ނިއު ޔޯކް، ޔުނައިޓެޑްް ސްޓޭޓްސް (ޖޫން 11) - މި ފަހަރުގެ ވޯލްޑް ކަޕް ފުޓްބޯޅަ މުބާރާތަށް ނުކުންނައިރު، އިންގްލެންޑް ގައުމީ ޓީމަށް އޮތް ޕްރެޝަރާ ކުރިމަތިލެވޭނެ ކަމަށް އެ ޓީމުގެ ކޯޗު، ޖަރުމަނުގެ ތޯމަސް ޓުޗެލް ބުނެފި އެވެ.
އެމެރިކާ، މެކްސިކޯ އަދި ކެނަޑާގައި ފަށާ ފީފާ ވޯލްޑް ކަޕް ފުޓްބޯޅަ މުބާރާތަށް އިންގްލެންޑުން ނެގި ސްކޮޑާއި އެ ޓީމުގެ ތައްޔާރީތަކާ ބެހޭގޮތުން، އިނގިރޭސި މީޑިއާގެ ފާޑުކިޔުން ޓީމަށް އަދި ޓުޗެލް އަށް ވަނީ ބޮޑުވެފަ އެވެ. އަދި، އިންގްލެންޑުން ބައިނަލްއަގުވާމީ ފުޓްބޯޅައިގައި ސީނިއާ ލެވަލްގައި 1966 ވަނަ އަހަރު ވޯލްޑް ކަޕް ކާމިޔާބުކުރި ފަހުން، އަދި ކާމިޔާބެއް ހޯދިފައިނުވާއިރު، މި ފަހަރުގެ ވޯލްޑް ކަޕްގައި އެކަން ނިމުމަކަށް ގެންނަން ވެސް ޓީމަށް ޕްރެޝަރު އެބައޮތެވެ.
ޓުޗެލް ބުނީ، ފުޓްބޯޅައިގައި މަސައްކަތްކުރާ ބަޔަކަށް ޕްރެޝަރުވާން ޖެހޭނީ ޝައުގުވެރިކަމާ އެކު ކުރިމަތިލެވޭނެ ކަމަކަށް ކަމަށެވެ.
"ޓީމާ ބައްދަލުކުރި މީޓިންގައި އަަހަރެން ވަރަށް ރަނގަޅަށް ބުނެދިނިން، ކިހާ ބުރަދަނެއް ހުރި ކަމެއްކަން އަހަރެމެން ހަވާލުވެ މި ތިބީ. އަދި، ޓީމެއްގެ ގޮތުގައި، އެއް ބައެއްގެ ގޮތުގައި ކެރިގެން އެކުގައި ތިބެގެން ކުރިމަތިލައިފިނަމަ، މި އޮތް ޕްރެޝަރު ތެރޭގައި ވެސް މި ޓީމަށް ކުރިއަށްދެވޭނެ. އާދަޔާހިލާފު ތަޖުރިބާތަކެއް ކުރެވޭނެ،" ޓުޗެލް ބުންޏެވެ.
"ބޯޅަ ރޯލްްވާން ފެށުމާ އެކު އެ ފެށުނީ ގޭމް. ދެން، ޕްރެޝަރުގެ ކަންކަން ވެސް އެ ފެށުނީ. ވިސްނަން ޖެހޭ ކަންކަން ވެސް ގިނަވާނެ. އެކަމަކު، އެއީ އަހަރެން އެންމެ ގަޔާވާ ކަންތައް، މި ޕްރެޝަރު އަހަންނަށް އަބަދުވެސް ވަރަށް ޝައުގުވެރި. އެއީ، ފުޓްބޯޅައިގެ ތެރެއިން ވެސް ދިރިހުރި ކަމުގެ ނިޝާންތަކެއް ފެނިގެންދާނެ،"
ފާއިތުވި އަަހަރުތަކުގައި ބައިނަލްއަގުވާމީ މުބާރާތްތަކުގައި އިންގްލެންޑުން ނެރެފައިވާ ނަތީޖާތަކުގެ ސަބަބުން އެ ޓީމުން މި ފަހަރުގެ ވޯލްޑް ކަޕްްގައި ރަނގަޅު ނަތީޖާތަކެއް ނެރޭނެ ކަމަށް ގިނަ ބަޔަކު އުންމީދުކުރާ ކަމަށް ޓުޗެލް ވަނީ ބުނެފަ އެވެ.
އިންގްލެންޑުން މި ފަހަރުގެ ވޯލްޑް ކަޕްގައި ހިމެނެނީ، ކްރޮއޭޝިއާ، ގާނާ އަދި ޕެނަމާއާ އެއް ގްރޫޕެއްގަ އެވެ. އިންގްލެންޑުން ފުރަތަމަ މެޗުގައި މި މަހު 17 ވަނަ ދުވަހު ކްރޮއޭޝިއާއާ ކުޅޭނެ އެވެ. އަދި، ދެ ވަނަ މެޗުގައި މި މަހު 24 ވަނަ ދުވަހު ގާނާއާ ކުޅުމަށް ފަހު، އޭގެ ހަތަރު ދުވަސް ފަހުން ފަހު މެޗުގައި ޕެނަމާއާ ބައްދަލުކުރާނެ އެވެ.
އިންގްލެންޑުން ވަނީ ވޯލްޑް ކަޕަށް ތައްޔާރުވާން ކުޅުނު ފަހު ދެ މެޗުން ކޮސްޓަ ރިކާ އާއި ނިއު ޒީލެންޑު ބަލިކޮށްފަ އެވެ.
