މިދިޔަ އަހަރުގެ ޖުލައި މަހާ އަޅައިބަލާއިރު، އަސާސީ މުދަލުގެ އަގުތައް ނިމިދިޔަ މަހު 6.07 ޕަސެންޓު މައްޗަށް ގޮސްފައިވާ ކަމަށް މޯލްޑިވްސް ބިއުރޯ އޮފް ސްޓެޓިސްޓިކްސްގެ ތަފާސްހިސާބުތަުކުން ދައްކައިފި އެވެ.
ސްޓެޓިސްޓިކްސް ބިއުރޯއިން އާންމުކުރި މިދިޔަ މަހުގެ އެސެންޝަލް ކޮމޮޑިޓީސް ޕްރައިސް އިންޑެކްސްއިން އެނގޭ ގޮތުގައި މިދިޔަ އަހަރުގެ ޖުލައި މަހާ އަޅައިބަލާއިރު، އެންމެ ބޮޑަށް އަގު މައްޗަށް އުފުލިފައި ވަނީ ގޭހާއި ތެލުންނެވެ. މިދިޔަ އަހަރުގެ ޖުލައި މަހާ އަޅައިބަލާއިރު ގޭހާއި ތެލުގެ އަގު މިދިޔަ މަސް ނިމުނުއިރު ހުރީ 14.54 ޕަސެންޓަށް އުފުލިފަ އެވެ.
ދެވަނައަށް އެނެްމެ ބޮޑަށް އަގު އުފުލިފައި ވަނީ ކާބޯތަކެތިންނެވެ. ކާބޯތަކެތީގެ އަގުތައް މިދިޔަ އަހަރުގެ ޖުލައި މަހާ އަޅައިބަލާއިރު ނިމިދިޔަ މަހު ވަނީ 5.89 ޕަސެންޓަށް އުފުލިފަ އެވެ. ދެން އެންމެ ބޮޑަށް އުފުލިފައި ވަނީ ދަޅާއި ފުޅި ފަދަ ބުއިންތަކުންނެވެ. މިދިޔަ އަހަރުގެ ޖުލައި މަހަށްވުރެ ނިމިދިޔަ މަހު އެ ބާވަތުގެ ސާމާނުގެ އަގު ވަނީ 5.75 ޕަސެންޓަށް އުފުލިފަ އެވެ.
ދެވަނަ ޓިކްޓޮކް ހަދައިގެންވެސް ފާޑުކިޔުންތަކުން ސައީދު ސަލާމަތެއް ނުވި
ތަކެތީގެ އަގުބޮޑުވުން ދިފާއުކުރައްވައި މިނިސްޓަރު ސައީދު އާންމުކުރެއްވި ވީޑިއޯތަކަށް އާންމުންގެ ބޮޑެތި ފާޑުކިޔުންތަކެއް ވަނީ އަމާޒުވެފައި. އާންމުން ބުނަމުންދަނީ ތަކެތީގެ އަގުބޮޑުކަން އިހުސާސްވަމުންދާ ކަމަށާއި، ކުރީ ސަރުކާރުގެ ބަހަނާ ނުދައްކައި މިހާރުގެ ދަތިތަކަށް ހައްލު ހޯދައިދޭން ޖެހޭ ކަމަށް.
މިދިޔަ އަހަރާ އަޅައިބަލާއިރު، ނިމިދިޔަ މަހުގެ އަގުތައް އުފުލިފައި ހުރި ނަމަވެސް، މިދިޔަ މަހު ވަނީ އޭގެ ކުރީ މަހަށްވުރެ 1.27 ޕަސެންޓު އިންފްލޭޝަން ރޭޓު ދަށަށް ގޮސްފަ އެވެ.
އެގޮތުން ކާބޯތަކެތީގެ އަގުތައް މިދިޔަ މަހު ޖުމްލަގޮތެއްގައި ޖޫން މަހަށްވުރެ 1.81 ޕަސެންޓު ދަށަށް ގޮސްފައިވާއިރު މީގެ ތެރޭގައި އެންމެ ބޮޑަށް އަގު ދަށަށް ގޮސްފައިވަނީ ތަރުކާރީ އާއި މޭވާގެ ބާވަތްތަކުންނެވެ.
ބާޒާރުގައި ތަރުކާރީގެ އަގު މިދިޔަ މަހު ވަނީ އޭގެ ކުރީ މަހަށްވުރެ 10.89 ދަށަށް ގޮސްފަ އެވެ. އަދި، މޭވާގެ އަގު ވަނީ %1.42 ދަށަށް ގޮސްފަ އެވެ. ނަމަވެސް ކިރާއި ބިހުގެ އަގު އެ މުއްދަތުގައި ވަނީ 0.95 ޕަސެންޓު އަދި ކައްކަން ބޭނުންކުރާ ތެލުގެ އަގު 0.74 ޕަސެންޓު ވަނީ އުފުލިފަ އެވެ.
ސްޓެޓިސްޓިކްސް ބިއުރޯއިން އާންމުކުރާ ޒަރޫރީ މުދަލުގެ އަގުތަކުގެ އިންޑެކްސް ނުވަތަ އީސީޕީއައި ބިނާވަނީ އާންމު ދިރިއުޅުމުގައި ބޭނުންކުރާ 96 ބާވަތެއްގެ މުދަލުގެ މައްޗަށެވެ.
ނިމިދިޔަ އަހަރަށްވުރެ ތަކެތީގެ އަގު ބޮޑުވަމުންދާކަން ސްޓެޓިސްޓިކްސް ބިއުރޯގެ ތަފާސްހިސާބުތަކުން ހާމަވެފައި މިވަނީ ތަކެތީގެ އަގު އުފުލެމުންދާ ދިޔުން ދިފާއުކުރަން ސަރުކާރުން މަސައްކަތްތަކެއް ކުރަމުންދާ ދަނޑިވަޅެއްގަ އެވެ.
ތަކެތީގެ އަގުތައް ބޮޑުވަމުންދާ މައްސަލައިގައި ކަންބޮޑުވުން ފާާޅުކޮށް އިދިކޮޅު އެމްޑީޕީން ގެންދަނީ މުޒާހަރާއަކަށް ވެސް ތައްޔާރުވަމުންނެވެ. އެ ޕާޓީން އިއުލާނުކޮށްފައި ވަނީ އޯގަސްޓު 13، ވަނަ ދުވަހުގެރޭ މާލޭގައި އެ މުޒާހަރާ ކުރިއަށް ގެންދާނެ ކަމަށެވެ.
