އިންޑިއާގެ ބޮޑުވަޒީރުކަމުގެ މަގާމުގައި މެދުނުކެނޑި އެންމެ ގިނަ ދުވަހު ހުންނެވި ބޭފުޅާގެ ޝަރަފު ނަރެންދުރަ މޯދީ ހޯއްދެވުމާ ގުޅިގެން، ރައީސް މުހައްމަދު މުއިއްޒު އެމަނިކުފާނަށް ހޫނު މަރުހަބާއެއް ވިދާޅުވެއްޖެއެވެ.
މޯދީއަށް މަރުހަބާ ވިދާޅުވެ މުއިއްޒު ފޮނުއްވި މެސެޖުގައި، އިންޑިއާގެ ތާރީހުގައި މެދުނުކެނޑި އެންމެ ގިނަ ދުވަހު ބޮޑުވަޒީރުކަން ކުރެއްވި އިންތިހާބީ ވެރިޔާގެ ލަގަބު މޯދީއަށް ލިބިވަޑައިގަތުމަކީ ފާހަގަކޮށްލެވޭ ބޮޑު ކާމިޔާބީއެއްގެ ގޮތުގައި ވަނީ ސިފަކުރައްވާފަ އެވެ. މި ތާރީހީ މުނާސަބަތުގައި ރައީސް މުއިއްޒު ވަނީ ބޮޑުވަޒީރު މޯދީއަށާއި އިންޑިއާގެ ސަރުކާރަށް ތަހުނިޔާ ފޮނުއްވާފަ އެވެ.
މި މެސެޖުގައި މުއިއްޒު އިތުރަށް ވިދާޅުވީ، ދިވެހިރާއްޖެ އާއި އިންޑިއާއާ ދެމެދު އޮތް ގާތް ގުޅުން ކުރިއަށް އޮތް ތަނުގައި އިތުރަށް ވަރުގަދަވެގެންދާނެ ކަމަށް އުންމީދު ކުރައްވާ ކަމަށެވެ.
ދެ ގައުމުގެ ގުޅުން ބިނާވެގެންވަނީ ދޭދޭ ގައުމުތަކުގެ މެދުގައި އޮންނަންޖެހޭ އިހުތިރާމާއި، ގައުމުތަކުގެ މިނިވަންކަމާއި ސިޔާދަތީ ހަމަހަމަކަމުގެ މައްޗަށް ކަމަށް ރައީސް ވިދާޅުވި އެވެ. މީގެ އިތުރުން، ދެ ގައުމުން އިސްކަންދޭ މުހިންމު ކަންތައްތަކާއި ދެ ގައުމުގެ މަސްލަހަތު ހިމެނޭ ކަންކަމުގައި ގުޅިގެން މަސައްކަތް ކުރުމުގެ މުހިންމުކަން ރައީސްގެ މެސެޖުގައި ވަނީ ފާހަގަކުރައްވާފަ އެވެ.
އިންޑިއާއަކީ ރާއްޖޭގެ ތަރައްގީގެ މުހިންމު ބައިވެރިއަކަށްވާއިރު، އިގްތިސާދީ އަދި އިޖުތިމާއީ އެކި ދާއިރާތަކުން ދެ ގައުމުގެ މެދުގައި އޮންނަ ގުޅުން ބަދަހިކުރުމަކީ ރާއްޖޭގެ ސަރުކާރުން އިސްކަންދޭ ކަމެކެވެ.
ބޮޑުވަޒީރު މޯދީއަށް މި ލިބިވަޑައިގެންނެވި ކާމިޔާބީއަކީ އިންޑިއާގެ ސިޔާސީ މަސްރަހުގައި އެމަނިކުފާނަށް އޮތް ތާއީދާއި އިތުބާރު ހާމަކޮށްދޭ ކަމެއްގެ ގޮތުގައި ބައިނަލްއަގުވާމީ މީޑިއާތަކުން ވެސް އަންނަނީ ރިޕޯޓު ކުރަމުންނެވެ. މުއިއްޒުގެ އިތުރުން ދުނިޔޭގެ އެކި ގައުމުތަކުގެ ވެރިންވެސް އަންނަނީ މޯދީއަށް މަރުހަބާ ވިދާޅުވަމުންނެވެ.
