ސިފައިންގެ ހިދުމަތުގައި ތިބޭ މީހުން ވަކި ރޭންކެއްގައި ގިނަ ދުވަސްތަކެއް ވަންދެން ތިބެންޖެހުމުން ހިދުމަތުން ވަކިވާންޖެހޭ ގޮތަށް އޮތް އުސޫލު ބަދަލުކޮށް، ސިފައިންގެ ގާނޫނާއި ގަވާއިދުތަކަށް ބޮޑެތި އިސްލާހުތަކެއް ގެނައުމަށް ރައީސް މުހައްމަދު މުއިއްޒު ނިންމަވައި އެކަން ރޭ އިއުލާނު ކުރައްވައިފި އެވެ.
ސިފައިންގެ ދުވަސް ފާހަގަކުރަން ކަޅުތުއްކަލާ ކޮށީގައި ރޭ ބޭއްވި ޖަލްސާގައި މުއިއްޒު ވިދާޅުވީ މިހާރު އަމަލުކުރަމުންދާ ގަވާއިދުތައް ހުރި ގޮތުން، އެއް ރޭންކެއްގައި ވަކި މުއްދަތަކަށް މަޑުކުރަން ޖެހިއްޖެނަމަ، ހިދުމަތުން ދުރަށް ދާންޖެހޭ ކަމަށާއި މިއީ އެންމެ އަދުލުވެރި ގޮތް ނޫން ކަމަށާއި، މީގެ ސަބަބުން ގައުމަށާއި ސިފައިންގެ މީހާ އަށް ވެސް ގެއްލުންތަކެއް ކުރިމަތިވާ ކަމަށެވެ.
"އަޅުގަނޑު ގަބޫލުކުރާ ގޮތުގައި މިއީ އެންމެ އަދުލުވެރި ގޮތެއް ނޫން. އަދި އެ ސިފައިންގެ ހިދުމަތްތެރިޔާއަށް ވެސް އެންމެ އަދުލުވެރި ގޮތެއް ނޫން. ގައުމަށް ވެސް އެންމެ ރަނގަޅު ގޮތެއް ނޫން. އެހެންވީމަ ސިފައިންގެ ހިދުމަތުގައި ތެދުވެރިކަމާއި އިހުލާސްތެރިކަމާއެކީގައި ހިދުމަތް ކުރަމުންދާ ސިފައިންގެ މީހުންނަށް އަދި ރޭންކުގައި ވަކި މުއްދަތެއް ވިޔަސް އަދި ލިމިޓޭޝަން މިހާރު އޮތް ގަވާއިދުގެ ތެރެއިން ހަމަވާ ގޮތަށް އޮތް އޮތުން އެއީ ބަދަލުކުރަންޖެހޭ ކަމެއްގެ ގޮތުގައި އަޅުގަނޑު ގަބޫލުކުރަން، އިރާދަ ކުރެއްވިއްޔާ އެގޮތަށް ބަދަލުކޮށްދީ ސިފައިންގެ ހިދުމަތުގައި ދެމިހުރެވޭނެ ގޮތް އިރާދަކުރެއްވިއްޔާ ހަދަން ގަސްދުކުރަން. އެގޮތަށް އިރާދަކުރެއްވިއްޔާ ބަދަލުކޮށްދޭނަން،" މުއިއްޒު ވިދާޅުވި އެވެ.
ރިޓަޔާމަންޓު ސިޔާސަތަށް ބަދަލެއް
ސިފައިންގެ ރިޓަޔާމަންޓު ގަވާއިދަށް އިސްލާހުތައް ގެނެސް ހިދުމަތުން ވަކިވުމުން ލިބޭ މަންފާ، ހިދުމަތުގެ އަހަރުގެ ނިސްބަތަށް ބަދަލުކުރައްވާނެ ކަމަށް ވެސް މުއިއްޒު ވިދާޅުވި އެވެ.
"އެއީ 30 އަހަރަށް ވުރެ ގިނަ އަހަރު ވެގެން ދާއިރު، 30 އަހަރު ވިޔަސް 35 އަހަރު ވިޔަސް ތަފާތެއް ނެތް ރިޓަޔާމަންޓުގައި މިހާރު ލިބޭ ބެނެފިޓަށް ބަލާއިރު. މިއީ ބަދަލުކުރަންޖެހޭ ކަމެއް ކަމަށް ގަބޫލުކުރަން. އެހެންވީމަ ސިފައިންގެ ރިޓަޔަމަންޓު ގަވާއިދު މި ދެންނެވި ގޮތަށް ހިދުމަތްކުރި އަހަރުގެ ނިސްބަތުން އެ ލިބޭ ބެނެފިޓު ކަނޑައަޅާ ގޮތަށް ބަދަލުކުރަން ގަސްދުކުރަން،" މުއިއްޒު ވިދާޅުވި އެވެ.
"އަޅުގަނޑު ގަބޫލުކުރާ ގޮތުގައި މިއީ މިއަދާ ހަމައަށް އައިރުގައި ވެސް ނޫނީ އަޅުގަނޑުމެން މިކަމާ ތިބޭފުޅުންގެ ހިދުމަތްތައް ރަނގަޅު ކުރުމަށް ޒިންމާއާ ހަވާލުވެގެން އައިއިރުގައި ވެސް ރަނގަޅުވެފައި ހުންނަންޖެހޭނެ ކަންތައް."
ސިފައިންގެ ފައުޖު ބޮޑުކޮށް ސިފައިންގެ މީހާގެ އާއިލާ ދިރިއުޅޭ ރަށް އަތޮޅު ނުވަތަ ސަރަހައްދަކާ އެންމެ ކައިރީގައި ހުންނަ ކޮމާންޑު ސެންޓަރެއްގައި ހިދުމަތް ކުރެވޭ ގޮތަށް އުސޫލު ބަދަލުކުރާނެ ކަމަށް ވެސް މުއިއްޒު ވިދާޅުވި އެވެ.
"ހިދުމަތް ފުޅާކުރަން ބަލާއިރު ކޮންމެ އޭރިއާ ކޮމާންޑަކާ އެންމެ ކައިރި ސަރަހައްދުތަކަށް ވިސްނައިގެން ކޮންމެ ސިފައިންގެ މީހަކުގެ އާއިލާ ދިރިއުޅޭ ސަރަހައްދަކީ ބަލައި އެ ސަރަހައްދެއް ހިމެނޭ އޭރިއާ ކޮމާންޑެއްގައި ޑިއުޓީ އަދާކުރެވޭނެ ފުރުސަތު ގާއިމުކޮށްދޭން އަޅުގަނޑު ގަސްދުކުރަން،" މުއިއްޒު ވިދާޅުވި އެވެ.
މި ބަދަލާއެކު، ސިފައިންގެ ފައުޖު ވެސް ވަރުގަދަކޮށް، ބޮޑުކުރަންޖޭ ކަމަށް އެމަނިކުފާނު ވިދާޅުވި އެވެ. އެކަމަށްޓަކައި ދައުލަތުގެ މިއަހަރު ބަޖެޓުގައި އިސްކަމެއް ދީފައިވާނެ ކަމަށާއި ބޭނުމަކީ ޒުވާނުން އިތުރުކުރުން ކަމަށް މުއިއްޒު ފާހަގަ ކުރެއްވި އެވެ.
