ގއ. ކޮލަމާފުށި ރައްޔިތުންނާ ބައްދަލުކުރުމަށް އެ ރަށު ކައުންސިލުން ރޭ ކުރިއަށް ގެންދިޔަ ރައްޔިތުންގެ ބައްދަލުވުން ހޫނުވުމުން ބައެއް ސުވާލުތަކަށް ޖަވާބުނުދީ އެ ބައްދަލުވުން ނިންމާލައިފި އެވެ.
ގަޑިއަކަށްވުރެ ގިނައިރު ކުރިއަށް ގެންދިޔަ އެ ބައްދަލުވުމުގައި ރައްޔިތުން ކުރި ގިނަ ސުވާލުތަކަކަށް ކައުންސިލްގެ ރައީސް، މުސްއަދު ސައީދު އެކަށީގެންވާ ޖަވާބު ނުދެއްވާ ކަމަށް ބުނެ އެ ބައްދަލުމުގެ ބައިވެރިން ހިތްހަމަނުޖެހުން ފާޅުކުރަމުންދިޔަ އެވެ.
އޭގެ އިތުރުން، ރައްޔިތުންގެ ކަންބޮޑުވުން ހުރި ބައެއް މައްސަލަތަކުގައި، ކައުންސިލްގެ އެހެން މެންބަރުންނާ މަޝްވަރާ ނުކުރާ ކަމަށް އެ ކައުންސިލްގެ ނައިބުރައީސް، ޝަހާމަތު ހަނީފް ވެސް އެ ބައްދަލުވުމުގައި ވިދާޅުވި އެވެ.
އެ ބައްދަލުވުން ނިންމައިލީ ކޮލަމާފުށީ ކައުންސިލްގެ ސެކްރެޓަރީ ޖެނެރަލް ވަކިކުރި ގޮތާ ގުޅޭ ގޮތުން އެ ރަށު ރައްޔިތުން ސުވާލު އަހަމުން ދަނިކޮށެވެ. އެ ސުވާލަށް ޖަވާބެއް ދެއްވުމުގެ ބަދަލުގައި، ކައުންސިލުގެ ރައީސް ވިދާޅުވީ ކައުންސިލް މުވައްޒަފުންގެ ޒާތީ ކަންކަމާއި ކައުންސިލްގެ ރަސްމީ މައުލޫމާތު އެ ތަނުގައި ހާމަނުކުރެވޭނެ ކަމަށެވެ.
ރައްޔިތުންގެ ސުވާލުތަކަށް އެކަށީގެންވާ ޖަވާބެއް ނުދީ ބައްދަލުވުން ނިންމައިލި ކަމަށް ބުނެ ގިނަ ބަޔަކު އެ ބައްދަލުވުމުގައި ކަންބޮޑުވުން ފާޅުކުރި އެވެ. އަދި، އޭގެފަހުން ސޯޝަލްމީޑިއާގައި ވެސް އެ ރަށު ބައެއް މީހުންގެ މެދުގައި ދަނީ އެކަމާ ގުޅޭގޮތުން ހިޔާލު ބަދަލުކުރަމުންނެވެ.
ކޮލަމާފުށީ ކައުންސިލްގެ ރައީސްއަކީ ޕީއެންސީ މެންބަރެކެވެ. އެ ރަށު ކައުންސިލްގައި ދެން ހިމެނޭ، ޝަހާމަތު އަދި، ކައުންސިލް މެންބަރު، އާމިނަތު އަބްދުﷲ އަކީ އިދިކޮޅު އެމްޑީޕީއަށް ނިސްބަތްވެވަޑައިގަންނަވާ ދެ ބޭފުޅުންނެވެ.
