ޓޫރިޒަމް ނޫން ވިިޔަފާރިތަކުގެ ތެރެއިން ޑޮލަރު މާރުކުރަން ޖެހޭ ވިޔަފާރިތަކަށް ލިބޭ އާމްދަނީގެ މިންގަނޑު އަހަރެއްގެ ތެރޭގައި 15 މިލިއަން ޑޮލަރުން 25 މިލިއަން ޑޮލަރަށް މަތިކުރުމަށްޓަކައި ގާނޫނުތައް ބަދަލުކުރަން މޯލްޑިވްސް މަނިޓަރީ އޮތޯރިޓީ (އެމްއެމްއޭ) އިން ހުށަހަޅައިފި އެވެ.
އެމްއެމްއޭއިން މި މިންގަނޑު މަތިކުރަނީ ބޭރު ފައިސާގެ ގާނޫނަށް ގެންނަން ހުށަހަޅާފައިވާ ބަދަލުތަކުގެ ތެރެއިންނެވެ.
އެ ގާނޫނުގައި އޮންނަ ގޮތުން ޑޮލަރު މާރުކުރަން ޖެހޭ ވިޔަފާރިތަކުން ތެރެއިން ޓޫރިޒަމް ނޫން ވިޔަފާރިތައް ގިންތިކޮށްފައި ވަނީ "ކެޓެގަރީ ސީ" ގައި އެވެ. މި ކެޓަގަރީއަށް ފެތޭ ވިޔަފާރިތަކުން ވެސް އަަހަރެއްގެ ތެރޭގައި ލިބޭ އާމްދަނީގެ 20 ޕަސެންޓު ރާއްޖޭގެ ބޭންކަކަށް މާރުކުރަން ޖެހެ އެވެ.
އެމްއެމްއޭއިން ބުނީ މި ގިންތީގައި ހިމެނޭ ވިޔަފާރިތަކުގެ މިންގަނޑަށް ބަދަލު ގެންނަނީ، މިހާރު އޮތް މިންގަނޑުން ބަލާއިރު ނިސްބަތުން ކުދި ވިޔަފާރިތަކަކަށް ޑޮލަރު މާރުކުރަން މަޖުބޫރުވެފައި އޮތްއޮތުން ބަދަލުކުރަން ކަމަށެވެ. މިހާރު މި ކެޓަގަރީގައި ރަޖިސްޓްރީކޮށްގެން ޑޮލަރު މާރުކުރަމުން ދަނީ އެންމެ 13 ވިޔަފާރިއަކުންނެވެ.
އެމްއެމްއޭއިން ބުނީ މި ވިޔަފާރިތަކުގެ ތެރޭގައި ޓެލެކޮމިއުނިކޭޝަނާއި އޭވިއޭޝަނާއި ކޮންސްޓްރަކްޝަން ހިމެނޭހެން އެކި ސިނާއަތްތަކުގައި ހަރަކާތްތެރިވާ ވިޔަފާރިތައް އެބަހުރި ކަމަށެވެ. އަދި، އެ އިދާރާގެ ބޭނުމަކީ މީގެ ތެރެއިން އެންމެ ބޮޑެތި ވިޔަފާރިތަކަށް އެކަނި މާރުކުރާ ގޮތަށް ބަދަލުތައް ގެނައުން ކަމަށް ވެސް އެމްއެމްއޭއިން ބުންޏެވެ.
ޑޮލަރު މާރުކުރަން ޝަރުތުހަމަވާ އާމްދަނީގެ މިންގަނޑު މަތިކުރަން އެމްއެމްއޭއިން ހުށަހަޅާއިރު، އެ އިދާރާއިން ކުރިން ވެސް ހުށަހެޅީ އަަހަރަކު 20 މިލިއަން ޑޮލަރަށް ވުރެ ބޮޑު އާމްދަނީއެއް ލިބޭ ވިޔަފާރިތަކުން މާރުކުރާ ގޮތަށް ގާނޫނު އެކުލަވާލާށެވެ. މި އަދަދު އަހަރަކު 15 މިލިއަން ޑޮލަރަށް ތިރިކުރީ ރައްޔިތުންގެ މަޖިލީހުގެ ކޮމިޓީ މަރުހަލާގައި ބައެއް މާއްދާތަައް ބަދަލުކުރި އިރުގައި އެވެ.
އެމްއެމްއޭއިން ހިއްސާކުރި ތަފާސްހިސާބުތަކުން ދައްކާ ގޮތުގައި ޑޮލަރު މާރުކުރުމުގެ ސިޔާސަތު ތަންފީޒު ކުރި ފުރަތަމަ އަހަރުގެ ވިޔަފާރިތަކުން ވަނީ 1.7 ބިލިއަން ޑޮލަރު ބޭންކުތަކަށް މާރުކޮށްފަ އެވެ. ބޭންކުތަކުން ވަނީ މި ފައިސާގެ ތެރެއިން 768.5 މިލިއަން ޑޮލަރު އެމްއެމްއޭއަށް ވިއްކާފަ އެވެ.
ބޭރު ފައިސާގެ ގާނޫނަށް ގެންނަ ބަދަލުތަކަށް އަމަލުކުރަން ފަށަން އެމްއެމްއޭއިން ވިސްނަނީ އަންނަ ސެޕްޓެމްބަރު މަހުން ފެށިގެންނެވެ.
