ދިވެހިންގެ އުފެއްދުންތަކާއި ހުނަރުތައް ބައިނަލްއަގުވާމީ ބާޒާރަށް ވިއްކަން ހުރި ހުރަސްތައް ނައްތާލެއްވިއްޖެ ކަމަށް ވިދާޅުވެ، ބޭރު ގައުމުތަކަށް ވިޔަފާރި ފުޅާކޮށް، އުފެއްދުންތެރިކަން އިތުރުކުރައްވަން ރައީސް މުހައްމަދު މުއިއްޒު މިއަދު ގޮވާލައްވައިފި އެވެ.
މުއިއްޒު މިހެން ވިދާޅުވީ އުރީދޫން ބައިނަލްއަގުވާމީ ޑިޖިޓަލް ވޮލެޓު، ޕޭޕަލްގެ ހިދުމަތް ރާއްޖޭގައި ފެށުން ފާހަަގަކުރަން ބޭއްވި ރަސްމިއްޔާތުގައި ދެއްކެވި ވާހަކައިގަ އެވެ.
ޕޭޕަލް ހިދުމަތް ތައާރަފުކުރުމުގެ ވާހަކަ މުއިއްޒު ފެއްޓެވީ، އެމަނިކުފާނު ރައީސް ކަމަށް ކެމްޕެއިން ކުރައްވަމުން ގެންދެވި ދުވަސްވަރު ބައްދަލުކުރެއްވި އުފެއްދުންތެރިންނާއި އިނޮވޭޓަރުން ހިއްސާކުރި ކަންބޮޑުވުމެކެވެ. އެއީ، މުއިއްޒު ވިދާޅުވި ގޮތުގައި، ދުނިޔޭގެ ޑިޖިޓަލް އިގުތިސޯދުގައި ފުރިހަމައަށް ބައިވެރިނުވެވޭ ކަމުގެ ކަންބޮޑުވުމެވެ.
'ރާއްޖެއިން ބޭރަށް ފައިސާ ފޮނުވުނަސް، ފައިސާ ލިބުމުގެ ހިދުމަތް ފުރިހަމައަށް ނުލިބޭ. މުޅި ދުނިޔެއިން ގަނެވުނަސް، ތިމާގެ ހުނަރުތައް ދުނިޔެއަށް ފަސޭހައިން ވިއްކޭނެ ގޮތެއް ނެތް. ތިމާ ކުރާ އުއްމީދުތައް ހިފެހެއްޓި އޮތީ ނިޒާމީ ހުރަސްތަކުން،" އެމަނިކުފާނު ވިދާޅުވި އެވެ.
މިއީ ބޭއިންސާފެއް ކަމަށް ސިފަކުރައްވަމުން މުއިއްޒު ވިދާޅުވީ، ވެރިކަމާ ހަވާލުވެވަޑައިގަތުމުގެ ކުރިންސުރެން މި ހަގީގަތް ބަދަލުކުރުމުގެ މަސައްކަތް ފެށި ކަމަށެވެ. އަދި މިއަދު މި ފެންނަނީ މި ސަރުކާރާއި މި ސަރުކާރުގެ ބައިވެރިން ގުޅިގެން ކުރި މަސައްކަތުގެ ނަތީޖާ ކަމަށް އެމަނިކުފާނު ވިދާޅުވި އެވެ.
ޕޭޕަލްގެ ހިދުމަތް ތައާރަފުވުން މުއިއްޒު ގުޅުވާލެއްވީ، މި ސަރުކާރުގެ އެއަށް ވުރެ ބިޔަ ތަސައްވުރަކާ އެވެ. އެއީ 2040 ވަނަ އަހަރު އަންނަން ވާއިރަށް ދިވެހިރާއްޖެ ތަރައްގީވެފައިވާ މަތީ އާމްދަނީ ލިބޭ ގައުމަކަށް ބަދަލުކުރަން ގެންގުޅޭ "ވިޝަން 2040" އެވެ.
މުއިއްޒު ވިދާޅުވީ، މިހާރު އިގުތިސޯދު ބިނާވެފައިވާ ޓޫރިޒަމާއި މަސްވެރިކަން ފަދަ "ސަގާފީ ދާއިރާތަކަށް" ބަރޯސާވެގެން މި މަގުސަދު ހާސިލުކުރެވެން ނެތް ކަމަށެވެ.
"ހަގީގީ ޑައިވަރސިފިކޭޝަންއަށް ބޭނުންވަނީ އެތެރެއިން މުޅިން އާ ތަނބުތަކެއް ބިނާކުރަން. މި ދަތުރަށް މަގުދައްކައިދޭން ސާފު މެންޑޭޓަރީ މައިލްސްޓޯނެއް އަޅުގަނޑުމެން ވާނީ ކަނޑައަޅާފަ،" އެމަނިކުފާނު ވިދާޅުވި އެވެ.
އެ މައިލްސްޓޯންއަކީ 2030 ވަނަ އަހަރުގެ ނިޔަލަށް ޑިިޖިޓަލް އިގުތިސޯދުން ގައުމީ ޖީޑީޕީ 15 އިންސައްތަ ހިއްސާކުރަން ޖެހޭނެ ކަމަށް ކަނޑައަޅާފައިވާ އަމާޒެވެ.
މުއިއްޒު ވިދާޅުވީ، ޕޭޕަލް އާއި "ދިވަރު" ސަބްމެރިން ކޭބަލް ޕްރޮޖެކްޓު ހިންގާ ގޫގުލް ފަދަ ބައިނަލްއަގުވާމީ ބްރޭންޑްތަކާ އެކީ ކުރާ މަސައްކަތުން ކަނެކްޓިވިޓީ ތައާރަފުކުރެވޭ ކަމަށެެ. އަދި މީގެން ބައިނަލްއަގުވާމީ މާކެޓުތަކަށް ދޭ ސިގުނަލަކީ، ރާއްޖެއަކި އިންވެސްޓުކުރަން ރަނގަޅު ތަނެއް ކަން ކަމަށް އެމަނިކުފާނު ވިދާޅުވި އެވެ.
މިކަމަށް ފަހިކުރުމަށް ކުރެވޭ އަނެއް މަސައްކަތަކީ ސަރުކާރުގެ ހުރިހާ ހިދުމަތެއް ޑިޖިޓަލް ކުރަން ހިންގާ "މޯލްޑިވްސް 2.0" އެވެ. މުއިއްޒު ވިދާޅުވީ ސީދާ ރައީސް އޮފީހުގެ ބެލުމުގެ ދަށުން ކުރިއަށް ގެންދާ މި ޑިޖިޓަލައިޒޭޝަންއިން ބިނާކުރެވެނީ ރައްކާތެރި، ފަސޭހަ، ހުޅުވާލެވިފައިވާ ވިޔަފާރީގެ ނިޒާމެއް ކަމަށެވެ. އަދި، މިއީ ދިވެހިންގެ ވިޔަފާރިތައް ބޭރު ގައުމުތަކަށް ފުޅާކުރެވޭނެ ސާފު މަގެއް ދައްކަން ފަރުމާކޮށްފައިވާ ނިޒާމެއް ކަމަށް ވެސް އެމަނިކުފާނު ވިދާޅުވި އެވެ.
މުއިއްޒުގެ ވާހަކައިގައި، އުފެއްދުންތެރިންނާއި، ޕްރޮގްރާމަރުންނާއި، ފްރީލާންސަރުންނާއި، ޑިޒައިނަރުންގެ ނަންގަންނަވައި، ރާއްޖޭގެ ޑިޖިޓަލް އިންގިލާބުގައި ހަމައެކަނި ބައިވެރިންގެ ބަދަލުގައި ތިބުމުގެ ބަދަލުގައި ހުންގާނުގައި ހިފަން ދައުވަތު އެރުވި އެވެ.
މިކަމުގައި އެންމެންގެ ބައިވެކޮށް، ބާރުވެރިކުރަން ސަރުކާރުން ކުރަމުންދާ މަސައްކަތްތައް ހާމަކޮށްދޭން ސަރުކާރުގެ ބައެއް ޕްރޮގްރާމުތަކާއި ޕްރޮޖެކްތުތަކުން މުއިއްޒު މިސާލު ދެއްވެވި އެވެ. އޭގެ ތެރޭގައި، ކްރިއޭޓިވް އިކޮނޮމީ ކައުންސިލާއި، ފައިނޭންސިން ޕްރޮގްރާމުތަކާއި، ޑިޖިޓަލް ކްރިއޭޓަރުންނަށް އަމާޒުކޮށްގެން މާލޭގައި އަޅާ ކްރިއޭޓާ ހަބް އާއި ސަގާފީ ތަރިކަތަކާއި އުފެއްދުންތަކުގެ ސިނާއަތަކަށް އަމާޒުކޮށްގެން ބ. ތުޅާދޫގައި އަޅާ ލިޔެލާ ޓްރެއިނިން ސެންޓަރާއި ގދ. ގައްދޫގައި އަޅާ އަތުމަސައްކަތަށް ހާއްސަ މަރުކަޒު ނަންގަތެވެ.
މި އަހަރަކީ، އުފެއްދުންތެރިކަމުގެ ގައުމީ އަހަރު ކަމަށް ވިދާޅުވަމުން، މުއިއްޒު ވަނީ ސަރުކާރުން ބޭނުންވަނީ މިހާރު ލިބިފައިވާ ބައިނަލްއަގުވާމީ ނިޒާމުގެ ބޭނުންކޮށްގެން ދިވެހި ބްރޭންޑުތައް ބައިނަލްއަގުވާމީ ބްރޭންޑުތަކަށް ބަަދަލުކުރަން ކަމަށެވެ.
އުތުރުގައި އުފައްދާފައިވާ ސަގާފީ ލިޔެލާ ޖެހި މޮޅު މަސައްކަތެއް ކަމުގައި ވިޔަސް ދެކުނުގައި އުފައްދާ ދެމެހެއްޓެނިވި ދަނޑުވެރިކަމުގެ އުފެއްދުމެއް ކަމުގައި ވިޔަސް، އައްޑޫގެ ޑިޒައިނަރު މަސައްކަތެއް ކަމުގައި ވިޔަސް، ނުވަތަ މާލޭގައި ޑިޖިޓަލް އިނޮވޭޓަރެއް ކަމުގައި ވިޔަސް، ދިވެހިންގެ މޮޅުކަން އެއްވެސް ދަތިކަމެއް ނެތި ބައިނަލްއަގުވާމީ އިގުތިސޯދަށް ވަންނަން ޖެހޭ،" މުއިއްޒު ވިދާޅުވި އެވެ.
މުއިއްޒުގެ ވާހަކައިގައި ޕޭޕަލް ހިދުމަތް ރާއްޖެއަށް ގެނައުމުގެ ފަހަތުގައި ސަރުކާރުގެ ދައުރު ވަރަށް ބޮޑު ކަމަށް ވިދާޅުވެ، އެއީ ސީދާ ތިމަން މަނިކުފާނުގެ މަސައްކަތުން ކުރެވުނު ކަމެއް ކަމަށް ވިދާޅުވި އެވެ.
