ސްރީ ލަންކާގައި ކުރިއަށްދިޔަ ޕްރޯ މޫއޭ ތައި ޗެމްޕިއަންޝިޕްގައި ވާދަކޮށް ރާއްޖޭގެ އަހުމަދު އީލާފް ނަދީމް، ކެރިއަރުގައި ދެ ވަނަ ރަން މެޑަލް ހޯދައިފި އެވެ.
އީލާފް، މޫއޭ ތައި އިން ރާއްޖެ އަށް ފުރަތަމަ ރަން މެޑަލް ގެނެސްދިނީ މި އަހަރުގެ ފެބްރުއަރީ މަހު ކުރިއަށްދިޔަ ލަންކާގެ ނެޝަނަލް މޫއޭ ތައި ޗެމްޕިއަންޝިޕް މުބާރާތަކުންނެވެ.
ކޮލަމްބޯގެ ބަންޑާރަނައިކެ މެމޯރިއަލް އިންޓަނޭޝަނަލް ކޮންފަރެންސް ހޯލުގައި ކުރިއަށްދިޔަ ޕްރޯ މޫއޭ ތައި ޗެމްޕިއަންޝިޕްގައި އީލާފް ވަރަށް ރަނގަޅަށް ތައްޔާރުވި އެވެ.
އެ ގޮތުން، މި ޗެމްޕިއަންޝިޕްގައި އީލާފް ރަން މެޑަލް ހޯދީ މިޑްލްވެއިޓް 76 ކިލޯ ކެޓަގެރީގައި ވާދަކޮށެވެ. އެއީ، ފައިނަލުގައި، ލަންކާގެ އިސުރު އަތުން މޮޅުވެގެންނެވެ.
މިއީ، ޕްރޯ މޫއޭ ތައި ޗެމްޕިއަންޝިޕުގައި ވާދަކޮށް އީލާފް ރަން މެޑަލް ހޯދި ދެ ވަނަ ފަހަރެވެ.
މި ފަހަރުގެ މޫއޭ ތަށި ޗެމްޕިއަންޝިޕްގައި، ރާއްޖޭގެ ފައިޓަރެއް ކަމަށްވާ ޑެނިއަލް އަހްމަދު ޒަކީ ވެސް ވާދަކުރި އެވެ. އެ ގޮތުން، އޭނާ ވާދަކުރީ ލަންކާގެ ފަހަދުއާ އެވެ. ފަހަދު އަތުން ނާކާމިޔާބުވެ، ޑެނިއަލް އަށް ލިބުނީ ވާދަކުރި އިވެންޓުގެ ރަނަރަޕް އެވެ.
ޕްރޯ މޫއޭ ތައި ޗެމްޕިއަންޝިޕަކީ ލަންކާގައި ކުރިއަށްދާ މި ކުޅިވަރުގެ ބާއްވާ އެންމެ ބޮޑު ހަރަކާތެވެ.
އީލާފް އާއި ޑެނިއަލް، މި މުބާރާތަށް ތަމްރީންތައް ހަދާފައިވަނީ، މޯލްޑިވްސް މޫއޭ ތަައި އެކަޑަމީ އެންޑް ފައިޓް ސޯލް މޯލްޑިވްސް ހެޑް ކޯޗު، މުހައްމަދު ޝަނަސް އެވެ. އަދި، އީލާފް އާއި ޑެނިއަލްގެ ތަމްރީންތަކަށް، ވެންކުއިޝް މޫއޭ ތައި އެންޑް ފިޓްނަސް ސްރީ ލަންކާގެ ކޯޗު، ވިމުކިތީ އަބޭނަޔަކޭގެ އެހީތެރިކަން ވަރަށް ބޮޑަށް ލިބިގެންދިޔަ އެވެ. ރާއްޖޭގައި ޓްރެއިނިން ކުރިއަށްގެންދިއުމުގެ އިތުރުން، މުބާރާތާ ދިމާކޮށް ލަންކާގައި، އީލާފް އާއި ޑެނިއަލް ވަނީ ޓްރެއިނިން ކޭމްޕެއް ފުރިހަަަމަކޮށް، މުބާރާތަށް ރަނގަޅަށް ތައްޔާރުވެފަ އެވެ.
