ގަރުނަކުން އެއް ފަހަރު ފެންނަ ރީތި ދޫންޏެއް އިންޑޮނޭޝިއާއިން ފެނިއްޖެ

Jun 6, 2026, 11:42 PM
ބްލޫ-ފްރަންޓެޑް ލޮރިކީޓް. -- ފޮޓޯ: ރޮއިޓާސް

ބްލޫ-ފްރަންޓެޑް ލޮރިކީޓް. -- ފޮޓޯ: ރޮއިޓާސް

"ބްލޫ-ފްރަންޓެޑް ލޮރިކީޓް" އަކީ ވޭތުވެދިޔަ ގަރުނެއްހާ ދުވަހުގެ ތެރޭގައި އިންޑޮނޭޝިއާގައި އެންމެ މަދުން ފެންނަ އެއް ދޫންޏެވެ. މި ދޫނި ދުނިޔެއިން މުޅިން ނެތިގޮސްފައި ނުވާނެ ކަމުގެ އުންމީދުގައި ތިއްބާ، އެންމެ ފަހުން މި ދޫނި ފެނިފައިވަނީ 2014 ވަނަ އަހަރު ނަގާފައިވާ ފޮޓޯއަކުންނާއި މިއުޒިއަމްތަކުގައި ހުރި މަދު ސާމްޕަލްތަކަކުން އެކަންޏެވެ. ނަމަވެސް، ފަރުބަދަމަތީ ސަރަހައްދުތަކުގައި ދުވަސްތަކެއް ވަންދެން ދަތުރުކުރުމަށް ފަހު، ބުރު އައިލެންޑްގެ އެންމެ އުސް ފަރުބަދައިގެ މަތިން ފެނުނު ފެހިކުލައިގެ ފިޔަތަކުން، ކުލަގަދަ މި ރީތި ގުރާ އަދިވެސް ދުނިޔޭގައި އުޅޭކަން ވަނީ ކަށަވަރުވެފަ އެވެ.

އިންޑޮނޭޝިއާގެ ބުރު އައިލެންޑަށް އެކަނި ޚާއްސަ، ނުވަތަ ދުނިޔޭގެ އެހެން އެއްވެސް ތަނަކުން ނުފެންނަ މި ކުޑަ ދޫނި ފެނިފައިވަނީ އިންޑޮނޭޝިއާގެ ފަރުބަދައަށް އަރާ ގްރޫޕަކުން މިދިޔަ އޭޕްރީލް މަހު ކުރި ދަތުރެއްގަ އެވެ. މިއީ ވޭތުވެދިޔަ 12 އަހަރުގެ ތެރޭގައި މި ދޫނީގެ ފޮޓޯއެއް ނެގުނު ފުރަތަމަ ފަހަރެވެ. މީގެ އިތުރުން، ޖަންގަލީގެ ގަސްތަކުގެ މަތީގައި އުޅޭއިރު އެއް ދޫނި އަނެއް ދޫންޏާ މުއާމަލާތް ކުރުމަށް ބޭނުންކުރާ ތޫނު އަޑުތައް ވެސް މި ޓީމުން ވަނީ ފުރަތަމަ ފަހަރަށް ރެކޯޑްކޮށްފަ އެވެ.

މި ދޫނި ދެނެގަތުމަށް ޓީމަށް އެހީތެރިވެދިނީ އޭގެ ހަށިގަނޑުގައި ހުރި ގަދަ ފެހިކުލައާއި، އޮރެންޖު ކުލައިގެ ތުންގަނޑާއި، ބޮލުގެ ފަހަތުގައި ހުރި ނޫކުލައިގެ ތާޖެއް ފަދަ ބަޔާއި، އޭގެ ނަގޫފަތެވެ.

Advertisement

މި ޓީމުން ދަތުރުކުރީ ހަމައެކަނި މި ބާވަތުގެ ދޫނި ހޯދުމުގެ މަގްސަދުގަ އެވެ. ނަމަވެސް އެ ދޫނި ފެނުމުގެ ފުރުސަތު އޮތީ ވަރަށް ކުޑަކޮށެވެ.

"ވޭތުވެދިޔަ ގަރުނެއްހާ ދުވަހުގެ ތެރޭގައި އެންމެ ފަހަރަކު ފެނިފައިވާ ދޫންޏެއް ހޯދަން އުޅުމަކީ ކާމިޔާބުވުން ވަރަށް ދުރު ކަމެއްގެ ގޮތުގައި އިހުސާސްކުރެވުނު،" އެމެރިކަން ބާޑް ކޮންސަވަންސީގެ 'ސާޗް ފޯ ލޮސްޓް ބާޑްސް' ގެ ޑައިރެކްޓަރު ޖޯން މިޓަމަޔާ ވިދާޅުވި އެވެ.

ފުރަތަމަ ފަހަރަށް 1920 ގެ އަހަރުތަކުގައި ހޯދި ހަތް ސާމްޕަލަކުން ދެނެގަނެވުނު "ބްލޫ-ފްރަންޓެޑް ލޮރިކީޓް" އަކީ އިންޑޮނޭޝިއާގެ ދޫނިތަކުގެ ތެރެއިން ހޯދަން އެންމެ އުނދަގޫވެފައިވާ ދޫންޏެވެ. 2014 ވަނަ އަހަރު ފޮޓޯއެއް ނެގުމާ ހަމައަށް ގާތްގަނޑަކަށް 90 އަހަރު ވަންދެން މި ދޫނީގެ އެއްވެސް ނިޝާނެއް ފެނިފައެއް ނުވެ އެވެ.

މި ގުރާ މުޅިން ނެތިގެން ނުދާ ކަމަށާއި، ނަމަވެސް މީގެ ކުރިން މީހުން ހޯދި އުސްމިނަށް ވުރެ މާ މަތީ ފަރުބަދަތަކުގައި އުޅެނީ ކަމަށް ގިނަ ބަޔަކު ގަބޫލުކުރެ އެވެ. މި ދޫނި ފެނުނު އުސް ސަރަހައްދަކީ، ދާދި ފަހުން އެ ސަރަހައްދުގެ ފަރުބަދައަށް އަރާ މީހުން އެތަނަށް ދެވޭނެ މަގެއް ހޯދުމާ ހަމައަށް، މީހުންނަށް ނުދެވޭ ފަދަ އުނދަގޫ ސަރަހައްދެކެވެ.

"އެ ރަށުގައި މި ލޮރިކީޓްތަކާ ވައްތަރު އެހެން އެއްވެސް ދޫންޏެއް ނޫޅޭ. އެހެންކަމުން އެ ދޫނިތައް ފެނުމާއެކު އެއީ ކޮން އެއްޗެއްކަން ވަގުތުން އެނގުނު،" މިޓަމަޔާ ވިދާޅުވި އެވެ.

މިޓަމަޔާ އިތުރަށް ވިދާޅުވީ، އެ ދަތުރުގައި މަދުވެގެން ނުވަ ދޫނި ފެނިފައިވާ ކަމަށެވެ.

"ބްލޫ-ފްރަންޓެޑް ލޮރިކީޓް" އަކީ އައި.ޔޫ.ސީ.އެން ރެޑް ލިސްޓުގައި އެކަށީގެންވާ މައުލޫމާތު ނެތް ދޫންޏެއްގެ ގޮތުގައި ހިމަނާފައިވާ ދޫންޏެކެވެ. އަދި 2024 ވަނަ އަހަރު، އެމެރިކަން ބާޑް ކޮންސަވަންސީ އާއި، ރީ:ވައިލްޑް އަދި ބާޑްލައިފް އިންޓަނޭޝަނަލް ގުޅިގެން ހިންގާ 'ސާޗް ފޯ ލޮސްޓް ބާޑްސް' އިން ވަނީ މިއީ ގެއްލިފައިވާ ދޫންޏެއްގެ ގޮތުގައި ކަނޑައަޅާފަ އެވެ.

މިޓަމަޔާ ވިދާޅުވީ، މި ދޫނީގެ އާބާދީގެ މިންވަރާއި އެ ދޫނިތަކަށް ހުރި ނުރައްކާތައް ދެނެގަތުމަށް އިތުރު މަސައްކަތްތަކެއް ކުރަންޖެހޭ ކަމަށެވެ.

"މިފަދަ ހޯދުމަކީ އެ ދޫނިތައް ހިމާޔަތްކުރުމަށް އެޅޭ ފުރަތަމަ ފިޔަވަޅު،" މިޓަމަޔާ ވިދާޅުވި އެވެ.

ކޮމެންޓް

ފަހުގެ ޚަބަރު

އުމުރުން 70 އަށް ދުޅަހެޔޮކޮށް ދިއުމަށް ސައިންސްވެރިން އިރުޝާދު

އުމުރުން 30 ގެ އަހަރުތަކަކީ ހަށިގަނޑަށް ބަދަލުތައް އަންނަ ދުވަސްވަރަކަށް ވުމުން، މި އުމުރުގައި ކަސްރަތުކުރުމާއި ނިދުމުގެ އާދަތައް ރަނގަޅުކުރުމަކީ އުމުރުން ދުވަސްވާއިރު ދުޅަހެޔޮކަންމަތީ ހުރުމަށް އެޅޭ މުހިންމު ފިޔަވަޅެކެވެ. މީގެ އިތުރުން، އަނގަޔާއި ދަތްތަކުގެ ސިއްހަތަށް ސަމާލުކަން ދިނުމާއި ނުރަނގަޅު އާދަތަކާ ދުރުހެލިވުމަކީ މުސްކުޅިވުމުން ކުރިމަތިވާ ބަލިތަކުން ރައްކާތެރިކޮށްދީ އުމުރު ދިގުކޮށްދޭނެ ކަންކަމެވެ.

ޖީޓީއޭ 6 ރެކޯޑް މާކްސްއަކާއެކު ނެރެފި

ތޭރަ އަހަރުގެ ދިގު އިންތިޒާރަކަށްފަހު ނެރުނު ޖީޓީއޭ 6 އަށް ރެކޯޑް މާކްސްއެއް ލިބި، ގޭމިން ދާއިރާއަށް އިންގިލާބީ ބަދަލެއް ގެނުވައިފިއެވެ. މި ގޭމުގެ ގްރެފިކްސް އާއި ވާހަކަ ކިޔައިދޭ ގޮތް ފުރިހަމަވުމުގެ އިތުރުން، މިއީ މި ސިލްސިލާގައި އަންހެން ކެރެކްޓަރަކަށް މައިގަނޑު ދައުރެއް ދިން ފުރަތަމަ ފަހަރެވެ.

މަސް ނުކައިވެސް ހަށިގަނޑަށް ބޭނުންވާ ދަގަނޑު ހޯދިދާނެ!

މަހުގެ ބާވަތްތަކުގެ އިތުރުން ފަތްޕިލާވެއްޔާއި ގޮވާމުގެ ބާވަތްތަކުން ވެސް ހަށިގަނޑަށް ބޭނުންވާ ދަގަނޑުގެ މާއްދާ ހޯދިދާނެކަން ސިއްހީ މާހިރުން ފާހަގަކުރެއެވެ. މިގޮތުން ކާނާ ތައްޔާރުކުރާ ގޮތަށް ބަދަލު ގެނައުމާއި، ވިޓަމިން ސީ އެކުލެވޭ ތަކެއްޗާއެކު ކެއުމަކީ ގަސްގަހާގެހިން ލިބޭ ދަގަނޑު ހަށިގަނޑަށް ދަމައިގަންނަ މިންވަރު އިތުރުކޮށްދޭނެ ކަންކަމެވެ.

އާ ޖޭމްސް ބޮންޑަކަށް ރޮބަޓް ޕެޓިންސަން

ޖޭމްސް ބޮންޑުގެ ރޯލު ކުޅޭނެ އާ އެކްޓަރަކަށް އިނގިރޭސި އެކްޓަރު ރޮބަޓް ޕެޓިންސަން ހަމަޖައްސައި، 2028 ވަނަ އަހަރު ރިލީޒްކުރާ ބޮންޑު ސިލްސިލާގެ 26 ވަނަ ފިލްމު ޑެނިސް ވިލެނޫވް ޑައިރެކްޓްކުރާ ގޮތަށް އެމެޒޯން އެމްޖީއެމް އިން ވަނީ އިއުލާންކޮށްފައެވެ. މި ރޯލު ލިބުމަކީ ބޮޑު ޝަރަފެއް ކަމަށް ޕެޓިންސަން ބުނެފައިވާއިރު، މިއީ ޑެނިއަލް ކްރެއިގަށް ފަހު މި މަޝްހޫރު ޖާސޫސީ ރޯލުން ފެންނާނެ ހަތްވަނަ އެކްޓަރެވެ.

އަނދިރީގައި ފެންވެރުން ނިދި އައުން ފަސޭހަވޭތަ؟

ނިދުމުގެ ކުރިން އަނދިރީގައި ފެންވެރުމަކީ ހަށިގަނޑުން މެލަޓޯނިން އުފައްދައިދީ، ސިކުނޑި ހަމަޖައްސައިދީ އަވަހަށް ނިދި އައުމަށް އެހީތެރިވެދޭ ކަމެއް ކަމަށް ސިއްހީ މާހިރުން ބުނެއެވެ. މިގޮތަށް ފެންވެރުމުން ހަށިގަނޑުގެ ފިނިހޫނުމިން ދަށްވެ، ދުވަހުގެ ސްޓްރެސް ކުޑަކޮށްދީ ނަފްސާނީ ގޮތުން އަރާމު ލިބިގެންދެއެވެ. ނަމަވެސް މިއީ ނިދުމުގެ ބޮޑެތި ބަލިތަކަށް އޮތް ދާއިމީ ހައްލެއް ނޫންކަމަށް މާހިރުން ފާހަގަކުރެއެވެ.

ޕްރޮސްޓޭޓް ކެންސަރަށް ގަވާއިދުން ސްކްރީން ކުރަން ބުނެފި

ޕްރޮސްޓޭޓް ކެންސަރު ޖެހޭ މިންވަރު އިތުރުވަމުންދާތީ، އެމެރިކަން ކެންސަރ ސޮސައިޓީން ވަނީ އުމުރުން 50 އަހަރާއި 69 އަހަރާ ދެމެދުގެ ފިރިހެނުން ގަވާއިދުން ސްކްރީން ކުރުމަށް އާ އިރުޝާދުތަކެއް ނެރެފައެވެ. މި ބަދަލުގެ ދަށުން ބަލީގެ ނުރައްކާ ބޮޑު މީހުން އުމުރުން 45 އަހަރުން ފެށިގެން ކޮންމެ އަހަރަކު ޓެސްޓުކުރަން ލަފާދީފައިވާއިރު، މީގެ މަގުސަދަކީ ބަލި ކުރީކޮޅު ދެނެގަނެ މަރުވާ މިންވަރު މަދުކުރުމެވެ.

ޓޭލާ ސުވިފްޓަކީ ފޭކު ސަޕޯޓަރެއް ކަމަށް ކުޅުންތެރިން ބުނެފި

ނިއުޔޯކް ނިކްސްގެ ބައެއް ކުޅުންތެރިން ޓޭލާ ސުވިފްޓަކީ ދެއްކުންތެރިކަމަށް މެޗުތަކަށް އަންނަ "ފޭކު" ސަޕޯޓަރެއް ކަމަށް ބުނުމުން، އެ ޓީމުން އޭނާގެ ދިފާއުގައި ވާހަކަދައްކައިފިއެވެ. ޓީމުގެ ތަރުޖަމާނު ވަނީ ސުވިފްޓަކީ ގިނަ ދުވަސްތަކެއް ވަންދެން ޓީމަށް ސަޕޯޓްކުރާ ވަފާތެރިއެއްކަން ފާހަގަކޮށް، ކުޅުންތެރިންގެ ވާހަކަތައް ދޮގުކޮށްފައެވެ.

Newsletter

Get the latest news delivered straight to your inbox