މެކްސިކޯ އަށް ފުރިހަމަ ރެކޯޑެއް، ދެކުނު އެފްރިކާ އަށް ތާރީހީ ކާމިޔާބެއް

Jun 25, 2026, 8:09 AM
ފީފާ ވޯލްޑް ކަޕް ފުޓްބޯޅަ މުބާރާތުގައި މެކްސިކޯ އާއި ޗެކް ރިޕަބްލިކް ކުޅުުނު މެޗުގެ ތެރެއިން ކުއިނޯނޭސް ލަނޑު ޖެހުމަށް ފަހު އުފާފާޅުކުރަނީ.

ފީފާ ވޯލްޑް ކަޕް ފުޓްބޯޅަ މުބާރާތުގައި މެކްސިކޯ އާއި ޗެކް ރިޕަބްލިކް ކުޅުުނު މެޗުގެ ތެރެއިން ކުއިނޯނޭސް ލަނޑު ޖެހުމަށް ފަހު އުފާފާޅުކުރަނީ.

މެކްސިކޯ ސިޓީ، މެކްސިކޯ (ޖޫން 25) - ފީފާ ވޯލްޑް ކަޕް ފުޓްބޯޅަ މުބާރާތުގައި ޗެކް ރިޕަބްލިކް އަތުން 3-0 އިން މޮޅުވެ، މެކްސިކޯ އިން ފުރިހަމަ ރެކޯޑަކާ އެކު ގްރޫޕް ސްޓޭޖު ނިންމާލައިފި އެވެ. 

ގްރޫޕްގެ ފަހު މެޗާ ކުރިމަތިލިިއިރު ވެސް މެކްސިކޯ އިން ވަނީ ގްރޫޕް އޭގެ އެއް ވަަނަ ޓީމުގެ ގޮތުގައި ގަދަ 32 ޓީމުގެ ބުރުގެ ޖާގައެއް ޔަގީންކޮށްފަ އެވެ. އަދި، މި މެޗުގައި ޗެކް ރިޕަބްލިކް ބަލިކޮށް މެކްސިކޯ އިން ނޮކަައުޓް ބުރަށް ނުކުންނާނީ ގްރޫޕް ސްޓޭޖުގެ ތިން މެޗުން ވެސް މޮޅުވެ ފުރިހަމަ ރެކޯޑަކާ އެކު އެވެ. އެއީ، ތިން މެޗުން. ނުވަ ޕޮއިންޓް ހޯދައިގެންނެވެ. 

ދެ ވަނަ ޓީމުގެ ގޮތުގައި މި ގްރޫޕުން ނޮކައުޓް ބުރަށް ދިޔައީ ފުރަތަމަ މެޗުން މެކްސިކޯ އަތުން ބަލިވި ދެކުުނު އެފްރިކާ އެވެ. މިއީ، ހަތަރު ވަނަ ފަހަރަށް ވޯލްޑް ކަޕްގައި ކުޅޭ ދެކުނު އެފްރިކާ އިން މުބާރާތުގެ ގްރޫޕް ސްޓޭޖު ފަހަނައަޅައި ކުރިއަށްދިޔަ ފުރަތަމަ ފަހަރެވެ. 

Advertisement

ދެކުނު ކޮރެއާ އަތުން 1-0 އިން މޮޅުވެ، ދެކުނު އެފްރިކާ އިން ދެ ވަަނަ ހޯދީ ހަތަރު ޕޮއިންޓާ އެކު އެވެ. ތިން ވަނައިގައި އޮތް ދެކުުނު ކޮރެއާ އަށް ތިން ޕޮއިންޓް ލިބުނުއިރު، ޗެކް ރިޕަބްލިކް ކެޓީ އެއް ޕޮއިންޓާ އެކު އެވެ. 

ފުރަތަަމަ ހާފު ފަށައިގެން ޗެކް ރިޕަބްލިކުން ކުރިއަށް ޖެހިގެން ކުޅެ ހަމަލާތަކެއް ފޮނުވާލެވޭތޯ މަސައްކަތްކުރި އެވެ. އެ ގޮތުން، ޗެކް ރިޕަބްލިކްގެ އެޓޭކް ލީޑުކުރަމުންދިޔަ އެޑަމް ހްލޯޒެކް ފޮނުވާލި ބޯޅަ ދިޔައީ ގޯލާސީދާނުވެ އެވެ. އަދި، ޗެކް ރިޕަބްލިކްގެ ޑެނިސް ވިސިންސްކީ އޭރިއާ ބޭރުން ހަމަލާތަކެއް ފޮނުވާލިއިރު، ގޯލާ ދިމާލަށް އެންމެ ޝޮޓެއް ވެސް ފޮނުވާނުލެވުނެވެ. 

މެކްސިކޯ އިން ބަދަލުތަކެއް ގެނެސްގެން ކުޅުނު މި މެޗުގައި އެ ޓީމުން ފުރަތަމަ ހާފުގެ ފަހުކޮޅުގައި ލަނޑެއް ޖެހޭތޯ އެޓޭކަށް ގިނަ ބޯޅަތަކެއް ކުޅެފައިވެ އެވެ. އެ ގޮތުން، އެ ޓީމުގެ ރޮބާޓޯ އަލްވަރާޑޯ އަށް ލިބުނު ހުސް ފުރުސަތެއްގައި ޖެހި ބޯޅަ ދިޔައި ހުރަސްދަނޑިމަތިންނެވެ. އަދި، އެ ޓީމުގެ ޖޫލިއަން ކުއިނޯނޭންސް ފޮނުވާލި ޝޮޓެއް ވަނީ ބްލޮކްވެފަ އެވެ. 

ފީފާ ވޯލްޑް ކަޕް ފުޓްބޯޅަ މުބާރާތުގައި މެކްސިކޯ އާއި ޗެކް ރިޕަބްލިކް ކުޅުުނު މެޗުގައި މެކްސިކޯ އިން ލަނޑު ޖެހުމަށް ފަހު އުފާފާޅުކުރަނީ.
ފީފާ ވޯލްޑް ކަޕް ފުޓްބޯޅަ މުބާރާތުގައި މެކްސިކޯ އާއި ޗެކް ރިޕަބްލިކް ކުޅުުނު މެޗުގައި މެކްސިކޯ އިން ލަނޑު ޖެހުމަށް ފަހު އުފާފާޅުކުރަނީ.

މެޗުގެ ދެ ވަނަ ހާފުގެ ކުޅުން ފެށިގެން، 10 މިނިޓް ތެރޭ މެކްސިކޯ އިން ވަނީ ލީޑުނަގައިފަ އެވެ. ލުއިސް ރޯމޯ ދިން ބޯޅައެއް ހިފައިގެން މަޓެއޯ ޗާވޭޒް އޭރިއާތެރެއަށް ވަދެ، ވަނީ ގޯލުގެ ދުރު ކަނަށް ބޯޅަ އަމާޒުކޮށްލައިފަ އެވެ. އަދި، ފުރަތަަމަ ލަނޑު ޖެހިތާ ފަސް މިނިޓް ތެރޭ މެކްސިކޯ އިން ވަނީ ދެ ވަނަ ލަނޑެއް ޖަހައި ލީޑުފުޅާކޮށްފަ އެވެ. މިއީ، ޗެކް ރިޕަބްލިކްގެ ޑިފެންޑަރުންނަށް ހެދުނު ގޯހެއްގެ ފައިދާނަގައި، ކުއިނޯނޭސް ޖެހި ގޯލެކެވެ. 

މެކްސިކޯ އިން ވަނީ މެޗުގެ ފަހު، ވަގުތު ތަޖުރިބާކާރު ގޯލްކީޕަރު، ގިލެރްމޯ އޮޗޯއާ ކުޅެން އަރުވައިފަ އެވެ. މިއި، އޮޗޯއާ ކުޅޭ ހަ ވަަނަ ވޯލްޑް ކަޕް އެވެ. އޮޗޯއާ އަކީ ހަ ވަނަ ވޯލްޑް ކަޕެއްގައި ކުޅޭ ހަތަރު ވަނަ ކުޅުންތެރިޔާ އެވެ. އަނެއް ތިން ކުޅުންތެރިންނަކި، ލިއޮނަލް މެސީ، ކްރިސްޓިއާނޯ ރޮނާލްޑޯ އަދި ލޫކަ މޮޑްރިޗް އެެވެ. 

މެކްސިކޯގެ ފަހު ލަނޑު ޖެހީ ބަދަލަކަށް ކުޅެން އެރި އަލްވާރޯ ފިޑާލްގޯ އެވެ. އޭނާ އަށް ލިބުނު ފުރުސަތުގައި ގޯލުގެ މަތީ ކަނަށް ބޯޅަ އަމާޒުކޮށްލި އެވެ. 

މި ގްރޫޕްގެ އަނެއް މެޗުގައި މޮޅުވުން މަޖުބޫރު މެޗަކަށް ނުކުމެ ދެކުނު އެފްރިކާ އިން ދިޔައީ ދެކުނު ކޮރެއާގެ ފަހަތަށް ބާރު ބޮޑުކުރަމުންނެވެ. އެ ގޮުތުން، ފުރަތަަމަ ހާފުގައި ދެކުނު އެފްރިކާ އަށް ލަނޑު ޖަހާނެ ރަނގަޅު ގިނަ ފުރުސަތުތަކެއް ލިބި ބޭނުމެއް ނުުކުރެވުނެވެ.

ފީފާ ވޯލްޑް ކަޕް ފުޓްބޯޅަ މުބާރާތުގައި ދެކުނު އެފްރިކާ އާއި ދެކުނު ކޮރެއާ ވާދަކުރި މެޗުގެ ތެރެއިން.
ފީފާ ވޯލްޑް ކަޕް ފުޓްބޯޅަ މުބާރާތުގައި ދެކުނު އެފްރިކާ އާއި ދެކުނު ކޮރެއާ ވާދަކުރި މެޗުގެ ތެރެއިން.

ދެކުނު ކޮރެއާ އިން ވެސް ފުރަތަމަ ހާފުގައި މަދު ބޯޅަތަކެއް ނަމަވެސް ރަނގަޅަށް ކުރިއަށް ކުޅުނެވެ. އެކަަމަކު، އެ ޓީމުގެ އެޓޭކުގައި ބޯޅަ ހިފެހެއްޓޭގޮތެއްނުވި އެވެ. 

ފުރަތަަމަ ހާފުގެ ފަހުކޮޅުގައި ދެކުނު އެފްރިކާގެ ރެލޮބޯހިލް މޮފޮކެންގް ފޮނުވާލި ބޯޅައެއް ދެކުނު ކޮރެއާގެ ކީޕަރު، ކިމް ސަންގް ޔޯ އަތުގައި ޖެހިފައި ރީބައުންސް ނުކުތްތަނުން ދެކުނު އެފްރިކާގެ އެވިޑެންސް މަކްގޮޕާ ފޮނުވާލި ބޯޅަ ވެސް އަމާޒުވި ކީޕަރު ކިމް އަތަށެެވެ. 

ފުރަތަމަ ހާފުގައި ލިބުނު ފުރުސަތުތަކުގެ ބޭނުން ދެކުނު އެފްރިކާ އަށް ނުހިފުނު ނަމަވެސް ދެ ވަނަ ހާފުގައި އެ ޓީމުން ވަނީ ލަނޑު ޖަހައި ލީޑުނަގައިފަ އެވެ. މެޗުގެ 63 ވަނަ މިނިޓްގައި ދެކުނު ކޮރެއާ އޭރިއާތެރެއިން ލިބުނު ފުރުސަތުގައި ދެކުނު އެފްރިކާގެ ތަޕޭލޯ މަސޭކޯ ވަނީ ގޯލުގެ ކައިރި ކަނަށް ބޯޅަ އަމާޒުކޮށްލައިފަ އެވެ. 

ދެކުނު ކޮރެއާ އިން ބަދަލުތަކެއް ގެނެސްގެން އެޓޭކަށް ގޮސް ލަނޑެއް ޖެހޭތޯ މަސައްކަތް ފެށި އެވެ. 

ކޮމެންޓް

ފަހުގެ ޚަބަރު

ވޭގާގެ ނަމެއް ނެތް، ފީފާ އިންތިހާބުގައި ތިން ކެންޑިޑޭޓުން!

އަންނަ އަހަރު ބާއްވާ ފީފާގެ އިންތިހާބުގައި ވާދަކުރާ ތިން ކެންޑިޑޭޓުންގެ ނަން އިއުލާނުކުރިއިރު، ކުރީގެ ކުޅުންތެރިޔާ ރަމޮން ވޭގާގެ ނަން ޝަރުތު ހަމަނުވުމުގެ ސަބަބުން ވަނީ ބާކީވެފައި. މި އިންތިހާބުގައި ވާދަކުރައްވަނީ މިހާރުގެ ރައީސް އިންފަންޓީނޯގެ އިތުރުން ފްރާންސްގެ ފިލިޕޭ ޑިއާލޯ އަދި ޖަޕާނުގެ ކޯޒޯ ޓަޝީމާ

އަނިޔާއިން ރަނގަޅުވެ އިލާން އެނބުރި އަންނަން ތައްޔާރު

ކަކުލަށް ލިބުނު އަނިޔާއަކާ ގުޅިގެން ދެ މަހެއްހާ ދުވަހު ކުޅުމާ ދުރުގައި ހުރުމަށްފަހު، މާޒިޔާގެ ފޯވާޑް މުހައްމަދު އިލާން އިމްރާން އަލުން ކުޅުމަށް އެނބުރި އަންނަން ތައްޔާރުވެއްޖެ. މި އަނިޔާގެ ސަބަބުން އިލާނަށް ސާފް ޗެމްޕިއަންޝިޕާއި ލީގުގެ މުހިންމު މެޗުތަކެއް ގެއްލުނު ނަމަވެސް، އޭނާ މިހާރު ވަނީ ފަރިތަކުރުންތަކުގައި ބައިވެރިވާން ފަށާފައި

ފީފާ އިން ނޭޕާލްގެ ސަސްޕެންޝަން އުވާލަނީ؟

ފީފާގެ އެންގުންތަކަށް ބޯނުލެނބުމުގެ ސަބަބުން ނޭޕާލް ފުޓްބޯޅަ ފެޑެރޭޝަނަށް ދީފައިވާ ސަސްޕެންޝަން، ކުރިއަށް އޮތް މަހެއްހާ ދުވަސް ތެރޭގައި އުވާލާނެ ކަމަށް ނޭޕާލުން ވަނީ ބުނެފައި. މި ސަސްޕެންޝަން އުވާލުމަށް ނޭޕާލް ސަރުކާރުގެ މަންދޫބުން ފީފާ އާއި އޭއެފްސީއާ އެކު މަޝްވަރާކޮށްފައި

އެފްއޭއެމްގެ އޮފިޝަލެއް ނެތް، ޓްރޮފީއާ ހަވާލުވީ ނޫސްވެރިއެއް!

ބަންގްލަދޭޝްގައި ބޭއްވި ސާފް ޗެމްޕިއަންޝިޕްގެ ފެއާ ޕްލޭ ޓްރޮފީ ރާއްޖެއަށް ލިބުނުއިރު، އެފްއޭއެމްގެ އޮފިޝަލަކު ނެތުމުން އެއާ ހަވާލުވީ ދިވެހި ނޫސްވެރިއެއް. އެފްއޭއެމް އިން ބުނި ގޮތުގައި ޓްރޮފީ ލިބޭކަން ސާފް އިން އެންގީ ވަރަށް ކުޑަ ވަގުތުކޮޅެއް އޮއްވާ ކަމަށާއި، ނޫސްވެރިއަކު ސްޓޭޖަށް އެރީ ސާފްގެ އޮފިޝަލުން އެދިގެން

އިންފަންޓީނޯގެ ޝަރުތު ހަމަވޭތޯ ގާނޫނީ ގޮތުން ބެލި

ފީފާގެ ރައީސްކަމަށް ހަތަރުވަނަ ދައުރަކަށް ކުރިމަތިލައްވާފައިވާ ޖިއާނީ އިންފަންޓީނޯގެ ޝަރުތު ހަމަވޭތޯ އިނގިރޭސި އެފްއޭއިން ގާނޫނީ ގޮތުން ބަލައިފި. ފީފާ ކައުންސިލުން ނިންމާފައިވަނީ އިންފަންޓީނޯގެ ފުރަތަމަ ދައުރަކީ ބާކީ އޮތް މުއްދަތެއް ފުރިހަމަކުރުން ކަމަށްވާތީ، އޭނާއަށް އިތުރު ދައުރަކަށް ކުރިމަތިލެވޭނެ ކަމަށް

އުމުރުން 38 އަހަރުގައި މަޓާ ފުޓްބޯޅަ ކުޅުން ހުއްޓާލައިފި

ސްޕެއިނާއެކު ވޯލްޑް ކަޕާއި ޔޫރޯ ކާމިޔާބުކޮށް، ޗެލްސީ އާއި މެންޗެސްޓާ ޔުނައިޓެޑް ފަދަ ބޮޑެތި ކްލަބްތަކަށް ކުޅުނު ހުއާން މަޓާ އުމުރުން 38 އަހަރުގައި ފުޓްބޯޅަ ކުޅުން ހުއްޓާލައިފިއެވެ. ކުޅުމުން ރިޓަޔާކުރި ނަމަވެސް، ކުރިއަށް އޮތް ތަނުގައިވެސް ފުޓްބޯޅައިގެ ދާއިރާއިން ފެންނާނެ ކަމަށް އޭނާ ވަނީ ބުނެފައެވެ.

ޕާކިސްތާން ފުޓްބޯޅަ ކުރިއަރާނީ ޕްރޮފެޝަނަލް ލީގެއް އޮވެގެން

ޕާކިސްތާން ފުޓްބޯޅަ ކުރިއެރުވުމަށްޓަކައި އެ ގައުމުގައި ވަރުގަދަ ޕްރޮފެޝަނަލް ލީގެއް އޮތުން މުހިންމު ކަމަށް ގައުމީ ކޯޗު ނޮލްބާޓޯ ސޮލާނޯ ބުނެފި. އޭނާ ފާހަގަކުރި ގޮތުގައި ހަމައެކަނި ބޭރުގައި ކުޅޭ ކުޅުންތެރިންނަށް ބަރޯސާވުމުގެ ބަދަލުގައި، ލޯކަލް ކުޅުންތެރިން ކުރިއެރުވޭނީ ގަވާއިދުން ކުޅޭނެ ލީގެއް އޮވެގެން

Newsletter

Get the latest news delivered straight to your inbox