އޮސްޓްރޭލިއާގެ ބޭންޑު "ބިޔޯން އަގެއިން" ގެ ޝޯ މި އަންނަ ބުރާސްފަތި ދުވަހުގެ ރޭ ސޯޝަލް ސެންޓަރުގައި ބާއްވަން ހުރިހާ ތައްޔާރީތަކެއް ވެފައި އޮއްވާ ޝޯ ބާއްވާ ތަން ބަދަލުކުރަން ޔޫތު މިނިސްޓްރީ އެންގިޔަސް އެއީ އޮޕްޝަނެއް ނޫން ކަމަށާއި ޝޯ ކެންސަލްކުރަން ޖެހުމުން ފޫނުބެއްދޭވަރުގެ ގެއްލުމެއް ލިބިފައިވާ ކަމަށް އޫބާ އިވެންޓްސް އެންޑް އާޓިސްޓްސް އިން މިއަދު ބުނެފި އެވެ.
އޫބާ އިވެންޓްސްގެ ޑައިރެކްޓަރު އުމަރު ޒިޔާދު (ޑީޖޭ އުމަރު) އަދަދު އަށް ވިދާޅުވީ އެތައް މަހެއް ކުރިން ސޯޝަލް ސެންޓަރު ނައިގެން އެތަނަށް ބޭސްކޮށް ތިން ކެޓަގަރީއަކުން ޓިކެޓު ވިއްކައި ނިންމައި ތަންވެސް ގާތްގަނޑަކަށް ތައްޔާރުކޮށް ނިމުނުތަނާ ތަން ބަދަލުކުރަން އެންގުމަކީ އޮޕްޝަނެއް ނޫން ކަށެވެ.
"މިއީ މަންތުސް އަ ހެޑް އެގްރީވެފައި އޮތް އެއްޗެއް އެނގޭތޯ. އެ ވަގުތުގައި އަޅުގަނޑު ހަމައެކަނި ބުނީ އަޅުގަނޑަށް ތިން ކެޓަގަރީ ޓިކެޓު ވިއްކޭ ގޮތަށް އަނެއް ވެނިއު މާލެއިން ހަމަޖައްސަދޭށޭ. ނޫނީ ހުޅުމާލެއިން ހަމަޖައްސަދޭށޭ. މި އިވެންޓް ބާއްވާނަމޭ. އެހެންވީމަ އޭތި ނުދެވެންޏާ ނުބޭއްވުނީ ނޫންތޯ،" އުމަރު ވިދާޅުވި އެވެ.
"އެބޭފުޅުން އޮޕްޝަނެއް ނޫން ދިނީ. ހިޔާލެއް ދިނީ. ފޭދޫ ފިނޮޅުގައި ބާއްވާލަންވީ ނޫންހެއްޔޭ. ކްރޮސް ރޯޑުގައި ކިހިނެއް ހެއްޔޭވާނީ. އަޅުގަނޑުމެން ސޯޝަލް ސެންޓަރު ނެގައިގެން މިދިޔައީ އޮޕްޝަނެއް ނެތީމަ. އެހެން ނޫނިއްޔާ ސޯޝަލް ސެންޓަރެއް ނުނަގާނެ ނޫންތޯ."
އުމަރު ވިދާޅުވީ ފަހުވަގުތު ގްރޭޓާ މާލެ ސަރަހައްދުން ބޭރުގައި އިވެންޓް ބާއްވަން ހިޔާލުތަކެއް ދިން ނަމަވެސް، އެއީ އިވެންޓަށް ކުޑަތަންވެފައި އޮއްވާ ކުރެވޭނެ ކަމެއް ނޫން ކަމަށެވެ. އޭނާ ވިދާޅުވީ އިންޑޯގައި ޝޯ ބާއްވަން ނިންމީ ވިއްސާރަ ދުވަސްވަރަކަށްވާތީ ކަމަށާއި ރަށުން ބޭރުގައި އިވެންޓް ބާއްވާނަމަ ދަތުރުފަތުރަށް ވެސް ދަތިތައް ދިމާވާނެ ކަމަށެވެ.
ޝޯއަށް ވިއްކި ޓިކެޓުގެ ތަފްސީލް:
- ސްޓޭންޑިން ޓިކެޓް - 490ރ.
- ބްލީޗާސް / ސިޑިބަރި - 990ރ.
- ގޮނޑި - 1310ރ.
މި ޝޯއަށް ޖުމްލަ 1،800 ޓިކެޓު ވިއްކަން މަސައްކަތްކުރިއިރު އޭގެ ތެރެއިން 1،000 ޓިކެޓު ވިކި ހުސްވެފައިކަން އުމަރު ފާހަގަކުރެއްވި އެވެ. އޭގެތެރެއިން ބާކީ ޓިކެޓުތައް ފަހު ދުވަސްތަކުގައި ވިއްކަން އޮތީ ރޭވިފައި ކަމަށް ވެސް އޭނާ ވިދާޅުވި އެވެ.
އުމަރު ވިދާޅުވީ އަބާގެ މިއުޒިކަކީ މިހާރުގެ ކުޑަކުދިން އެންމެ ބޮޑަށް ސެލެބްރޭޓްކުރާ މިއުޒިކުކަމަށްވާއިރު، ޝޯ ބަލަން ކުޑަކުދިން ހިމެނޭ ގޮތަށް އެތައް އާއިލާ އާއި ރައްޓެހިން ޓިކެޓު ގަނެފައިވާ ކަމަށެވެ. އެހެންކަމުން އެއީ އެންމެންނަށް ވެސް ލިބޭނެ ފޫނުބެއްދޭވަރުގެ ގެއްލުމެއް ކަމަށް އޭނާ ވިދާޅުވި އެވެ.
މީގެއިތުރުން ޝޯއަށް ރާއްޖޭގެ ބޭންޑުތަކުން ތައްޔާރުވުމުން އެމީހުންނަށްވެސް ގެއްލުންވާނެ ކަމަށާއި އެތައް މަސް ދުވަސްވަންދެން އެމީހުންވެސް ޝޯއަށް ދިޔައީ ތައްޔާރުވަމުން ކަމަށް އުމަރު ވިދާޅުވި އެވެ. އޭނާ ވިދާޅުވީ ޝޯ ބަލަން ރަށްރަށުންނާއި ރިސޯޓުތަކުން އަދި ރާއްޖެއިން ބޭރުން އަންނަން ތިބި މީހުންނަށްވެސް މިއީ ލިބުނު ވަރަށް ބޮޑު ގެއްލުމެއް ކަމަށެވެ.
ޝޯ ދޭ ބޭންޑް ރޭ ރާއްޖެ އައިސްފައިވާއިރު އެމީހުން ކައިރީގައި ޝޯ ކެންސަލްކުރަން ޖެހުނު ވާހަކަ ބުނަން ވަރަށް ލަދުގަތްކަން ފާހަގަކުރައްވާ އުމަރު ވިދާޅުވީ މިފަދަ ސަބަބަކާހުރެ ޝޯ ނުބޭއްވޭތީ އެމީހުންވެސް ތިބީ ހައިރާންވެފައި ކަމަށެވެ.
"އަޅުގަނޑު އެމީހުން ރިސީވްކުރިން ރޭގައި. އެމީހުން ރާއްޖޭގައި ތިބީ އެނގޭތޯ. އަޅުގަނޑު ހަމަ ވަރަށް ލަދުގަތް އެމީހުން ކުރިމަތީގައި މި ސަބަބާހުރެ. ރޭގައި މަތިންދާ ބޯޓަށް އެރިއިރު ޝޯ އޮވޭ. އެކަމަކު މިކޮޅަށް އައިސް ޖެއްސިއިރު ޝޯއެއް ނެތް. ފޯ މަންތުސް މިވަނީ އެނގޭތޯ ކޮމިއުނިކޭޝަން އެމީހުންނާ ކުރާތާ. އެމީހުންގެ ހުރިހާ ރިކުއާމަންޓަކާ މީޓްކުރަމުން،" އުމަރު ވިދާޅުވި އެވެ.
ޝޯ ކެންސަލްކުރަން ޖެހުމުން މާލީ ގޮތުން ވެސް ބޮޑު ގެއްލުންވިކަން އުމަރު ފާހަގަކުރެއްވި އެވެ. އެނާ ވިދާޅުވީ މި އިންޑަސްޓްރީގައި މިހާ ދުވަހު މަސައްކަތްކޮށްފައިވާއިރު މިއީ ކުންފުންޏަށްވެސް ލިބުނު ފޫނުބެއްދޭވަރުގެ ގެއްލުމެއް ކަމަށެވެ.
"ބިޔޯން އަގެއިން" ބޭންޑަކީ 1970 ގެ އަހަރުތަކުގެ ތެރޭ މަޝްހޫރުވި ސްވިޑެންގެ "އެބާ" ބޭންޑުގެ ލަވަތައް ކަވަރުކުރާ ޓްރިބިއުޓް ބޭންޑެކެވެ. އެ ބޭންޑުން ވަނީ ފާއިތުވި އަހަރުތަކުގައި ދުނިޔޭގެ 72 ގައުމެއްގައި 5،300 އަށްވުރެ ގިނަ ޝޯ ދީފަ އެވެ.
