އޮސްޓްރޭޭލިއާ އާއެކު ގިނަ ދާއިރާތަކަކުން ގުޅުން ބަދަހިކުރުމަށް ދިވެހި ސަރުކާރުން މަތީ ފަންތީގެ އޮފިޝަލުންގެ މެދުގައި ކުރިއަށްގެންދިޔަ މަޝްވަރާތައް ނިންމާލައިފި އެވެ.
މާލެ ސިޓީގައި ކުރިއަށްދިޔަ މި މަޝްވަރާތަކުގައި ރާއްޖޭގެ ފަރާތުން އިސްކޮށް ހުންނެވީ ފޮރިން ސެކްރެޓަރީ ފާތިމަތު އިނާޔާ އެވެ. އޮސްޓްރޭލިއާ ސަރުކާރުގެ ވަފްދުގެ އެންމެ އިސް އޮފިޝަލަކަށް ހުންނެވީ އެ ގައުމުގެ ޑިޕާޓްމަންޓު އޮފް ފޮރިން އެފެއާޒް އެންޑް ޓްރޭޑުގެ ފަސްޓް އެސިސްޓަންޓް ސެކްރެޓަރީ ސާރާ ސްޓޯރީ އެވެ.
ދެ ގައުމުގެ އެކި މިނިސްޓްރީތަކުގެ އިސް އޮފިޝަލުން ވެސް ބައިވެރިވި މި ބައްދަލުވުމުގައި ވަނީ ދެ ގައުމުގެ މެދުގައި މިހާރު ވެސް އޮތް ގުޅުން އިތުރަށް ބަދަހިކޮށް އެއްބާރުލުން އިތުރުކުރުމަށް އެއްބަސްވެފަ އެވެ.
"ދިފާއީ، ސެކިއުރިޓީ އަދި ކަނޑުތަކުގެ ސަލާމަތްތެރިކަމުގެ ދާއިރާއިން ގުޅުން ބަދަހިކުރުމާއި، އިގުތިސޯދީ، ވިޔަފާރި އަދި ފަތުރުވެރިކަމުގެ ދާއިރާއިން އެއްބާރުލުން ދިނުމާއި، ތަރައްގީގެ ދާއިރާއިން އެއްބާރުލުން ދިނުމާއި، ސަރަހައްދީ ކަންކަމާއި، ބައިނަލްއަގުވާމީ ޖަމިއްޔާ ޖަމާއަތްތަކުގައި އެއްބާރުލުން ދިނުމަށް ވެސް މަޝްވަރާ ކުރެވުނު،" ފޮރިން މިނިސްޓްރީން ބުނެފައިވެ އެވެ.
ގައުމީ އެއާލައިން، މޯލްޑިވިއަނުން އަންނަނީ އޮސްޓްރޭލިއާގެ މެލަބަންއަށް ސީޒަނަލް ދަތުރުތަކެއް ކުރަމުންނެވެ. މިއީ ދެ ގައުމުގެ މެދުގައި ސީދާ ވައިގެ މަގުން ގުޅާލި ފުރަތަމަ ފަހަރެވެ. އަދި އޮސްޓްރޭލިއާގެ ސަރުކާރުން ވަނީ މިފަހުން ރާއްޖޭގެ އަސްކަރިއްޔާއަށް ގާޑިއަން ކްލާސް ޕެޓްރޯލް ބޯޓެއް ހަދިޔާކޮށްފަ އެވެ.
