކަން އިއުލާންކުރީ، ކެބިނެޓުން ނިިންމި މުހިންމު ބައެއް ނިންމުންތައް ކަމަށް ބުނެ އެ އޮފީހުގެ ވެބްސައިޓުގައި ޝާއިއުކުރި ހަބަރެއްގަ އެވެ. އެ ހަބަރުގައި މި ބަދަލުތައް ގެންނަން ކެބިނެޓުން ނިންމަން ކަން ބަޔާންކުރި ނަމަވެސް އިތުރު ތަފުސީލުތަކެއް ނެތެވެ.
މޯލްޑިވިއަންގެ ޓިކެޓުތައް ޓޫރިސްޓުންނަށް އަގު ހެޔޮ ކުރަން ނިންމިއިރު، ޓޫރިސްޓުންނަށް ބޮޑު އަގު ނަގާތީ ބައެއް ޓޫރިސްޓުން ރާއްޖެ އަންނަން ބޭނުން ނުވާ ކަމީ ޓޫރިޒަމް ވިޔަފާރިތަކުގެ ދުވަސްވީ ޝަކުވާއެކެވެ.
މިއީ ޓޫރިޒަމަށް ފައިދާވާ ގޮތެއް ނަމަވެސް، މީގެ ސަބަބުން އައިލެންޑް އޭވިއޭޝަނުގެ އާމްދަނީއަށް އަސަރު ކުރާނެ އެވެ. މީގެ ކުރިން ވެސް އެ ކުންފުނިން ވަނީ މިހާރުގެ އަގުތަކުގައި ވެސް އެތެރޭގެ ގިނަ މަންޒިލުތަކަށް ގެއްލުމުގައި ދަތުރުތައް ކުރަން ޖެހޭ ކަމުގެ ޝަކުވާކޮށްފަ އެވެ.
މިހެން ކަމުން ދެން އޮންނާނެ ގޮތަކީ ސަރުކާރުން ފައިސާގެ އެހީ ނޫނީ ސަބްސިޑައިޒްކޮށްގެން މި ދަތުރުތައް ކުރުމެވެ. މިކަން މި ގޮތަށް ކޮށްފި ނަމަ، އެކަން ވާނީ ދައުލަތުގެ ވިޔަފާރި ކުންފުނިތަކަށް ލިބޭ އާމްދަނީން ހަރަދުތައް ހަމަޖައްސަން ސަރުކާރުން ވެފައިވާ ވައުދާ ހިލާފު ކަމަކަށެވެ.
އޮޑިޓު އޮފީހުން އާންމުކޮށްފައިވާ އައިލެންޑް އޭވިއޭޝަނުގެ 2024 ވަނަ އަހަރުގެ އޮޑިޓު ރިޕޯޓުގައިވާ ގޮތުގައި އެ އަހަރު އެ ކުންފުންޏަށް 2.7 މިލިއަން ރުފިޔާ ގެއްލުންވި އެވެ.
އެ އަހަރު އެ ކުންފުންޏަށް 2.2 ބިލިއަން ރުފިޔާގެ އާމްދަނީއެއް ލިބުނުއިރު، ހިންގުމުގެ ހަރަދުތަކަށް ކަނޑާފައި 171.2 މިލިއަން ރުފިޔާ ހިންގުމުގެ ފައިދާގެ ގޮތުގައި ލިބުނެވެ. އެކަމަކު ހިންގައިގެން ލިބުނު ހުރިހާ ފައިދާއެއް އެ ކުންފުނިން ހަރަދުކުރަން ޖެހުނީ ފައިނޭންސިން ހަރަދުތަކަށެވެ.
އައިލެންޑް އޭވިއޭޝަނުގެ ފައިނޭންސިން ހަރަދުތަކުގެ ބޮޑު ބައެއް ހަރަދު ވަނީ އެ ކުންފުނިން ކުއްޔަށް ނަގާފައިވާ އެއާކްރާފްޓުތަކަށެވެ.
