ފަތުރުވެރިކަމާއި ތައުލީމީ ދާއިރާގެ އިތުރުން އަސްކަރީ ދާއިރާ ހިމެނޭހެން އެކު ޖުމުލަ ހަތް އެމްއޯޔޫއެއްގައި ސްރީލަންކާ އާއެކު ދިވެހިރާއްޖެއިން މިއަދު ސޮއިކޮށްފި އެވެ.
ދެ ގައުމުގެ ދެމެދުގައި އެމްއޯޔޫތަކެއްގައި ސޮއުކުރީ ރައީސުލްޖުމްހޫރިއްޔާ މުހައްމަދު މުއިއްޒު ސްރީލަންކާއަށް ކުރައްވަމުން ގެންދަވާ ރަސްމީ ދަތުރުގެ ތެރެއިން، މިއަދު ބޭއްވި ހާއްސަ ރަސްމިއްޔާތެއްގަ އެވެ.
މިއަދު ސޮއިކުރި އެއްބަަސްވުންތަކުގެ ތެރޭގައި އަސްކަރީ ދާއިރާގެ ދެ އެމްއޯޔޫ ހިމެނެ އެވެ. އެއީ ޑިފެންސް ދާއިރާއިން މީހުން ތަމްރީނު ކުރުމާއި ތައުލީމު ހާސިލު ކުރުމުގެ އިތުރުން އެ ދާއިރާއިން ދިރާސާތައް ކުރުމުގެ އެއްބަސްވުމަަކާއި ދެ ގައުމު ގުޅިގެން ޓެރަރިޒަމާ ދެކޮޅަށް މަސައްކަތް ކުރުމުގެ އެމްއޯޔޫއެކެވެ.
މިއަދު ދެން ސޮއިކުރީ ފަތުރުވެރިކަމުގެ ދާއިރާއިން ދެ ގައުމުގެ ގުޅުން ބަދަހި ކުރުމުގެ އެމްއޯޔޫއަކާއި ތައުލީމީ ދާއިރާއިން މީހުން ތަމްރީނު ކުރުމުގެ އެމްއޯޔޫއެއްގަ އެވެ.
އޭގެ އިތުރުން ދެ ގައުމުގެ ތާރީހީ ލިޔެކިޔުންތައް އާކައިވް ކުރުމުގެ އެމްއޯޔޫއެއްގައި ވެސް މިއަދު ސޮއިކުރި އެވެ. އަދި، ކުޅިވަރުގެ ދާއިރާއިން ޒުވާނުން ތަމްރީނު ކުރުމުގެ އެމްއޯޔޫއެއް އައު ކުރުމަށް ވެސް މިއަދު އޮތް ރަސްމިއްޔާތުގައި ވަނީ ސޮއިކޮށްފަ އެވެ.
މުއިއްޒު ސްރީލަންކާއަށް ކުރައްވަމުން ގެންދަވާ ދަތުރުގެ ތެރެއިން މިއަދު ވަނީ ތަގުރީރެއް ވެސް ކުރައްވައިފަ އެވެ.
ސްރީލަންކާގެ ވެރިރަށް، ކޮލަމްބޯގައި ހުންނަ އެ ގައުމުގެ ޕްރެޒިޑެންޝަލް ސެކްރެޓޭރިއެޓުގައި މިއަދު ހެނދުނު ދެއްވި އެ ތަގުރީރުގައި މުއިއްޒު ވަނީ ދެ ގައުމުގެ ގުޅުން އިތުރަށް ފުޅާ ކުރުމަށާއި ސަރަހައްދީ ސުލްހަމަސަލަސްކަމާއި ހަމަޖެހުން ގާއިމުކުރުމުގައި ދިވެހިރާއްޖެ ދެމިއޮންނާނެ ކަމުގެ ޔަގީންކަން ދެއްވައިފަ އެވެ.
ސްރީލަންކާގެ ރައީސް، އަނޫރާ ކުމާރާ ޑިސަނަޔަކެ އާއެކު މިއަދު ކުރިއަށް ގެންދިޔަ ބައްދަލުވުންތައް ވަރަށް ކާމިޔާބު ކަމަށް ވިދާޅުވެ ދެ ގައުމުގެ ދެމުގައި މިއަދު ސޮއިކުރި އެއްބަސްވުންތަކަށް ވީހާވެސް އަވަހަކަށް އަމަލުކުރަން ފެށޭނެ ކަމަށް އުއްމީދު ކުރައްވާ ކަމަށް މުއިއްޒު ވިދާޅުވި އެވެ.
އެ ދަތުރުގެ ތެރެއިން މުއިއްޒު މިއަދު ވަނީ ސްރީލަންކާގެ ގާނޫނު ހަދާ މަޖިލީހުގެ ރައީސް އާއި އެ ގައުމުގެ ބޮޑު ވަޒީރާ ވެސް ބައްދަލުކުރައްވައިފަ އެވެ.
ސްރީލަންކާއަށް މުއިއްޒު ކުރައްވަމުން ގެންދަވާ ދަތުރުގައި އެމަނިކުފާނުގެ އަނބިކަނބަލުން، ސާޖިދާ މުހައްމަދު އާއި ކެބިނެޓުގެ ބައެއް ވަޒީރުން ބައިވެރިވެވަޑައިގަންނަވަ އެވެ.
