ދިވެހިރާއްޖޭގެ ޖިނާއީ އަދުލުގެ ނިޒާމު އިސްލާހުކޮށް، އާ ގާނޫނުލްއުގޫބާތެއް އެކުލަވައިލުމުގެ މަސައްކަތް ފެށިތާ 20 އަހަރު ފުރުން ފާހަގަކުރުމުގެ ގޮތުން މޯލްޑިވްސް ލޯ އިންސްޓިޓިއުޓުން ހާއްސަ ސެމިނާއެއް ބާއްވަން ނިންމައިފި އެވެ.
ޔޫއެންޑީޕިއާ ގުޅިގެން ބާއްވާ "ގާނޫނުލްއުގޫބާތަށް ވިހި އަހަރު: އުންމީދުތަކާއި، ކުރިއެރުންތަކާއި ގޮންޖެހުންތައް" ސެމިނާ އޮންނާނީ ޖުލައި 29، ގައި ވިލާ ކޮލެޖުގެ އޯޝަން ވިއު ހޯލުގަ އެވެ.
އެ ސެމިނާގައި ގާނޫނުލްއުގޫބާތު އެކުލަވައިލުމަށް ކުރެވުނު މަސައްކަތްތަކާއި، އެ ގާނޫނު ފާސްކުރުމަށްފަހު ފާއިތުވި ދިހަ އަހަރު ދުވަހުގެ ތެރޭގައި އައިސްފައިވާ ބަދަލުތަކާއި ތަރައްގީއަށް ފުންކޮށް ބަލައިލެވޭނެ ކަމަށް ލޯ އިންސްޓިޓިއުޓުން ބުނެ އެވެ.
އެ ސެމިނާގެ އެންމެ ހާއްސަ އެއް ބައިވެރިއަކީ ބޮސްޓަން ކޮލެޖް ލޯ ސްކޫލްގެ އެސޯސިއޭޓް ޕްރޮފެސަރ އޮފް ލޯ، އަދުނާން އޭ. ޒުލްފިގާރު އެވެ. އޭނާއަކީ 2005 ވަނަ އަހަރު ރާއްޖޭގެ ގާނޫނުލްއުގޫބާތު އެކުލަވައިލުމަށް އެހީތެރިވި ޔުނިވާސިޓީ އޮފް ޕެންސިލްވޭނިއާގެ ފަންނީ ޓީމުގައި ހިމެނިވަޑައިގެންނެވި މުހިންމު ބޭފުޅެކެވެ.
ސެމިނާ ރަސްމީކޮށް ހުޅުއްވައިދެއްވާނީ ރާއްޖޭގެ ކުރީގެ ބަންޑާރަ ނައިބު ޑރ. ޙަސަން ސައީދު އެވެ. އާ ގާނޫނުލްއުގޫބާތުގެ މަސައްކަތް 2005 ވަނަ އަހަރު ފެށިއިރު އިސްކޮށް ހުންނެވީ ހަސަން ސައީދު އެވެ.
އޭގެ އިތުރުން، މި ދާއިރާގެ ތަޖުރިބާކާރު ބޭފުޅުން ކަމުގައިވާ ކުރީގެ ބަންޑާރަ ނާއިބު އަދި ސުޕްރީމް ކޯޓުގެ ފަނޑިޔާރުކަން ކުރެއްވި ހުސްނުއްސުއޫދާއި، ކުރީގެ ޕްރޮސިކިއުޓަރ ޖެނެރަލުން ކަމުގައިވާ އަހުމަދު މުއިއްޒު އަދި ހުސައިން ޝަމީމުގެ ތަޖުރިބާ ހިއްސާކުރައްވާނެ އެވެ.
