ދިވެހި ގައުމީ ބަތޮލު، އުތީމު މުހައްމަދު ތަކުރުފާނު އަލްއައުޒަމްގެ މަތިވެރި ޖިހާދާއި ނުގުޑާފަދަ އަޒުމު އާލާކުރުމުގެ މަގުސަދުގައި ބާއްވާ "ރޭރަން" (Reyrun) ދުވުމުގައި ރަޖިސްޓްރީވުމަށް ހުޅުވާލައިފި އެވެ.
މިއީ ކަޅުއޮށްފުންމީގައި އަނދިރި ރޭތަކުގައި ދިވެހިރާއްޖޭގެ މިނިވަންކަމަށްޓަކައި ކުރެއްވި އަށް އަހަރުގެ ދިގު ޖިހާދުގެ ހިތްވަރާއި، ގައުމީ ރޫހު ދިރުވައި އާލާކުރުމުގެ ގޮތުން ބާއްވާ ދުވުމެއް ކަމަށް، ދުވުން އިންތިޒާމުކުރާ ވީރަން މޯލްޑިވްސްއިން ބުންޏެވެ.
"ރޭރަން އަކީ ދިވެހިންގެ އަމިއްލަ ސަގާފީ އަދި ތާރީހި އަޒުމު ދައްކުވައިދޭނެ ދުވުމެއް. މިއީ ނުގުޑާފަދަ އަޒުމާއި، ކެތްތެރިކަމާއި، ސާބިތުކޮށްދޭނެ އިންތިހާނެއް ފަދަ ދުވުމެއް،" ވީރަންގެ މެނޭޖިން ޑިރެކްޓަރު ޒިނާން ބުންޏެވެ.
ސެޕްޓެމްބަރު 4 ވަނަ ދުވަހުގެ ރޭ ހުޅުމާލޭގައި ބާއްވާ މި ދުވުމުގެ ރަޖިސްޓްރޭޝަން ފީއަކީ 300ރ އާއި 450ރ އާދެމެދުގެ އަދަދެކެވެ.
މި ދުވުން ފަށާނީ ސެޕްޓެމްބަރު 4 ވަނަ ދުވަހުގެ ރޭ މެންދަމު 2:00 ގަ އެވެ.
| ކެޓަގަރީ | ދުރުމިން | ފަށާ ގަޑި (ސެޕްޓެމްބަރު 4، 2026) |
| މެރަތަން | 42 ކިލޯމީޓަރު | 02:00 |
| ހާފް މެރަތަން | 21 ކިލޯމީޓަރު | 04:00 |
| 10ކޭ ދުވުން | 10 ކިލޯމީޓަރު | 05:30 |
| 5 ކޭ ދުވުން | 5 ކިލޯމީޓަރު | 06:00 |
މި ދުވުމުގައި ބައިވެރިވާ ދުވުންތެރިންނަށް ކުޑަކުދިންގެ ސައިޒުން ފެށިގެން ބޮޑެތި މީހުންގެ (Kids XS އިން Kids XL، އަދި XXS އިން XXL) ކިޓް ލިބެން ހުންނާނެ އެވެ.
ސްޓާޓިން ލައިނުން ފެށިގެން ފިނިޝިން ލައިނާ ހަމައަށް ކޮންމެ ދުވުންތެރިއަކުވެސް ރަމްޒުކޮށްދޭނީ ދިވެހިންގެ ސާބިތުކަން ކަމަށް ޒިނާން ބުންޏެވެ.
މި ދުވުމުގެ މެރަތަން އާއި ހާފް މެރަތަންގައި ބައިވެރިވެވޭނީ 18 އަހަރުން މަތީގެ މީހުންނަށެވެ. ނަމަވެސް 10 ކިލޯމީޓަރާއި 5 ކިލޯމީޓަރުގެ ދުވުމުގެ ކުޑަކުދިންނަށް ވެސް ބައިވެރިވެވޭނެ އެވެ.
