ލާމަރުކަޒީ ނިޒާމަށް ބޮޑެތި ބައްދަލުތަކެއް ގެނެސް އަތޮޅު ކައުންސިލްތައް އުވާލާފައި ވަނިކޮށް ލޯކަލް ގަވަމެންޓު އޮތޯރިޓީ (އެލްޖީއޭ) ގެ ބައްދަލުވުންތައް ލައިވްކޮށްދިނުމަށް މޯލްޑިވިއަން ޑިމޮކްރަޓިކް ޕާޓީގެ ފަރާތުން އެެދިއްޖެ އެވެ.
އިދިކޮޅު މައި ޕާޓީގެ ލާމަރުކަޒީ ކޮމިޓީގެ ފަރާތުން ވަނީ މިއަދު އެލްޖީއޭއާ ބައްދަލުކޮށްފަ އެވެ. އެ ބައްދަލުވުމުގައި މައިގަނޑު ދެ މައުލޫއަކަށް ވާހަކަ ދެކެވުނު ކަމަށް އެ ކޮމިޓީގެ ފަރާތުން ހާމަކޮށްފައިވެ އެވެ. އެއީ އަތޮޅު ކައުންސިލްތައް އުވާލުމާއި ހިރިމަރަދޫގައި މީހުން ދިރިއުޅެމުން ދަނިކޮށް ފަޅު ރަށެއްގެ ގޮތުގައި ކަނޑައަޅައި އެ ރަށުގެ ކައުންސިލް އުވާލުމުގެ މައްސަލަ އެވެ.
އެލްޖީއޭގެ އޮފީހުގެ ބޭރުގައި ހުންނަވައި ވާހަކަ ދައްކަވަމުން ނަވާރަވަނަ މަޖިލީހުގެ ހުޅުމާލެ ދާއިރާގެ މެންބަރުކަން ކުރެއްވި އަލީ ނިޔާޒު ވަނީ އެލްޖީއޭއަށް ވަރަށް ބޮޑަށް ސިޔާސީ ނުފޫޒު ފޯރާފައިވާ ކަމަށް ވިދާޅުވެފަ އެވެ.
"އަޅުގަނޑުމެން ދެކޭ ގޮތުގައި ސިޔާސީ ނުފޫޒެއް އެބައޮތް. އެ ބޭފުޅުން ވިދާޅުވަނީ ސިޔާސީ ނުފޫޒެއް ނެތޭ. ވަރަށް އަވަހަށް އެލްޖީއޭގެ ބޯޑަށް މެންބަރުން އިންތިހާބުވެގެންދާނެ. އެއާއެކު އަޅުގަނޑުމެން މި އެދެނީ އެލްޖީއޭގެ ބައްދަލުވުންތައް ރައްޔިތުންނަށް ފެންނަ ގޮތަށް ލައިވްކުރުމަށް،" ނިޔާޒު ވިދާޅުވި އެވެ.
އެ ހިޔާލަކީ ރަނގަޅު ހިޔާލެއް ކަމަށް އެލްޖީއޭގެ ފަރާތުން ބުނެފައިވާ ކަމަށް ރައްޔިތުންގެ މަޖިލީހުގެ ލާމަރުކަޒީ ކޮމިޓީގެ މުގައްރިރުކަން ވެސް ކުރެއްވި ނިޔާޒު ވިދާޅުވި އެވެ. އެކަމާމެދު އެލްޖީއޭއިން އަދި ވަކި ގޮތެއް ނިންމާފައި ނުވެ އެވެ.
