ސިންގަޕޫރުގެ އާއިލާއަކުން މިދިޔަ ހަފުތާގައި ގެއަށް ބޭނުންވާ ކާބޯތަކެތި ގަނެގެން އާދަޔާ ހިލާފު ކަމަކާ ކުރިމަތިވި އެވެ. އެ އާއިލާއިން ގަތް ބިސް ކާޓަންގެ ތެރޭގައި އާންމުކޮށް ހުންނަ ކުުކުޅުބިހުގެ ބަދަލުގައި، ވަރަށް މަދުން ނޫނީ ނުފެންނަ ފުރިހަމަ ވަށް ބުރެއްގެ ބައްޓަމަށް އޮތް ބިހެއް ފެނުނެވެ.
އުމުރުން 42 އަހަރުގެ ވިރާޖް ސުވަރޫޕް އާއި އޭނާގެ އަންހެނުން ޝަރްމިސްތާ ނަގަރްކައްޓީ ބުނި ގޮތުގައި، މި ހޯދުމާއެކު އެމީހުން ތިބީ ވަރަށް ބޮޑަށް ހައިރާންވެފައި އަދި އުފާވެފަ އެވެ. އަދި އުމުރުން އަށް އަހަރާއި 11 އަހަރުގެ އެމީހުންގެ ދެ ދަރިން ވެސް މި އާދަޔާ ހިލާފު ބިސް ފެނުމުން ތިބީ ވަރަށް މަޖާވެފައި ކަމަށް އެ މީހުން ބުންޏެވެ.
މި އާއިލާއިން "ޗިއުސް އެގްރިކަލްޗާ" ބްރޭންޑުގެ ބިސް ކާޓަން ގަނެފައިވަނީ މެއި 27 ވަނަ ދުވަހު ހޯގަންގް 1 މޯލްގައި ހުންނަ ފެއާޕްރައިސް އައުޓްލެޓަކުންނެވެ. ޗިއުސް އެގްރިކަލްޗާ އަކީ ސިންގަޕޫރުގައި ކުކުޅުބިސް އުފައްދާ ކުންފުންޏެކެވެ.
މި ބިސް ކާޓަންގެ ތެރެއިން ވަށް ބިސް ފުރަތަމަ ފެނުނީ އެ ދުވަހުގެ ފަހުގެ ވަގުތެއްގައި ވިރާޖްގެ މަންމަ، އުމުރުން 67 އަހަރުގެ ރަޖްނީ ލީލާ ކުމާރަށެވެ.
ވިރާޖް ބުނި ގޮތުގައި، އެމީހުންގެ އަތުގައި އެ އޮތީ އެހާ އަގުބޮޑުވެދާނެ އެއްޗެއްކަން ފުރަތަމަ އެ އާއިލާއަށް ނޭނގެ އެވެ. ނަމަވެސް ޖެހިގެން އައި ދުވަހު ޝަރްމިސްތާ ގޫގުލް މެދުވެރިކޮށް ހޯދި ހޯދުންތަކުން އެއީ ވަރަށް މަދުން ނޫނީ ނުފެންނަ އެއްޗެއްކަން އެނގުނެވެ.
ބިލިއަނަކުން އެކެއްގެ ނިސްބަތުން ފެންނަ މިފަދަ ވަށް ބިސްތަކަކީ މީގެ ކުރިން ވެސް އެ ތަކެތީގެ ނާދިރުކަމުގެ ސަބަބުން ނީލަން ކިޔައިގެން ވިއްކާފައިވާ ތަކެއްޗެވެ. ބީބީސީން ރިޕޯޓްކޮށްފައިވާ ގޮތުގައި، 2025 ވަނަ އަހަރު އިނގިރޭސިވިލާތުން ފެނުނު ވަށް ބިހެއް 420 ޕައުންޑް (723 ސިންގަޕޫރު ޑޮލަރު) އަށް ވިއްކާލާފައިވާއިރު، އެ ފައިސާ ހަދިޔާކުރީ ޗެރިޓީއަށެވެ. އަދި 2024 ވަނަ އަހަރު ވެސް މިފަދަ ވަށް ބިހެއް 200 ޕައުންޑަށް ނީލަމުގައި ވިއްކާލާފައިވެ އެވެ.
"އަހަރެންގެ އަންހެނުން ޝަމްސް އެކަން ހުއްޓުވީ. ނޫންނަމަ އަހަރެމެން އެ ބިސް ކައްކާލީސް،" ވިރާޖް ބުންޏެވެ.
އޭނާ އިތުރަށް ބުނި ގޮތުގައި، މިހާރު އެ ބިސް އޮތީ ފްރިޖްގެ އެންމެ އެތެރޭގައި ރައްކާތެރިކަމާއެކު ބާއްވާފަ އެވެ. އަދި އެއްވެސް މީހަކަށް އެ ބިހުގައި އަތްލުމުގެ ހުއްދައެއް ނޯވެ އެވެ.
"ކުކުޅެއް އޭގެ ބިސް ހިމާޔަތްކުރާ ފަދައިން އަހަރެމެން މި އަންނަނީ އެ ބިސް ބަލަހައްޓަމުން،" ވިރާޖް ބުންޏެވެ.
ވިރާޖް ބުނީ އެކަށީގެންވާ އަގެއް ލިބޭނަމަ، އެ ބިސް ގަންނަން ބޭނުންވާ ކަލެކްޓަރަކަށް ވިއްކާލަން އާއިލާއިން ބޭނުންވާ ކަމަށެވެ. ނަމަވެސް އެ ބިސް ވިއްކާނެ ވަކި އަގެއް އޭނާ ހާމައެއް ނުކުރެ އެވެ.
ޖުމްލަ 3.75 ޑޮލަރަށް ގަތް 10 ބިހުގެ މި ކާޓަންގެ ބޭރުގައިވާ ތާރީހަށް ބަލާއިރު، އެ ބިސްތައް ބޭނުންކުރުމުގެ އެންމެ ފަހު ތާރީހަކީ ޖޫން 29 އެވެ.
