އަވަށްޓެރި އިންޑިއާގެ ގައުމީ އެއާލައިން އެއާ އިންޑިއާ އަދި ތައިލޭންޑުގެ ބެންކޮކް އެއާވޭސްއިން ރާއްޖެއަށް ކުރަމުން އަންނަ ދަތުރުތައް މެދުކަނޑާލައިފި އެވެ.
އެއާ އިންޑިއާއިން ވަނީ އޮގަސްޓު މަހުގެ ނިޔަލަށް ރާއްޖެއަށް ކުރާ ދަތުރުތައް މެދުކަނޑާލާފަ އެވެ. މައުލޫމާތު ލިބިފައިވާ ގޮތުގައި ބެންކޮކް އެއާވޭސްއިން ދަތުރުތައް މެދުކަނޑާލީ ސެޕްޓެމްބަރު މަހުގެ ނިޔަލަށެވެ.
އެއާ އިންޑިއާއިން ވަނީ ރާއްޖޭގެ އިތުރުން އެހެން ބައެއް މަންޒިލްތަކަށް ވެސް ކުރަމުން އަންނަ ދަތުރުތައް މެދުކަނޑާލައި ފްލައިޓުތައް މަދުކޮށްފަ އެވެ. އެއާ އިންޑިއާއިން ދިޔައީ ހަފްތާއަކު ހަތް ދުވަހު ރާއްޖެއަށް ފްލައިޓު އަޅަމުންނެވެ.
އާންމު ގޮތެއްގައި ބެންކޮކް އެއާވޭސްއިން ރާއްޖެއަށް ހަފްތާއަކު ހަތަރު ފްލައިޓު އަޅަ އެވެ. އޮކްޓޯބަރު މަހުގެ ތެރޭގައި އެ އެއާލައިނުން އަލުން ދަތުރުތައް ފަށާނެ އެވެ.
ރާއްޖެ އާއި އިންޑިއާއާ ދެމެދު މި ވަގުތު ސީދާ ދަތުރުކުރަނީ އިންޑިއާގެ އިންޑިގޯ އަދި ގައުމީ އެއާލައިން މޯލްޑިވިއަނުންނެވެ. ރާއްޖެ އާއި ތައިލެންޑާ ދެމެދު ސީދާ ދަތުރުތައް ކުރަނީ އެއާ އޭޝިއާއިންނެވެ. މޯލްޑިވިއަނުން ސީޒަނަލް ފްލައިޓުތަކެއް ބާއްވަ އެވެ.
މި ފެށެނީ ފަތުރުވެރިިކަމުގެ އޮފް ސީޒަން ކަމަށްވުމާއެކު ރާއްޖެއަށް އަންނަ ފްލައިޓުތައް މަދުވުން ވެގެންދާނީ ޓޫރިޒަމަށް ލިބޭނެ ގެއްލުމަކަށެވެ. އިރާން ހަނގުރާމައާ ގުޅިގެން މިހާރު ވެސް ޓޫރިޒަމަށް އަންނަނީ ބޮޑެތި ގެއްލުންތަކެއް ވަމުންނެވެ.
އިރާން ހަނގުރާމައާ ގުޅިގެން ދުނިޔޭގެ ބާޒާރުގައި ޖެޓް ފިއުލްގެ އަގު ވަރަށް ބޮޑަށް އުފުލިފައިވާއިރު އޭގެ އަސަރުތައް އެއާލައިންތަކަށް އަންނަނީ ކުރަމުންނެވެ. ގިނަ އެއާލައިންތަކުން އަންނަނީ ޓިކެޓުގެ އަގު ބޮޑުކޮށް ދަތުރުތައް މަދުކުރަމުންނެވެ.
