މިހާތަނަށް ހޯދިފައިވާ އެންމެ ދުވަސްވީ އެއްގަމު ޖަނަވާރު ކަމަށްވާ، އުމުރުން ގާތްގަނޑަކަށް 194 އަހަރުގެ "ޖޮނަތަން" ނަމަކަށް ކިޔާ ކަންޒު ކަހަނބު އެހާ ގިނަ ދުވަހު ދިރިހުރި ސަބަބަކީ އޭގެ ޖެނެޓިކް ސިފަތަކާއި، ހަށިގަނޑުގެ ސެލްތަކުގެ މުހިންމު ނިޒާމުތައް ޒުވާންކަންމަތީ ދެމެހެއްޓުމުގެ ގާބިލުކަން ކަމަށް ސައިންސްވެރިން ބުނެފި އެވެ.
މި ބާވަތުގެ ކަންޒު ކަހަނބު އާންމުކޮށް 100 އަހަރަށް ވުރެ ގިނަ ދުވަހު ދިރިއުޅޭ ކަމަށް ފާހަގަކުރެވުނު ނަމަވެސް، ޖޮނަތަން ވަނީ އެ މުއްދަތަށް ވުރެ މާ ގިނަ ދުވަހު ދިރިހުރެފަ އެވެ. ސައުތު އެޓްލާންޓިކްގެ އެކަހެރި ރަށެއް ކަމަށްވާ ސެއިންޓް ހެލީނާއަށް 1882 ވަނަ އަހަރު ޖޮނަތަން ގެންދިޔައިރު އޭތި އޮތީ ފުރާފުރިހަމަވެފަ އެވެ.
ބެލެވޭ ގޮތުގައި އޭތި އެ ރަށަށް ގެންދިޔައީ އަލްޑަބްރާ އެޓޯލް ނުވަތަ ގްރެނިޓިކް ސީޝެލްސް އިންނެވެ. މިހާރު މި ކަހަނބު ދިރިއުޅެމުންދަނީ އެ ރަށުގެ ގަވަރުނަރުގެ ރަސްމީގެ، ޕްލާންޓޭޝަން ހައުސްގެ ބަގީޗާއެއްގަ އެވެ.
"ސައިންސް އެޑްވާންސަސް" ޖާނަލްގައި ބުދަ ދުވަހު ޝާއިއުކުރި ދިރާސާގެ އެއް މުސައްނިފު އަދި ކަލޭލް ޖަމިއްޔާގެ ރިސާޗަރެއް ކަމަށްވާ ބެންޖަމިން ވައިސްވިލް ވިދާޅުވި ގޮތުގައި، ޖޮނަތަން ފަދައިން އެހެން ބައެއް ކަންޒު ކަހަނބު ވެސް ގިނަ ދުވަހު ދިރިއުޅޭ ކަމަށް ބުނެވުނު ނަމަވެސް، އުމުރު ސާބިތުކޮށްދޭނެ އެންމެ ވަރުގަދަ ލިޔެކިޔުންތައް ހުރީ ޖޮނަތަންގެ އެވެ.
ޖޮނަތަންގެ އާދަޔާ ހިލާފު ދިގު އުމުރުގެ ސިއްރުތައް ހޯދުމަށްޓަކައި ސައިންސްވެރިން ވަނީ އޭގެ ޖީނޯމް (ޖެނެޓިކް މައުލޫމާތު) ތަރުތީބުކޮށް، އެޕިޖީނޯމް ނުވަތަ ޖީންތައް މަސައްކަތްކުރާ ގޮތް ކޮންޓްރޯލްކުރާ ކެމިކަލް މާކަރުތައް ދިރާސާކޮށްފަ އެވެ.
ވައިސްވިލް ވިދާޅުވި ގޮތުގައި، ޑީއެންއޭ މަރާމާތުކުރުމާއި، މައިޓޯކޮންޑްރިއާގެ މަސައްކަތާއި، އިންސިއުލިން ކޮންޓްރޯލްކުރުމާއި، ޓެލޯމިއާގެ މަސައްކަތްތައް ފަދަ ދިގު އުމުރާ ގުޅުންހުރި ކަންކަމުގައި ޖޮނަތަންގެ ޖީނޯމަށް އައިސްފައިވާ ބަދަލުތައް ދިރާސާއިން ވަނީ ފެނިފަ އެވެ.
މައިޓޯކޮންޑްރިއާއަކީ ސެލްތަކަށް ބޭނުންވާ ހަކަތަ އުފައްދައިދޭ ބަޔެވެ. އިންސިއުލިންއަކީ ލޭގައި ހަކުރު ހުންނަ މިންވަރު ކޮންޓްރޯލްކޮށް، ހަކަތަ ހޯދުމަށްޓަކައި ސެލްތަކަށް ހަކުރު ފޯރުކޮށްދޭ ހޯމޯންއެކެވެ. އަދި ޓެލޯމިއާއަކީ ސެލްގެ ނިއުކްލިއަސް ތެރޭގައި ޖެނެޓިކް މައުލޫމާތު އުފުލައިދޭ ކްރޮމޮޒޯމްތަކުގެ ކޮޅުގައި ހުންނަ ރައްކާތެރިކޮށްދޭ ފަށަލައެކެވެ.
މި ދިރާސާގައި ސައިންސްވެރިން ވަނީ ޖޮނަތަންގެ އެޕިޖީނޯމް، ތަފާތު އުމުރުފުރާތަކުގެ އެހެން ހަތަރު އަލްޑަބްރާ ކަހަނބާ އަޅާކިޔާފަ އެވެ. ޖޮނަތަންގެ ސާމްޕަލް ނެގީ ދުލުގެ ދަށުންނެވެ. ސެއިންޓް ހެލީނާގެ އޮފިޝަލުން ލޭގެ ސާމްޕަލް ނެގުން މަނާކުރަނީ އިންފެކްޝަން އުފެދިދާނެތީ އެވެ.
ޖޮނަތަންގެ ހަށިގަނޑުން އެހެން ކަހަނބުތަކާ ތަފާތު 287 ޖީންއެއް ސައިންސްވެރިން ވަނީ ދެނެގަނެފަ އެވެ. މީގެ ތެރޭގައި ކެންސަރު ގަނޑުތައް އުފެދުން ހުއްޓުވުމަށާއި ޑީއެންއޭ މަރާމާތުކުރުމަށް އެހީތެރިވެދޭ ޖީންތައް ހިމެނެ އެވެ. އަދި މުސްކުޅިވާ ސެލްތަކާއި ކެންސަރު ސެލްތައް ނައްތާލާ ޕްރޮޓީންއެއް އުފައްދައިދޭ ޖީންގެ އިތުރު އޭގެ ކޮޕީތަކެއް ވެސް ޖޮނަތަންގެ ހަށިގަނޑުގައި ހުރިކަން ވަނީ ފާހަގަކުރެވިފަ އެވެ.
