ރާއްޖޭގެ ޑިމޮކްރަޓިކް ތާރީހުގައި ފުރަތަމަ ފަހަރަށް ދެ ނޫސްވެރިޔަކު ޖަލަށް ހުކުމްކޮށް ތަހުގީގީ ނޫސްވެރިކަން މަރާލުމަށް ސަރުކާރުން އިސްވެ ކުރަމުންދާ ކަންކަމާ ދެކޮޅު ހެދުމުގެ ގޮތުން ރާއްޖޭގެ ބައެއް މީޑިއާތައް 12 ގަޑިއިރަށް މިއަދު ބްލެކްއައުޓް ކޮށްފި އެވެ.
މިއަދު ހެނދުނު 06:00 އިން އިރުއޮއްސި 06:00 އާ ހަމަށް ރާއްޖޭގެ ބައެއް މީޑިއާތަކުން ހަބަރު ގެނެސްދިނުން އެއްކޮށް މެދުކަނޑާލި އެވެ.
މި ސަރުކާރުން ނޫސްވެރިކަން ކޮންޓްރޯލް ކުރުމަށް ގިނަ މަސައްކަތްތަކެއް ދަނީ ކުރަމުންނެވެ. ސަރުކާރުން ބޭނުންނުވާ ގޮތަށް ހަބަރު ގެނެސްދޭ ނޫސްތަކާ ދެކޮޅަށް މާލީ އަދި ގާނޫނީ ފިޔަވަޅުތައް ދަނީ އަޅަމުންނެވެ.
މިނިވަން ނޫސްވެރިކަން މަރާލުމަށްޓަކައި މީޑިއާ ކޮންޓްރޯލް ގާނޫނެއް ވުޖޫދުކޮށް ކޮމިޝަނެއް އުފައްދައި ވަރަށް ބޮޑަށް މީޑިއާތައް ދަނީ ރެގިއުލޭޓް ކުރަމުންނެވެ. އަދި ދައުލަތުގެ މީޑިއާ ވެސް ސަރުކާރުން "ހައިޖެކު" ކޮށް މިއިން ދުވަހަކު ނުފޫޒު ނުފޯރުވާ މިންވަރަށް ގެންދަނީ ފޯރުވަމުންނެވެ.
މިދިޔަ ހަފްތާގެ ހޯމަ ދުވަހު ރައީސް މުހައްމަދު މުއިއްޒުގެ ނޫސްވެރިންގެ ބައްދަލުވުން ތާވަލުކުރި ދުވަހުގެ ކުރީ ރޭ "އަދަދު" ނޫހުން ނެރުނު "އައިޝާ" ޑޮކިއުމެންޓަރީގެ ވާހަކަ ނުދެއްކުމަށް އެންމެހާ ރައްޔިތުންނަށް ރައްދުވާ ގޮތަށް ކްރިމިނަލް ކޯޓުން އަމުރެއް (ގެގް އޯޑަރު) ނެރުނެވެ. އެ ޑޮކިއުމެންޓަރީއަކީ ރައީސް އޮފީހުގެ ކުރީގެ މުވައްޒަފަކު މުއިއްޒުގެ މައްޗަށް ބޮޑެތި ތުހުމަތުތަކެއް ކޮށް އެ ވާހަކަތައް ގެނެސްދީފައިވާ ޑޮކިއުމެންޓްރީ އެވެ. އެ އަންހެން މުވައްޒަފުގެ ތުހުމަތުތައް މުއިއްޒު ވަނީ ދޮގު ކުރައްވާފަ އެވެ.
ނޫސްވެރިންގެ ބައްދަލުވުމުގައި އަދަދު ނޫހުގެ މުހައްމަދު ޝަހުޒާން މުއިއްޒުއާ ސުވާލުކުރީ ރައީސް އޮފީހުގެ މުވައްޒަފަކަށް ނުގަޑިތަކެއްގައި ސިގްނަލް އެޕްލިކޭޝަން މެދުވެރިކޮށް ގުޅާފައިވޭތޯ ބެލުމަށެވެ. އެ ސުވާލު ކުރަމުން ދަނިކޮށް ކްރިމިނަލް ކޯޓުގެ ގެގް އޯޑަރާ ހިލާފުވެފައިވާ ކަމަށް "ހުކުމް ކުރައްވާފަ" އެވެ. ޝަހުޒާން ސުވާލު ކުރަމުން ދަނިކޮށް މައިކު ކަނޑާލައި ސެކިއުރިޓީ ހިމެނޭހެން ގިނަ އެ އޮފީހުގެ އަދަދެއްގެ މުވައްޒަފުންތަކެއް އައިސް އޭނާ ޕްރެސަް ކޮންފަރެންސުން ބޭރުކޮށްލި އެވެ.
އެ ސުވާލު ކުރި މައްސަލާގައި ކޯޓުގެ ހުރުމަތް ކެނޑި މައްސަލައެއް ޝަހުޒާންގެ މައްޗަށް ހަމަ އެ ދުވަހު ބަލަން ފެށި އެވެ. އަދި ކްރިމިނަލް ކޯޓުގެ ގެގް އޯޑަރާ ހިލާފުވެފައިވާ ކަމަށް ތުހުމަތުކޮށް އަދަދުގެ ނޫސްވެރިޔާ ލީވާން އަލީ ނާސިރުގެ މައްޗަށް ވެސް ކޯޓުގެ ހުރުމަތް ކެނޑިކަމުގެ ތުހުމަތުގައި މައްސަލައެއް ބަލަން ފެށި އެވެ. އެއީ ކްރިމިނަލް ކޯޓުން ގެގް އޯޑަރު ނެރެފައިވާ ކަމަށް ބަޔާންކޮށް ލީވާން ލިޔުނު ހަބަރަކާ ގުޅޭ މައްސަލައެކެވެ.
އެ އޮފީހުން އިންތިޒާމުކޮށްގެން ބާއްވާ އެއްވެސް ނޫސްވެރިންގެ ބައްދަލުވުމެއްގައި އަދަދު ނޫހާއި އަދަދު ނޫހުގެ ނޫސްވެރިންނަށް ބައިވެރިނުވެވޭނެ ކަމަށް ރައީސް އޮފީހުން އެންގި އެވެ. އެ ދުވަހު ބޭއްވި ނޫސްވެރިންގެ ބައްދަލުވުމަށް ފަހު އެމްއެންޑީއެފް ސެކިއުރިޓީން ނޫސްވެރިއެއްގެ ފޯނު ވެސް ޗެކު ކުރި އެވެ. ރާއްޖެ ޓީވީގެ ނޫސްވެރިޔާ ޝައިހާން ޒަރީރުގެ ފޯނު އަތުލައި ޗެކުރީ ނޫސްވެރިންގެ ބައްދަލުވުން ކުރިއަށް ދަނިކޮށް ވީޑިއޯކުރި ކަމަށް ތުހުމަތުކޮށެވެ.
ޖެހިގެން އައި ދުވަހު ލީވާން އާއި ޝަހުޒާންގެ މައްޗަށް އަވަސް ޝަރީއަތެއް ހިންގައި އެ ދެ މީހުން ޖަލަށް ލުމަށް ކްރިމިނަލް ކޯޓުން ހުކުމް ކުރި އެވެ. ދެ ނޫސްވެރިން ވެސް ތަކުރާރުކޮށް ވަކީލަކު އައްޔަނުކުރުމަށް އެކަށީގެންވާ ވަގުތު ދިނުމަށް އެދުމުން ވެސް މައްސަލަ ބެއްލެވި ފަނޑިޔާރުން ނިންމެވީ އެންމެ ދެ ގަޑިއިރު ދިނުމަށެވެ.
ހަބަރެއް ލިޔެގެން ލީވާންގެ މައްޗަށް 10 ދުވަހުގެ ޖަލު ހުކުމެއް ކޯޓުން އިއްވިއިރު މުއިއްޒުއާ ސުވާލުކޮށްގެން ކުށްވެރިވި ޝަހުޒާންގެ މައްޗަށް އިއްވީ 15 ދުވަހުގެ ޖަލު ހުކުމެކެވެ. އެ މީހުން ހުކުމް ތަންފީޒުކުރަމުން ދަނީ މާފުށީ ޖަލުގަ އެވެ.
ރާއްޖޭގެ ނޫސްވެރިކަމުގެ މިނިވަންކަމާއި ހިޔާލު ފާޅުކުރުމުގެ މިނިވަންކަމުގެ ހައްގުތަކަށް ސަރުކާރުން އަރައިގަންނަމުންދާތީ ކުރީގެ ތިން ރައީސުން ކަމަށްވާ މުހައްމަދު ނަޝީދު، އަބްދުالله ޔާމީން އަދި އިބްރާހިމް މުހައްމަދު ސޯލިހު ވަނީ އެކުގައި މަސައްކަތް ކުރުމަށް ނިންމަވާފަ އެވެ.
