ވިޔަފާރި ކުންފުނިތަކާއި މުއައްސަސާތަކުގެ މެދުގައި ދުޅަހެޔޮ ދިރިއުޅުމާއި ޓީމް ރޫހު އާލާކުރުމުގެ މަގުސަދުގައި ވީރަން މޯލްޑިވްސް އިން އިންތިޒާމުކޮށްގެން ބޭއްވި ހާއްސަ ކޯޕަރޭޓް ރަން "ބީއެމްއެލް ވީރަން - ކޯޕަރޭޓްސް" ދުވުން މިއަދު ކްރޮސްރޯޑްސް މޯލްޑިވްސްގައި ކާމިޔާބުކަމާއެކު ބާއްވައިފި އެވެ.
ކޮންމެ ޓީމެއްގައި ފަސް ދުވުންތެރިން ހިމެނޭހެން، ކޮންމެ ދުވުންތެރިއަކު އެއް ކިލޯމީޓަރު (ޖުމްލަ 5 ކިލޯމީޓަރު) ދުވަންޖެހޭ މި ރިލޭ ރޭހުގައި ފިރިހެން 11 ޓީމާއި އަންހެން 7 ޓީމުން ބައިވެރިވެފައިވެ އެވެ.
މި ދުވުމުގެ ފިނިހެނުންގެ ބައިން ޗެމްޕިއަންކަން ޓްރެކް އެންޑް ފީލްޑް އެސޯސިއޭޝަނުން ހޯދީ 19 މިނެޓު 54 ސިކުންތުން ރިލޭ ފުރިހަމަކޮށްގެންނެވެ.
މި ބައިގެ އެއްވަނަ ރަނަރއަޕް ހޯދި ރަނިންމޯޑް އެތުލެޓިކްސް ދުވުން ފުރިހަމަކުރީ 21 މިނެޓު 53 ސިކުންތުންނެވެ. 2 ވަނަ ރަނަރއަޕް ބޭންކް އޮފް މޯލްޑިވްސް އިން ހާސިލްކުރީ 22 މިނެޓު 50 ސިކުންތުން ރެލީ ފުރިހަމަކޮށްގެނެވެ.
އަންހެން ކެޓަގަރީގެ ޗެމްޕިއަން ޓީމަކީ ރަނިންމޯޑް އެތުލެޓިކްސް އެވެ. އެ ތީމުން 28 މިނެޓު 44 ސިކުންތުން ރޭސް ނިންމިއިރު، 1 ވަނަ ރަނަރއަޕް ހޯދީ ކްރޮސްރޯޑްސް އައިލެންޑް ސުޕްރިންޓާސް އެވެ. އެ ޓީމުން 43 މިނެޓު 41 ސިކުންތުން ދުވުން ނިންމި އެވެ. ދެ ވަނަ ރަނަރއަޕަށް ދިޔައީ އޭޑީކޭ ސައިނަޖީ އެވެ. އެ ޓީމުން ރޭސް ނިންމީ 44 މިނެޓު 29 ސިކުންތުންނެވެ.
މި ދުވުމުގެ އެއްވަނަ ޓީމަށް 20،000ރ، ދެވަނަ ޓީމަށް 15،000ރ އަދި ތިންވަނަ ޓީމަށް 10،000ރ. ދީފައިވާއިރު، ރޭސް ފުރިހަމަކުރި ދުވުންތެރިންނަށް ވަނީ ފިނިޝާ މެޑަލް ދީފަ އެވެ.
ރާއްޖޭގައި ހިންގާ ކުންފުނިތަކާއި މުއައްސަސާތަކުގެ ފުލްޓައިމް މުވައްޒަފުންނަށް ހާއްސަކޮށްގެން ބޭއްވި މި ހަރަކާތަކީ ބޭންކް އޮފް މޯލްޑިވްސް (ބީއެމްއެލް) އާއެކު ވެވުނު ދެ އަހަރު ދުވަހުގެ ޕާޓްނަޝިޕް އެއްބަސްވުމެއްގެ ދަށުން ކުރިއަށްދިޔަ ރޭހެކެވެ.
