ރައީސް މުހައްމަދު މުއިއްޒަށް ސީރިއަސް ތުހުމަތުތަކެއް އަމާޒުވެފައިވާ މި ދަނޑިވަޅުގައި އެންމެ ރަނގަޅު ގޮތަކީ އެމަނިކުފާނު މަގާމުން ވަކިކޮށް، ވެރިކަން ހިންގުން ނައިބު ރައީސް ހުސެން މުހައްމަދު ލަތީފްއާ ހަވާލުކުރުން ކަމަށް ވެލިދޫ ދާއިރާގެ މެމްބަރު މުހައްމަދު އައްބާސް ވިދާޅުވެއްޖެ އެވެ.
ސޯޝަލް މީޑިއާ އެކްސްގައި މިއަދު ކުރެއްވި ޕޯސްޓުތަކެއްގައި އައްބާސް ވަނީ މުއިއްޒަށް ވަރަށް ބޮޑަށް ފާޑުވިދާޅުވެ، އެމަނިކުފާނު ޝަރީއަތުގެ ކުރިމައްޗަށް ހާޒިރު ކުރަން ގޮވާލައްވައިފަ އެވެ. މިއީ ޕީޕަލްސް ނޭޝަނަލް ކޮންގްރެސް (ޕީއެންސީ) އަށް އެންމެ ފައިދާ ހުރި ގޮތް ކަމަށް އޭނާ ވިދާޅުވި އެވެ.
"މެޖޯރިޓީ ޕާޓީއަށް މި ވަގުތު އެންމެ މޮޅު ގޮތަކީ އޭނާގެ މައްޗަށް ނޯ ކޮންފިޑެންސް ވޯޓެއް ނަގައި އޭނާ ޝަރީއަތުގެ ކުރި މައްޗަށް ހާޒިރުކުރުން! ދައުރުގެ ބާކީ ބައި ނައިބު ރައީސް އާ ވެރިކަން ކުރަން ހަވާލުކުރުން. މިކަން މިގޮތަށް ނުކޮށް މެޖޯރިޓީ ޕާޓީއަށް 2028 ކާމިޔާބެއް ނުވާނެ. އޭނާގެ ނޯ ކޮންފިޑެންސް ނެގުމަށް ފަހު ގާނޫނާ ހިލާފަށް އޭނާ ކޮށްފައިވާ މުޑުދާރު ކަންކަން ތަހުގީގުކޮށް އޭނާގެ މައްޗަށް މިހާރު ޝަރީޢަތް ހިންގީމަ ރައްޔިތުންނަށް ފެންނާނެ މެޖޯރިޓީ ޕާޓީން ޤާނޫނީ ވެރިކަން ދަމަހައްޓާކަން،" އައްބާސް ލިޔުއްވި އެވެ.
އޭގެ އިތުރުން މިދިޔަ އެޕްރީލް މަހުގެ ހަތަރު ވަނަ ދުވަހު ބޭއްވި ކައުންސިލްތަކުގެ އިންތިހާބާއި މަޖިލިސް އިންތިހާބާއި ރިޔާސީ އިންތިހާބު އެއް ދުވަހެއްގައި ބޭއްވުމަށް ނެގި ހިޔާލު ހޯދުމުގެ ވޯޓުގައި ޕީއެންސީ ބަލިވީ މުއިއްޒަށް "ރައްޔިތުން އިތުބާރު ނުކުރާތީ" ކަމަށް ވެސް އައްބާސް ފާހަގަކުރެއްވި އެވެ.
"އޭނާ ދޮގުހެދިލެއް ގިނަވުމުގެ ސަބަބުން ރިފަރެންޑަމު ވޯޓުން މެޖޯރިޓީ ޕާޓީ ބަލިވީ. މިހާރު މުޅި ޕާޓިން އެ އުޅެނީ ރައީސް އޮފީސް ތެރޭގައި އޭނާ އަންހެނަކާ މަންޖޯޅުވި ކަންތަކުން ސަލާމަތް ނުވެވިގެން. އޭނަ ބޭރު ކުރުމަކީ ގައުމަށް ވެސް އަދި މެޖޯރިޓީ ޕާޓީއަށް ވެސް އެންމެ މޮޅު ގޮތް. މީ މެޖޯރިޓީ ޕާޓީގެ ގިނަ މެންބަރުން މިހާރު ވިސްނަމުންދާ އަދި ގަބޫލު ކުރާ ގޮތް،" އައްބާސް އިތުރަށް ވިދާޅުވި އެވެ.
އައްބާސް ކުރެއްވި އެހެން ޕޯސްޓެއްގައި ވިދާޅުވީ އަދަދު ނޫހުން އުފެއްދި "އައިޝާ" ޑޮކިޔުމެންޓްރީގައި މުއިއްޒަށް ސީރިއަސް ތުހުމަތުތަކެއް ކުރި އަންހެން މީހާއާއެކު އޭނާ ވާހަކަ ދައްކަން އިން ވަގުތު އެ އަންހެން މީހާއަށް މުއިއްޒު ފޯނުކުރި ކަމަށާއި "ހައި ބޭބީ" ކިޔާފައި ފަހުން މެސެޖު ކުރި ކަމަށެވެ.
އެ ޑޮކިޔުމެންޓްރީގައި ވާހަކަދެއްކީ ރައީސް އޮފީހުގެ ވަޒީފާއެއްގައި ކުރިން ހުރި އަންހެނެކެވެ. އޭނާ ވަނީ ޖިންސީ ފުރައްސާރަ އާއި ކޮރަޕްޝަން ފަދަ އެތައް ސީރިއަސް ތުހުމަތުތަކެއް މުއިއްޒަށް ކޮށްފަ އެވެ. އެ ތުހުމަތުތަކުގެ ވާހަކަދެއްކުން މަނާކުރުމަށް ކޯޓުން މިދިޔަ އާދީއްތަ ދުވަހު މުޅި ރާއްޖޭގެ ރައްޔިތުންގެ މައްޗަށް އަމުރެއް ނެރުނެވެ.
