ރައީސް އޮފީހުގެ ކުރީގެ މުވައްޒަފަކު ރައީސް މުހައްމަދު މުއިއްޒަށް ކުރާ ޖިންސީ ތުހުމަތުތަކުގެ ވާހަކަ ނުދައްކަން ކްރިމިނަލް ކޯޓުން މިރޭ އަމުރެއް ނެރުނުއިރު، ރައީސް ބާއްވާ ނޫސްވެރިންގެ ބައްދަލުވުމެއް މާދަމާ އޮންނާނެ އެވެ.
އެންމެހާ ރައްޔިތުންނަށް ރައްދުވާ ގޮތަށް ކޯޓުން ނެރުނު އަމުރުގައި ބުނެފައި ވަނީ ރައީސްއަށް ތުހުމަތު ކުރާ ރައީސް އޮފީހުގެ ކުރީގެ މުވައްޒަފުގެ ބަސް ގެނެސްދީ އަދަދު ނޫހުން ޝާއިއު ކުރި ޑޮކިއުމެންޓަރީ "އައިޝާ" ދައުރު ނުކުރުމަށެވެ. އަދި އެކަމާ ގުޅޭ ވާހަކައެއް ވެސް ނުދެއްކުމަށް އެ އަމުރުގައިވެ އެވެ.
ކޯޓުން އެ އަމުރު ނެރުނުއިރު، ރައީސުލްޖުމްހޫރިއްޔާގެ އޮފީހުގައި މާދަމާ ހެނދުނު 10:00 ޖަހާއިރު މުއިއްޒު ނޫސްވެރިންނާ ބައްދަލު ކުރައްވާނެ އެވެ. އެ ޑޮކިއުމެންޓަރީގެ މައްސަލަ ފުލުހުން ބަލަން ފެށީ ވެސް ނޫސްވެރިންގެ ބައްދަލުވުމެއްގައި އެ މައްސަލަ ބަލަން މުއިއްޒު އަމުރު ކުރުމުންނެވެ.
އެ މައްސަލައިގައި ޕްރޮސެކިއުޓާ ޖެނެރަލްގެ އޮފީހުން ވަނީ އަދަދު ނޫހުގެ ސީއީއޯ ހުސެއިން ފިޔާޒް މޫސާ އާއި އެޑިޓަރު ހަސަން މުހައްމަދުގެ މައްޗަށް ޖިނާއީ ދައުވާއެއް އުފުލައިފަ އެވެ. އެއީ ގަޒްފު ކުރުމުގެ ކުށުގެ ދައުވާ އެވެ. އޭގެ ކުރިން ފިޔާޒް އާއި ހަސަންގެ ޕާސްޕޯޓު ހިފަހައްޓަން ވެސް ކޯޓުން އަމުރެއް ނެރުނެވެ.
ޑޮކިއުމެންޓަރީގެ މައްސަލަ ބަލަން މުއިއްޒު އަމުރު ކުރީ އެމަނިކުފާނަށް ކުރެވޭ ތުހުމަތުތަކާ ގުޅޭ ގޮތުން އަދަދު ނޫހުން ސުވާލު ކުރުމުންނެވެ. ހަމަ އެ ދުވަހު ފުލުހުން ވަނީ އަދަދު ނޫހުގެ އޮފީސް ރެއިޑުކޮށް ލެޕްޓޮޕްތަކާއި ހާޑް ޑިސްކް ހިމެނޭހެން 20 އިލެކްޓްރޯނިކް ޑިވައިސް ގެންގޮސްފަ އެވެ.
އަދަދު ނޫހުގެ އޮފީހަށް ރެއިޑު ކުރީ، އެ މައްސަލަ ތަހުގީގު ކުރުމަށް ރައީސް މުއިއްޒު އެންގެވިތާ 12 ގަޑިއިރެއްހާއިރު ފަހުންނެވެ. އަދަދު ނޫހުގެ މައްސަލަ ތަހުގީގު ކުރަން މުއިއްޒު އެންގެވީ ވަގުތުން ގެނެސްދިން ނޫސްވެރިންގެ ބައްދަލުވުމެއްގެ ތެރެއިން ރައީސް މުއިއްޒަށް އަމާޒުވެފައިވާ ސީރިއަސް ތުހުމަތުތަކާ ބެހޭ ގޮތުން މި ނޫހުގެ ނޫސްވެރިޔާ މުހައްމަދު ޝަހުޒާން ސުވާލު ކުރުމުންނެވެ.
"އާދެ، ކަނޑައެޅިގެން ދޮގު ވާހަކައެއް ތިއީ އިނގޭތޯ. އަދަދު ނޫހުން ތި ވިދާޅުވީ ތިބޭފުޅުން ހެއްދެވި ވީޑިއޯގެ ވާހަކަ. އެހެންވީމަ ކަނޑައެޅިގެން ދޮގު ވާހަކަ ހިމެނޭ ގޮތަށް ތިބޭފުޅުން ވީޑިއޯއެއް ހެއްދެވި ހެއްދެވުމަށް ތި އިއުތިރާފުވަޑައިގެންނެވީ. މިފަދަ ދޮގު ވާހަކަ ދެއްކި ހުރިހާ ފަރާތްތަކާ ދެކޮޅަށް އަޅުގަނޑު ދައުވާ ކުރަން އެދެން ކަމާބެހޭ ހުރިހާ ފަރާތްތަކުގެ ކިބައިން،" މުއިއްޒު ވިދާޅުވި އެވެ.
