ޕެރިސް (އޮގަސްޓް 17) - ޕީއެސްޖީ 1-0 އިން ބަލިކޮށް އެ ޓީމު ސިއްސުވާލުމަށް ފަހު، ލޯންސް އިން ފްރެންޗް ސުޕަ ކަޕް ޗެމްޕިއަންކަން ހޯދައިފި އެވެ.
މިއީ، މިދިޔަ މެއި މަހު ފްރެންޗް ކަޕް ތަށި ހޯދި ލޯންސް އިން ފްރާންސްގެ ފުޓްބޯޅަ ސީޒަން ފަށަން ކުޅޭ ސުޕަ ކަޕްގެ ޗެމްޕިއަންކަން ހޯދި ފުރަތަމަ ފަހަރެެވެ.
މިއީ، މިދިޔަ ސީޒަނުގައި ލޯންސް އަށް ކާމިޔާބު ހޯދައިދިން ކޯޗު ޕިއޭރޭ ސާޖް އެ ޓީމު ދޫކޮށްލި ފަހުން އެ ޓީމާ ދެން ހަވާލުވި ޑީނޯ ޓޮޕްމޯއެލާގެ އިރުޝާދުގެ ދަށުން ކުޅުނު ރަސްމީ ފުރަތަމަ މެޗެވެ.
ދާދި ފަހުން، އެސްޓަން ވިލާ ބަލިކޮށް، ޔުއެފާ ސުޕަ ކަޕް ޗެމްޕިއަންކަން ހޯދި ޕީއެސްޖީ އަށް ރޭ ލޯންސް ކައިރީގައި މާ އެދެވޭ ކުޅުމެއް ނުދެއްކުނެވެ.
ރޭގެ މެޗުގައި ފެނިގެންދިޔަ ހަމައެކަނި ލަނޑު ލޯންސް އިން ޖެހީ ފުރަަތަމަ ހާފުގަ އެވެ. އެ ގޮތުން، 32 ވަނަ މިނިޓްގައި ލޯންސް އިން މި ލަނޑު ޖެހީ ފްލޯރިއަން ތޯވާން އެވެ. މިއީ، އެ ޓީމުގެ މަތިއޫ އުޑޯލް ފޮނުވާލަން އުޅުނު ބޯޅައަކަށް އަރައި، ތޯވާން ޖެހި ގޯލެކެވެ. ލޯންސް އިން މި މެޗުގައި ލީޑުނެގިތާ ހަ މިނިޓް ފަހުން، އެ ޓީމަށް ޕްރެޝަރު ހާލަތެއް ދިމާވި އެވެ. އެއީ، 39 ވަނަ މިނިޓްގައި ލޯންސްގެ ކީލިއަން އެންޓޯނިއޯ އަށް ސީދާ ރަތެއް ދެއްކުމުންނެވެ. އޭނާ އަށް ރަތެއް ދެއްކީ ޕީއެސްޖީގެ މެގްނެސް އަކްލިއޫޝް އަށް ކުރި ފައުލަކަށެވެ.
ލޯންސް އިން ކުޅުންތެރިއަކު މަދުކޮށް، މެޗުގެ ބޮޑުބައި ކުޅެން ޖެހުނު ނަމަވެސް ރަނގަޅަށް ޑިފެންސްކޮށް ޕީއެސްޖީގެ އެޓޭކްތައް ހުއްޓުވި އެވެ. މެޗުގައި ޕީއެސްޖީން ވެސް ނިންމާލީ ކުޅުންތެރިއަކު މަދުކޮށެވެ. އެއީ، ދެ ވަނަ ހާފުގައި ލޫކަ ޑީންޏާގެ ބަދަލުގައި ކުޅެން އެރި، ނޫނޯ މެންޑޭސް އަށް މެޗުގެ 86 ވަނަ މިނިޓްގައި ރަތެއް ދެއްކުމުންނެވެ.
ރޭގެ މެޗުގައި ޕީއެސްޖީން ބްރެޑްލީ ބާކޮލާ އާއި އިބްރާހިމް އެމްބާއޭ އަށް މެޗުގެ ސްކޮޑުން ވެސް ފުރުސަތު ނުދެ އެވެ. އެ ދެ ކުޅުންތެރިންގެ ސޮއި ހޯދަން އިނގިރޭސި ޕްރިމިއާ ލީގުގެ ލިވަޕޫލުން އަންނަނީ މަސައްކަތްކުރަމުންނެވެ.
