މޯލްޑިވްސް ޓްރާންސްޕޯޓް އެންޑް ކޮންޓްރެކްޓިން ކޮމްޕެނީ (އެމްޓީސީސީ) އިން ރަސްފަންނު ސަރަހައްދު މަރާމާތު ކުރުމަށްފަހު އަލުން ހުޅުވިއިރު، އެ ސަރަހައްދުގެ މޫދު ތަގައްޔަރުވެފައިވާ މައްސަލަ ހައްލު ކުރުމުގެ މަސައްކަތް މާލެ ސިޓީ ކައުންސިލުން ފަށައިފި އެވެ.
މިއަދު އޮތް މާލެ ސިޓީ ކައުންސިލުގެ ޖަލްސާގައި ވާހަކަދައްކަވަމުން މާލެ ސިޓީގެ މޭޔަރު، އާދަމް އާޒިމް ވިދާޅުވީ ރަސްފަންނު ސަރަހައްދު އެމްޓީސީސީން މަރާމާތުކޮށްފައި އޮތީ އެކަން ކުރަންޖެހޭ ގޮތަށް ނޫން ކަމަށެވެ. އަދި، އެ ތަނުގެ ހާލަތު ދެނެގަތުމަށްޓަކައި މިހާރު އެސެސްމެންޓުތަކެއް ހަދަން އަންގާފައިވާނެ ކަމަށް އާޒިމް ވިދާޅުވި އެވެ.
"އަޅުގަނޑުމެން އެތަން ބެލިއިރުގައި އެތަނުގައި ކަނޑާފައި ހުރި ކާނުތައް ވެސް ހުރީ ކަނޑުން ވަންނަ އެއްޗެހިތައް، ކަނޑުން ވަންނަ ކުނިތަކާ އެއްޗެހި ނުވަންނަ ގޮތަކަށް ނޫން ހަދާފައި ހުރީ، ވަރަށް އޯޕަންކޮށް އެތަން ހަދާފައި އޮތީ،" އާޒިމް ވިދާޅުވި އެވެ.
"އެހެންވީމާ ރަނގަޅަކަށް ނޫން އެކަން ކޮށްފައި އެ އޮތީ، މިއީ އަޅުގަނޑުމެން އުއްމީދުކުރި ގޮތަކަށް ނޫން ސަރުކާރުން އެކަން ކޮށްދީފައި އެ އޮތީ."
އާޒިމް ވިދާޅުވީ ރަސްފަންނު މަރާމާތު ކުރުމުގެ މަސައްކަތާ ސަރުކާރުން ހަވާލުވީ އެ ސަރަހައްދު މަރާމާތު ކުރުމަށްޓަކައި ސިޓީ ކައުންސިލުން މަސައްކަތަކެއްކޮށް، ކޮންޓްރެކްޓުކޮށް ބަޔަކާ އެ މަސައްކަތް ހަވާލު ވެސް ކޮށްފައި ވަނިކޮށް ކަމަށެވެ.
"މާލެ ސިޓީ ކައުންސިލުން މިދިޔަ ދައުރުގައި އަޅުގަނޑުމެން ނިންމިން އަދި ކޮންޓްރެކްޓު ވެސް ކުރިން ކޮންޓްރެކްޓު އެވޯޑު ވެސް ކުރިން. ކުރުމަށްފަހުގައި ސަރުކާރުން އެދުނީ ތިމަންނަމެން އެތަން އެ ބޭފުޅުންގެ ހަރަދުގައި ކޮށްދެއްވާނަމޭ،" އާޒިމް ވިދާޅުވި އެވެ.
ރަސްފަންނުގެ ހާލަތާ ގުޅޭގޮތުން ވާހަކަދައްކަވަމުން މާލެ ސިޓީ ކައުންސިލުގެ މެންބަރު، މުހައްމަދު ރިލްވާން ވިދާޅުވީ މަރާމާތަށްފަހު ރަސްފަންނު ހުޅުވިއިރު، އެ ސަރަހައްދަށް ވަރަށް ބައިވަރު ކުނި ވަންނަ ކަމަށާއި މޫދަށް އެރޭ ސަރަހައްދުގައި ގިނަ އަދަދަކަށް ކިސަޑު ވެސް ހުރި ކަމަށެވެ.
"މި ތަނުގައި އެއްވެސް ސާފުތާހިރުކަމުގެ މިންގަނޑެއް ނެތް، އެއް ދުވަހު ދިޔައިރު އެބަހުރި ކަޅުތެޔޮ އަޅާފައި، ކަޅުތެޔޮ. އެހެންވީމާ މިތަން އެބަޖެހޭ އަޅުގަނޑުމެން ރައްޔިތުންނަށް ހިދުމަތެއް ދެންޏާ ތަންކޮޅެއް ރަނގަޅަށް ހިދުމަތް ދޭން،" ރިލްވާން ވިދާޅުވި އެވެ.
މަރާމާތު ކުރުމަށްޓަކައި މިދިޔަ އޭޕްރިލް 9، އިން ފެށިގެން ރަސްފަންނު ބަންދުކޮށްފައި ބޭއްވުމަށްފަހު، އެ ސަރަހައްދު އަލުން ހުޅުވައިލީ މިދިޔަ މަހުގެ 12، ގަ އެވެ.
އެމްޓީސީސީއާ ހަވާލުކޮށްގެން ކުރިއަށް ގެންދިޔަ އެ މަޝްރޫއުގެ ދަށުން ރަސްފަންނު ސަރަހައްދުގެ އުތުރު ފަރާތުގައި ހާއްސަ ފެން ހިންދާ ނިޒާމެއް ގާއިމު ކުރުމާއި ކުރިން ޖަހާފައިވާ ހިލަ ތޮށި އެއްކޮށް ނަގާފައިވާ ކަމަށް ސަރުކާރުން ބުންޏެވެ. އަދި، މޫދުން އޮއި ދެމޭގޮތަށް ހޮޅިތަކެއް ލައިގެން އަލުން ހިލަތޮށްޓެއްލައިފައިވާ ކަމަށް ވެސް ސަރުކާރުން ބުންޏެވެ.
