މިދިޔަ ޖޫން މަހު ބޭއްވި ހިތަދޫ އުތުރު ދާއިރާގެ ބައި-އިލެކްޝަން ކާމިޔާބުކުރެއްވި އަބްދުﷲ ސޯދިގުއަށް ރައްޔިތުންގެ މަޖިލީހުގެ ދެ ކޮމިޓީއަކުން ޖާގަ ދީފި އެވެ.
ސޯބެއަށް ޖާގަ ދީފައިވަނީ ލާމަރުކަޒީ ކޮމިޓީ އާއި އެންވަރަމެންޓް އެންޑް ކްލައިމެޓް ޗޭންޖު ކޮމިޓީންނެވެ. އެ ދެ ކޮމިޓީން އޭނާއަށް ފުރުސަތު ދޭން ފާސްކުރީ މިއަދުގެ ވޯޓުގައި ބައިވެރިވި 68 މެންބަރުންގެ އިއްތިފާގުންނެވެ.
މެންބަރުންގެ އަދަދަށް އައި ބަދަލާއެކު، މަޖިލީހުގެ ކޮމިޓީތަކުގެ ކޮމްޕޮޒިޝަންއަށް ބަދަލުނުގެންނަ މައްސަލައިގައި މިދިޔަ ހަފުތާގައި އެމްޑީޕީ މެންބަރުން މަޖިލީހުގެ ތަޅުމުގައި އިހުތިޖާޖު ވެސް ކުރި އެވެ.
މިދިޔަ ހަފުތާގެ ބުދަ ދުވަހު ބޭއްވި މަޖިލީހުގެ ޖަލްސާގައި އެމްޑީޕީގެ ޕީޖީ ލީޑަރު ހިތަދޫ ދެކުނު ދާއިރާގެ މެންބަރު އިބްރާހިމް ނާޒިލް އިސްވެ ހުންނަވައި މަޖިލީހުގެ ރިޔާސަތުގެ ކުރިމަތީގައި އެކަމާ ދެކޮޅަށް އެމްޑީޕީ މެންބަރުން އުޑުއުފުލަމުން ގެންދެވި އެވެ.
ނަތީޖާއެއްގެ ގޮތުން ނާޒިލް އާއި އެމްޑީޕީގެ ޕީޖީ ގްރޫޕުގެ ހުރިހާ މެންބަރުންގެ ނަން އިއްވައި ތަޅުމުން ނެރުނެވެ.
