ހުޅުމާލެ ހޮސްޕިޓަލުގައި މަސައްކަތް ކުރާ ފިރިހެން ޑޮކްޓަރަކާ ގުޅޭގޮތުން ސޯޝަލްމީޑިއާގައި ފަތުރަމުންދާ ވާހަކަތަކަކީ ހަގީގަތެއް ނެތް ދޮގު ވާހަކަތަކެއް ކަމަށް އެ ހޮސްޕިޓަލުން ބުނެފި އެވެ.
ހުޅުމާލެ ހޮސްޕިޓަލުން މިރޭ ނެރުނު ބަޔާނެއްގައި ބުނީ އެ ހޮސްޕިޓަލުން ފޯރުކޮށްދޭ ހިދުމަތްތަކަކީ ބަލިމީހުންގެ ރައްކާތެރިކަމާއި ކަރާމާތާއި އަމިއްލަ މިނިވަންކަމުގެ އިތުރުން އިތުބާރު ދެމެހެއްޓުމަށް އިސްކަންދީގެން ދެވޭ ހިދުމަތްތަކެއް ކަމަށެވެ.
ބަލިމީހުން ހުށަހަޅާ ކޮންމެ ކަންބޮޑުވުމެއް ވެސް އެ ހޮސްޕިޓަލުން ސީރިއަސް މައްސަލައެއްގެ ގޮތުގައި ބަލައި ގާނޫނާއި ގަވާއިދުތަކުގެ މަތިން އަޅަންޖެހޭ ފިޔަވަޅު އަޅަމުންދާ ކަމަށް އެ ބަޔާނުގައި ބުންޏެވެ،
"ސޯޝަލްމީޑިއާގައި މިހާރު ދައުރުވަމުންދާ ބައެއް ވާހަކަތަކަކީ މި ހޮސްޕިޓަލަށް ލިބިފައިވާ މައުލޫމާތުތަކަށް ބަލާއިރު، ހަގީގަތާ ހިލާފު ވާހަކަތަކެއްކަން ފާހަގަކުރަން،" އެ ބަޔާނުގައި ބުންޏެވެ.
އެ ހޮސްޕިޓަލުން ހިދުމަތްދޭ ބަލިމީހުންނާއި ތަނުގެ މުވައްޒަފުންގެ އަމިއްލަ މައުލޫމާތު އެ ހޮސްޕިޓަލުން ފުރިހަމައަށް ހިފަހައްޓާނެކަމުގެ ޔަގީންކަން ވެސް އެ ބަޔާނުގައި ދީފައިވެ އެވެ.
ސިއްހީ ހިދުމަތްދޭ ތަންތަނާ ގުޅުވައި ހަގީގަތެއް ނެތް ވާހަކަތައް ފެތުރުމުގެ ސަބަބުން އެ ތަންތަނުން ހިދުމަތް ހޯދާ ބަލިމީހުންނަށާއި އެމީހުންގެ އާއިލާތަކަށް ނަފުސާނީ ގޮތުން ނުތަނަވަސްކަން ލިބި ސިއްހީ ހިދުމަތްތަކަށް އޮންނަ އިތުބާރު ގެއްލިގެންދިޔުމަކީ ކަންބޮޑުވާ ކަމެއް ކަމަށް އެ ބަޔާނުގައި ބުންޏެވެ.
