ލަންޑަން (އޮގަސްޓް 17) - ފާއިތުވި ސީޒަނުގައި އިޓަލީގެ ކްރެމޮނީސޭ އަށް ކުޅުނު 39 އަހަރުގެ އިނގިރޭސި ފޯވާޑް، ޖޭމީ ވާޑީ އަށް ބްރެޒިލްގެ ގަދަބާރު، ސައޮ ޕައޮލޯ އިން އޮފާއެއް ލިބިފައިވާ ކަމަށް އީއެސްޕީއެން ބްރެޒިލް އިން ރިޕޯޓްކޮށްފި އެވެ.
ލެސްޓާ ސިޓީއާ އެކު ގިނަ ކާމިޔާބީތަކެއް ވާޑީ، މިދިޔަ އަހަރުގެ އޮގަސްޓް މަހު، އެ ކްލަބް ދޫކޮށްލާފައިވަނީ، 13 އަހަރަށް ފަހު އެވެ. ލެސްޓާ އަށް ވާޑީ ސޮއިކުރީ އިނގިރޭސި އެންމެ ދަށް ޑިިވިޝަނުގައި 2012 ވަނަ އަހަރު ވާދަކުރަމުން އައި ފްލީޓްވުޑް ޓައުން އިންނެވެ.
އިނގިރޭސި ތިން ވަނަ ޑިވިޝަނަށް ރެލިގޭޓްވެ، މާލީ މައްސަލަތަކެއްގައި މި ވަގުތު އޮތް، ލެސްޓާ އިން ވާޑީ ސިފަ ކުރަނީ، އެ ކްލަބްގެ ތާރީހުގައި ވެސް ފެނިގެންދިޔަ އެންމެ ހާއްސަ ކުޅުންތެރިޔާގެ ގޮތުގަ އެވެ. ވާޑީ އަކީ ޕްރިމިއާ ލީގުގައި އެ ޓީމަށް އެންމެ ގިނަ ގޯލު ޖަހައިދިން ކުޅުންތެރިޔާ އެވެ. ޖުމްލަ އެކު، ހުރިހާ މުބާރާތެއްގައި ލެސްޓާ އަށް ވާޑީ ވަނީ 500 މެޗުން 200 ގޯލު ޖަހައިދީފަ އެވެ.
މިދިޔަ ސީޒަނުގައި އިޓާލިއަން ލީގަށް ޕްރޮމޯޓްވި ކްރެމޮނީސޭ އިން ވާޑީ އަށް ދިން ކޮންޓްރެކްޓް މިދިޔަ ޖޫން މަހުގެ ނިޔަލަށް ވަނީ ހަމަވެފަ އެެވެ. މިދިޔަ ސީޒަނުގައި ކްރެމޮނީސޭ އަށް ވާޑީ ކުޅެދިން 27 މެޗުން ހަތް ލަނޑު ޖަހައި ތިން ލަނޑު ޖަހަން ފުރުސަތު ތަނަވަސްކޮށްދިނެވެ. ކްރެމޮނީސޭ އިން ވާޑީ އަށް އިތުރު ކޮންޓްރެކްޓެއް ނުދޭން ނިންމީ ސެރީ ބީ އަށް އެ ޓީމު ރެލިގޭޓްވުމުންނެވެ.
އަންނަ ސީޒަނުގައި އިނގިރޭސި ދެ ވަނަ ޑިވިޝަނުގައި ވާދަކުރަން ޖެހިފައިވާ ލަންޑަންގެ ވެސްޓް ހޭމް ޔުނައިޓެޑުން ވާޑީ ގެންދަން މަޝްވަރާ ކުރާ ކަމަށް އިނގިރޭސި ނޫސްތަކުން ރިޕޯޓްކޮށްފައިވެ އެވެ. އެކަމަކު، އޭގެ ފަހުން ސައޮ ޕައޮލޯގެ އޮފާ ލިބުމާ އެކު، ވާޑީ އަންނަނީ އެ ޑީލާ މެދު ވިސްނަމުންނެވެ.
ވާޑީ ވަނީ ލެސްޓާއާ އެކު، 2016 ވަނަ އަހަރު ޕްރިމިއާ ލީގު ކާމިޔާބުކޮށްފަ އެވެ. އެ ފަަހަރު، ޕްރިމިއާ ލީގުގެ މޮޅު ކުޅުންތެރިއަކީ ވެސް ވާޑީ އެވެ. އެ ފަހަރު އޭނާ ވަނީ ލީގުގައި 24 ގޯލު ޖަހައިފަ އެވެ. މީގެ އިތުރުން، ލެސްޓާ އިން 2021 ވަނަ އަހަރުގެ އިނގިރޭސި އެފްއޭ ކަޕް ޗެމްޕިއަންކަން ހޯދި ޓީމަށް ވެސް ވާޑީ ވަނީ ކުޅެފަ އެވެ.
ވާޑީއާ އެކު ސައޮ ޕައޮލޯ އިން ކުރިއަށް އޮތް ދުވަސްތަކުގައި އިތުރު މަޝްވަރާތަކެއް ކުރިއަށްގެންދާނެ ކަމަށް އީއެސްޕީއެން ބްރެޒިލުން ރިޕޯޓްކޮށްފައިވެ އެވެ. އަދި، އެ ޓީމުން ވެސް ވިސްނަނީ، އިނގިރޭސި ގައުމީ ޓީމަށް 26 މެޗުން ހަތް ލަނޑު ޖަހައިދީފައިވާ ވާޑީ އަށް އެއް އަހަރުގެ ކޮންޓްރެކްޓެއް ދިނުމަށް ކަމަށް ރިޕޯޓްތައް ބުނެ އެވެ.
