ދުނިޔޭގެ އެކި ކަންކޮޅުތަކުގައި އެއް ވަގުތެއްގައި ބާއްވާ އެންމެ ބޮޑު ދުވުމުގެ ހަރަކާތް ކަމަށްވާ ވަންރަން ގްލޯބަލްގެ ރާއްޖޭގެ އެޑިޝަން މި މަހުގެ 23 ވަނަ ދުވަހު ހުޅުމާލޭގައި ބޭއްވުމަށް ތައްޔާރުވެއްޖެ އެވެ.
މި ބައިނަލްއަގުވާމީ ބޮޑު ހަރަކާތް ރާއްޖޭގައި އިންތިޒާމުކުރަނީ ވީރަން މޯލްޑިވްސްގެ ފަރާތުންނެވެ. މި ހަރަކާތަކީ ދުނިޔޭގެ އެކި ގައުމުތަކުގައި އެއް ވަގުތެއްގައި ފަށައިގެން ކުރިއަށްގެންދާ އެންމެ ބޮޑު ހާފް މެރަތަން އެވެ.
މި ހަރަކާތުގައި ދުނިޔޭގެ 35 އަށްވުރެ ގިނަ ގައުމަކުން ބައިވެރިވާއިރު، ރާއްޖޭގެ ދުވުންތެރިން ވެސް ބައިވެރިވާނެ އެވެ. މި ދުވުމުގައި ހިމެނޭ ކެޓަގަރީތަކުގެ ތެރޭގައި 21.1 ކިލޯމީޓަރުގެ ހާފް މެރަތަންއާއި، 10 ކިލޯމީޓަރުގެ ދުވުމާއި، 5 ކިލޯމީޓަރުގެ ދުވުމުގެ އިތުރުން ކުޑަކުދިންނަށް ހާއްސަ 1 ކިލޯމީޓަރުގެ ދުވުން ހިމެނެ އެވެ.
ވަންރަން ގްލޯބަލް އަކީ އެއް ވަގުތެއްގައި އެންމެ ގިނަ މީހުން ބައިވެރިވެގެން ދުވި ހަރަކާތުގެ ގޮތުގައި ދެ ފަހަރެއްގެ މަތިން ގިނިސް ވޯލްޑް ރެކޯޑް ހާސިލްކޮށްފައިވާ ދުނިޔޭގެ ފެންވަރުގެ ހަރަކާތެކެވެ. މި އަހަރުގެ ހަރަކާތުގައި ދުނިޔޭގެ އެކި ކަންކޮޅުތަކުން ޖުމްލަ ދެ ލައްކަ ފަންސާސް ހާހަށްވުރެ ގިނަ ދުވުންތެރިން ބައިވެރިވާނެ ކަމަށް އިންތިޒާމުކުރާ ފަރާތްތަކުން ލަފާކުރެ އެވެ.
މި ބޮޑު ހަރަކާތުގައި ބައިވެރިވުމަށް ބޭނުންވާ ފަރާތްތަކަށް ރަޖިސްޓްރީވުމުގެ ފުރުސަތު މިހާރު ވަނީ ހުޅުވާލާފަ އެވެ.
މި ހަރަކާތާ ގުޅޭ އިތުރު މައުލޫމާތު ހޯދުމަށާއި ދުވުމުގައި ބައިވެރިވުމަށް ރަޖިސްޓްރީ ކުރުމަށް ވީރަން މޯލްޑިވްސްގެ ރަސްމީ ވެބްސައިޓަށް ޒިޔާރަތްކުރުމަށް އިންތިޒާމުކުރާ ފަރާތުން އެދެ އެވެ.
