އޮންލައިންކޮށް ވިއްކާ ރައްކާތެރިނޫން އަދި ފޭކު މުދާ ހުއްޓުވުމަށް އެކަށީގެންވާ ފިޔަވަޅުތަކެއް އަޅާފައިނުވާތީ، ޗައިނާގެ މަގުބޫލު އޮންލައިން މާކެޓްޕްލޭސް "އަލީއެކްސްޕްރެސް" 550 މިލިއަން ޔޫރޯ (629 މިލިއަން އެމެރިކާ ޑޮލަރު) އިން ޖޫރިމަނާކުރުމަށް ޔޫރަޕިއަން ކޮމިޝަނުން ނިންމައިފި އެވެ.
މިއީ 27 ގައުމު އެކުލެވޭ ޔޫރަޕިއަން ޔޫނިއަން (އީޔޫ) ގެ 'ޑިޖިޓަލް ސާވިސަސް އެކްޓް' ގެ ދަށުން މިހާތަނަށް ކޮށްފައިވާ އެންމެ ބޮޑު ޖޫރިމަނާ އެވެ. މީގެ މަސްތަކެއް ކުރިން، މިފަދަ މައްސަލަތަކެއްގައި އެހެން އޮންލައިން ވިޔަފާރިއެއް ކަމަށްވާ "ޓެމޫ" ވެސް 200 މިލިއަން ޔޫރޯއިން ޖޫރިމަނާކޮށްފައި ވާއިރު، މިދިޔަ އަހަރު އިލޮން މާސްކްގެ އެކްސް ވެސް 120 މިލިއަން ޑޮލަރުން ޖޫރިމަނާކޮށްފައިވެ އެވެ.
ޔޫރަޕިއަން ކޮމިޝަންގެ ޓެކްނޮލޮޖީ، ސެކިއުރިޓީ އަދި ދިމުގުރާތީ ކަންކަމާ ބެހޭ އެގްޒެކެޓިވް ވައިސް ޕްރެޒިޑެންޓް ހެނާ ވިރްކުނެން ވިދާޅުވީ، ފޭކު އަންނައުނާއި، ރައްކާތެރިނޫން ކުޅޭއެއްޗެއްސާއި، ނުރައްކާތެރި ކޮސްމެޓިކްސްގެ އިތުރުން ގާނޫނާ ހިލާފު އެހެނިހެން ތަކެތި އޮންލައިންކޮށް ފެތުރުމަކީ އޮންލައިން ވިޔަފާރީގައި ނުވެ ނުދާނެ ކަމެއް ނޫން ކަމަށާއި، މިއީ ޑިޖިޓަލް ސާވިސަސް އެކްޓުގެ ދަށުން އަދާކުރަންޖެހޭ ޒިންމާތަކަށް އަލީއެކްސްޕްރެސްއިން އަމަލުނުކުރުމުގެ ނަތީޖާ ކަމަށެވެ.
ކުންފުނި ބޮޑުވުމަކީ އުޒުރެއް ނޫން ކަމަށާއި، ކަސްޓަމަރުންނަށް ރައްކާތެރިކަމާއެކު އޮންލައިންކޮށް ވިޔަފާރިކުރެވޭނެކަން ކަށަވަރުކުރުމަށްޓަކައި ނުރައްކާތައް ދެނެގަނެ، ރާވައިގެން ހައްލުކުރަންޖެހޭނެ ކަމަށްވެސް އޭނާ ވިދާޅުވިއެވެ.
މިކަމާ ގުޅިގެން ދީފައިވާ ބަޔާނެއްގައި އަލީއެކްސްޕްރެސްއިން ބުނީ އަށް އަމަލުކުރަން ފެށީއްސުރެ ގާނޫނީ ޒިންމާތައް އަދާކުރުމަށް ބޮޑެތި ހަރަދުތަކެއްކޮށް، ނުރައްކާތައް ވަޒަންކުރުމަށާއި ކަސްޓަމަރުންގެ ރައްކާތެރިކަމަށް ގިނަ މަސައްކަތްތަކެއް ކޮށްފައިވާނެ ކަމަށެވެ. އަދި ކޮމިޝަނުން ކަނޑައެޅި ބޮޑު ޖޫރިމަނާއާމެދު ހިތްހަމަނުޖެހޭކަން ހާމަކޮށް އަލީއެކްސްޕްރެސްއިން ބުނީ، މިއީ އެކުންފުނިން ކޮށްފައިވާ މަސައްކަތްތަކާ ނުބައްދަލު ބޮޑު ޖޫރިމަނާއެއް ކަމަށާއި، މި ނިންމުން އިތުރަށް ދިރާސާކޮށް ކުރިއަށްދާނެ ގޮތްތައް ބަލަމުންދާ ކަމަށެވެ.
މި ޖޫރިމަނާއަކީ މިދިޔަ އަހަރުގެ ޖޫން މަހާ ހަމައަށް އެކުންފުނިން ކަންކަން ކޮށްފައިވާ ގޮތަށް ބަލައި ކުރި ޖޫރިމަނާއެކެވެ.
ކޮމިޝަނުން ބުނެފައިވަނީ، ގާނޫނާ ހިލާފު މުދާ ވިއްކުން ހުއްޓުވުމަށް އަލީއެކްސްޕްރެސްއިން އަޅާނެ އިސްލާހީ ފިޔަވަޅުތަކުގެ ޕްލޭނެއް ހުށަހެޅުމަށް އޮކްޓޯބަރު 20 ގެ ނިޔަލަށް އެކުންފުންޏަށް މުއްދަތު ދީފައިވާ ކަމަށެވެ.
ޔޫރަޕިއަން ޔޫނިއަންގެ 'ޑިޖިޓަލް ސާވިސަސް އެކްޓް' އަކީ އިންޓަނެޓް ބޭނުންކުރާ ފަރާތްތަކުގެ ރައްކާތެރިކަން ކަށަވަރުކުރުމަށާއި، ގާނޫނާ ހިލާފު ނުވަތަ ގެއްލުންހުރި މައުލޫމާތާއި ތަކެތި ފެތުރުން ހުއްޓުވުމަށް އެކުލަވާލާފައިވާ ގާނޫނެކެވެ.
މި ނިންމުން އައިސްފައިވަނީ އަލީއެކްސްޕްރެސްގެ މައި ކުންފުނި "އަލީބާބާ" އިން، އެމެރިކާއަށް ގާނޫނާ ހިލާފު ބޭހާއި ކެމިކަލް އެތެރެކުރި ކަމަށް ބުނެ އެމެރިކާ ސަރުކާރާއެކު އުފެދުނު މައްސަލަ ހައްލުކުރުމަށް 600 މިލިއަން ޑޮލަރު ދެއްކުމަށް އެއްބަސްވިތާ ހަފުތާއެއް ވެސް ނުވަނީހެވެ.
