ވިޔަފާރި ކުންފުނިތަކާއި މުއައްސަސާތަކުގެ މެދުގައި ދުޅަހެޔޮ ދިރިއުޅުމާއި ޓީމް ރޫހު އާލާކުރުމުގެ މަގުސަދުގައި ވީރަން މޯލްޑިވްސް އިން އިންތިޒާމުކޮށްގެން ބާއްވާ ހާއްސަ ކޯޕަރޭޓް ރަން "ބީއެމްއެލް ވީރަން - ކޯޕަރޭޓްސް" ގައި ބައިވެރިވުމުގެ ފުރުސަތު އަދިވެސް އެބަ އޮތެވެ.
ކްރޮސް ރޯޑުގައި އޮގަސްޓް 7، ގައި ބާއްވާ މި ދުވުމުގައި ބައިވެރިވުމުގެ ސުންގަޑިއަކީ އޮގަސްޓު 4، އެވެ. މިއީ ކޮންމެ ޓީމެއްގައި ފަސް ދުވުންތެރިން ހިމެނޭ، އަދި ކޮންމެ ދުވުންތެރިއަކު އެއް ކިލޯމީޓަރު ދުވަންޖެހޭ (ޖުމްލަ 5 ކިލޯމީޓަރުގެ) ރިލޭ ރޭހެކެވެ.
ރާއްޖޭގައި ހިންގާ ކުންފުނިތަކާއި މުއައްސަސާތަކުގެ އިތުރުން ޖަމިއްޔާ ޖަމާއަތްތަކަށް ހާއްސަކޮށްގެން ބާއްވާ މި ރޭހުގައި އަންހެން އަދި ފިރިހެން ކެޓަގަރީ ހިމެނެ އެވެ. ކޮންމެ ޓީމެއްގައިވެސް ތިބެންޖެހޭނީ އެ ކުންފުންޏެއްގެ ފުލްޓައިމް މުވައްޒަފުންނެވެ.
"މިހާރު ވެސް ކުންފުނިތަކުން ދަނީ ބައިވެރިވަމުން. މިއީ ރާއްޖޭގައި އަލަށް ބާއްވާ މިފަދަ ފުރަތަމަ ރިލޭ. އަދިވެސް ބައިވެރިވުމުގެ ފުރުސަތު އެބަ އޮތް،" ވީރަންގެ މެނޭޖިން ޑިރެކްޓަރު ޒިނާން ވިދާޅުވި އެވެ.
އަންހެން އަދި ފިރިހެން ދެ ކެޓަގަރީންވެސް އެންމެ މޮޅު ތިން ޓީމަށް ފައިސާގެ އިނާމާއި ތަށި ދިނުމަށް ވަނީ ހަމަޖެހިފަ އެވެ.
ދުވުމުގެ އެއްވަނަ ޓީމަށް 20،000ރ. ދިނުމަށް ހަމަޖެހިފައިވާއިރު، ދެވަނަ ޓީމަށް 15،000ރ. އަދި ތިންވަނަ ޓީމަށް 10،000ރ. ދިނުމަށް ވަނީ ހަމަޖެހިފަ އެވެ. އޭގެއިތުރުން ރޭސް ފުރިހަމަކުރާ ކޮންމެ ދުވުންތެރިޔަކަށް ފިނިޝާ މެޑަލްއެއް ދިނުމަށް ވެސް ވަނީ ހަމަޖެހިފަ އެވެ.
މި ރޭހަކީ ކުޅިވަރުގެ ވާދަވެރިކަމާއެކު ކޯޕަރޭޓް އިޖުތިމާއީ ގުޅުން ބަދަހިކޮށް، މަސައްކަތުގެ މާހައުލުގައި ދުޅަހެޔޮކަން އިތުރުކުރުމަށް ލިބިގެންދާނެ ރަނގަޅު ފުރުސަތެކެވެ.
މި ހަރަކާތް ކުރިއަށް ދާނީ ބޭންކް އޮފް މޯލްޑިވްސް (ބީއެމްއެލް) އާއެކު ވެވުނު ދެ އަހަރު ދުވަހުގެ ޕާޓްނަޝިޕް އެއްބަސްވުމެއްގެ ދަށުންނެވެ.
