ކެލިފޯނިއާގައި ބޭއްވި ޑިޒްނީގެ "ޑީ23" ފޭން އިވެންޓުގައި، މާވެލް ސްޓޫޑިއޯސްގެ ރައީސް ކެވިން ފައިގީ ވަނީ ކުރިއަށް އޮތް "އެކްސް-މެން" ފިލްމުން ފެނިގެންދާނެ މަޝްހޫރު ތަރިން ހާމަކޮށްފަ އެވެ.
ކޮންމެ ދެ އަހަރަކުން އެއް އަހަރު ބާއްވާ "ޑީ23" އަކީ ކުރިއަށް ހުރި ފިލްމުތަކާއި ޓީވީ ސިލްސިލާތައް ދައްކާލުމަށް ޑިޒްނީން ބާއްވާ އެންމެ ބޮޑު ހަރަކާތެވެ. އަދި މި ފަހަރުގެ އިވެންޓުގައި އެންމެ ގިނަ ބަޔަކު އިންތިޒާރު ކުރަމުންދިޔަ ފިލްމަކީ ވެސް "އެކްސް-މެން" އެވެ.
އެނަހައިމްގައި މިދިޔަ ހުކުރު ދުވަހު ބޭއްވި މި ހަރަކާތުގައި، 2028 ވަނ އަހަރުގެ މެއި މަހު ރިލީޒްކުރުމަށް ހަމަޖެހިފައިވާ މި ފިލްމުގެ ތަރިން ވަނީ ސްޓޭޖަށް އަރާފަ އެވެ. އޭގެ ތެރޭގައި ޖީން ގްރޭގެ ރޯލުން ފެންނާނެ ސޭޑީ ސިންކް އާއި، ސައިކްލޮޕްސްގެ ރޯލުން ފެންނާނެ ކިޓް ކޮނާ އާއި، ޕްރޮފެސަރު އެކްސްގެ ރޯލުން ފެންނާނެ ކްރިސްޓޮފާ އެބޮޓްގެ އިތުރުން ރޯގްގެ ރޯލުން ފެންނާނެ އިންޑޭ ނަވަރެޓޭ ހިމެނެ އެވެ. މީގެ އިތުރުން ސްޓޯމްގެ ރޯލުން މާޔާ ބޮއިޑް ފެންނައިރު، "މިސްޓަ ސިނިސްޓާ" ގެ ގޮތުގައި މަޝްހޫރު ނަތަނިއަލް މިލްބަރީގެ ރޯލުން ފެންނާނީ އެޑަމް ޑްރައިވާ އެވެ.
މީގެ އިތުރުން ޑިޒްނީން ވަނީ އަންނަ އަހަރުގެ ނޮވެމްބަރު މަހު ސިނަމާތަކަށް އަންނަ "ފްރޯޒަން 3" އާ ގުޅޭ ބައެއް ތަފްސީލުތައް ވެސް ހާމަކޮށްފަ އެވެ. ފިލްމުގެ ފުރަތަމަ މަންޒަރުތަކުން އާ އަންހެން ވިލަންއެއް ފެނިގެންދިޔަ ނަމަވެސް، އެއީ ކާކުކަމެއް އަދި އެ ކެރެކްޓާއަށް އަޑު އަޅަނީ ކޮން ފަންނާނެއްކަމެއް ހާމަކޮށްފައެއް ނުވެ އެވެ.
މި ހަރަކާތުގައި އާނާގެ އަޑު އަޅައިދޭ ކްރިސްޓަން ބެލް އާއި، އާނާގެ ދައްތަ އެލްސާގެ އަޑު އަޅައިދޭ އިދީނާ މެންޒެލް ވަނީ "ފްރޯޒަން ހާޓް" ގެ އާ ވާޝަނެއް ހުށަހަޅައިދީފަ އެވެ. އަދި ސުނޯމޭން އޯލާފްގެ އަޑު އަޅައިދޭ ޖޯޝް ގޭޑް ވަނީ "އޫޫޫ، ސަމަންތާ" ނަމަކަށް ކިޔާ އާ ލަވަޔެއް ދައްކާލާފަ އެވެ.
މި އިވެންޓުގެ އެހެނިހެން ފާހަގަކޮށްލެވޭ ކަންކަމުގެ ތެރޭގައި، ރަޔަން ގޮސްލިންގް މުހިންމު ރޯލަކުން ފެންނަ "ސްޓާ ވޯޒް: ސްޓާފައިޓާ" ގެ ފުރަތަމަ މަންޒަރުތައް ދައްކާލުން ހިމެނެ އެވެ. ރަޔަން ގޮސްލިންގް އަކީ މާވެލް ސްޓޫޑިއޯސްގެ ކުރިއަށް އޮތް "ގޯސްޓް ރައިޑާ" މަޝްރޫއާ ވެސް ގުޅިފައިވާ ތަރިއެކެވެ.
