އަންނަ ޖޫން މަހުން ފެށިގެން ސެޕްޓެމްބަރު މަހުގެ ނިޔަލަށް ރާއްޖޭގެ ބޮޑު ބަޔަކަށް ވާރޭ ވެހޭ މިންވަރު އިތުރުވެ، ހޫނުމިންވެސް އާންމު މިންގަނޑަށް ވުރެ މަތިވާނެ ކަމަށް މޯލްޑިވްސް މީޓިއޮރޮލޮޖިކަލް ސާވިސް (މެޓް އޮފީސް) އިން ލަފާކޮށްފިއެވެ.
މެޓް އޮފީހުން ބުނީ ކުރިއަށް އޮތް ހަތަރު މަސްދުވަހުގެ ތެރޭގައި ރާއްޖޭގެ މޫސުން ހުންނާނެ ކަމަށް ބެލެވެނީ އާންމު ހާލަތަށް ވުރެ ގޯސްކޮށެވެ.
"ޖޫންއިން ސެޕްޓެމްބަރުގެ ނިޔަލަށް ލަފާ ކުރެވޭ ގޮތުން ރާއްޖޭގެ ގިނަ ސަރަހައްދުތަކަށް ވާރޭވެހޭ މިންވަރު އާންމުކޮށް މި ދުވަސްވަރު ވެހޭ ވަރަށް ވުރެ އިތުރުވުމުގެ ފުރުސަތު ބޮޑެވެ. އަދި ހުރިހާ ސަރަހައްދެއްގައި ވެސް ފިނިހޫނުމިން އާންމުކޮށް ހުންނަވަރަށް ވުރެ މަތިވާނެ ކަމަށް ވެސް ބަލެވެ އެވެ،" އެޓް އޮފީހުން އެކްސްގައި ކޮށްފައިވާ ޕޯސްޓުގައި ބުނެފައިވެ އެވެ.
މި ފޯކާސްޓު އާންމުގޮތެއްގައި ތައްޔާރު ކުރަނީ އެޕްރީލް މަހު ހުންނަ މޫސުމީ ހާލަތަށާއި އަދި މޫސުމަށް ބަދަލު އައުމަށް މެދުވެރިވާ ސަބަބުތަކަށް ރިޔާއަތްކުރެވިގެންނެވެ.
މެޓް އޮފީހުން އާންމުކުރި ޗާޓުތަކުން ދައްކާ ގޮތުގައި، މުޅި ދެކުނު އޭޝިއާ ސަރަހައްދަށްވެސް މިދުވަސްވަރު ހޫނުމިން މަތިވާނެއެވެ. ވަކިން ހާއްސަކޮށް ރާއްޖެ ހިމެނޭ ސަރަހައްދު ޗާޓުތަކުން ފާހަގަކޮށްފައިވަނީ ގަދަ ރަތް އަދި އޮރެންޖު ކުލައިންނެވެ. މިއީ އެ ސަރަހައްދުތަކުގައި ހޫނުމިން އާދަޔާ ހިލާފަށް މަތިވާނެކަމުގެ ނިޝާނެކެވެ.
