ފުލުހުންގެ މުއައްސަސާގެ ސްޕެޝަލް އޮޕަރޭޝަންސް ކޮމާންޑު އެލާޓަށް ގެނެސްފި އެވެ.
އަދަދު ނޫހަށް މައުލޫމާތު ލިބިފައިވާ ގޮތުގައި އެސްއޯ ފުލުހުން އެލާޓަށް ގެނައީ ދާދި ދެންމެއަކު އެވެ. އެ ކޮމާންޑު އެލާޓަށް ގެނައުމަށްފަހު، ރައީސް އޮފީސް ކައިރިއަށް ދިޔުމަށް މަގުމަތީގައި ހަރަކާތްތެރިވާ ފުލުހުންގެ ބީޓުތަކަށް އަންގާފައިވާ ކަމަށް މި ނޫހަށް މައުލޫމާތު ލިބިފައިވެ އެވެ.
ފުލުހުންގެ އެސްއޯ ކޮމާންޑު އެލާޓަށް ގެނެސްފައި މި ވަނީ ސަރުކާރުގެ ކެބިނެޓުގައި ހިމެނޭ ނުވަ ވަޒީރުން އިސްތިއުފާދެއްވާފައިވާ ދަނޑިވަޅެއްގަ އެވެ. ކެބިނެޓުގައި ހިމެނޭ ވަޒީރުންތަކެއް އިސްތިއުފާ ދެއްވާފައި ވަނީ ރައީސް އޮފީހުން އަންގައިގެން ކަމަށް މައުލޫމާތު މި ނޫހަށް އެނގިފައިވެ އެވެ.
އިސްތިއުފާ ދެއްވި މިނިސްޓަރުން:
- ފޮރިން މިނިސްޓަރު އަބްދުﷲ ހަލީލް
- ސޯޝަލް އެންޑް ފެމިލީ ޑިވެލޮޕްމަންޓު މިނިސްޓަރު އައިޝަތު ޝިހާމް
- ޑިފެންސް މިނިސްޓަރު ގައްސާން މައުމޫން
- ލޯކަލް ގަވަމެންޓް މިނިސްޓަރު އާދަމް ޝަރީފް
- ހެލްތު މިނިސްޓަރު އަބްދުالله ނާޒިމް
- އެގްރިކަލްޗާ މިނިސްޓަރު މަރިޔަމް މާރިޔާ
- ޓޫރިޒަމް މިނިސްޓަރު ތޯރިގު އިބްރާހިމް
- ޔޫތު މިނިސްޓަރު އިބްރާހިމް ވަހީދު (އަސްވާޑު)
- ހަޔާ އެޑިއުކޭޝަން މިނިސްޓަރު އަލީ ހައިދަރު
ސަރުކާރުގެ މިނިސްޓަރުންތައް މިއަދު ވަކިކޮށްފައި މިވަނީ ނިމިދިޔަ ލޯކަލް ކައުންސިލް އިންތިހާބުގައި ސަރުކާރު ހިންގާ ޕީއެންސީ ބޮޑު ނާކާމިޔާބީއަކާ ކުރިމަތިލާފައި ވަނިކޮށެވެ. ކައުންސިލް އިންތިހާބާއެކު ނެގި ފެންނަ ނުފެންނަ ވޯޓުން ވެސް ސަރުކާރުން ހުށަހެޅި ދެ އިންތިހާބު އެއްކޮށްލުމާ ގުޅޭ ހުށަހެޅުމަށް ވެސް ބޮޑުތަނުން ވަނީ ނޫނެކޭ ބުނެފަ އެވެ.
