ކުރިއަށް އޮތް 2028 ވަނަ އަހަރުގެ ރިޔާސީ އިންތިހާބު ރައީސް މުހައްމަދު މުއިއްޒު ބޮޑުތަނުން ކާމިޔާބު ކުރައްވާނެ ކަމަށާއި، އެމަނިކުފާނު ވެވަޑައިގަންނަވާނީ ރާއްޖޭގައި ދެވަނަ ދައުރަކަށް އިންތިހާބުވާ ފުރަތަމަ ރައީސަށް ކަމަށް ރައްޔިތުންގެ މަޖިލީހުގެ ރައީސް އަބްދުއްރަހީމް އަބްދުﷲ ވިދާޅުވެއްޖެއެވެ.
އއ. ހިމަންދޫ ކައުންސިލާއި އަންހެނުންގެ ތަރައްގީއަށް މަސައްކަތްކުރާ ކޮމިޓީގެ ހުރިހާ ގޮނޑިތަކެއް ޕީއެންސީން ކާމިޔާބު ކުރުމާ ގުޅިގެން، އެ ކާމިޔާބީ ފާހަގަކުރުމަށް މާލޭގައި ހުންނަ ޕީއެންސީގެ މައި ޖަގަހައިގައި ރޭ ބޭއްވި ޖަލްސާގައި އަބްދުއްރަހީމް ވިދާޅުވީ މަގުމަތީގައާއި ކަންކަންމަތީގައި ދައްކާ ވާހަކަތަކަށް ސަރުކާރަށް ތާއީދުކުރާ ރައްޔިތުން ސަމާލުކަން ދޭން ނުޖެހޭ ކަމަށެވެ.
އެ މަނިކުފާނު މިހެން ވިދާޅުވީ އޭޕްރީލް 4 ގައި ބޭއްވި ލޯކަލް ކައުންސިލް އިންތިހާބުގެ ނާކާމިޔާބީ އާއި އެ ދުވަހު ބޭއްވި ފެންނަ ނުފެންނަ ވޯޓުން ވި ބޮޑު ބައްޔަށް ފަހު، 2028 މުއިއްޒުއަށް ކާމިޔާބު ނުވާނެ ކަމަށް ވާހަކަތައް ދެކެވެން ފަށާފައިވަނިކޮށެވެ.
ނަމަވެސް އަބްދުއްރަހީމް ވިދާޅުވީ އެފަދަ ވާހަކަތަކަށް މާޔޫސްނުވުމަށެވެ.
"އެއްގޮތަށް ވެސް ޝައްކު ނުރައްވާތި، މާޔޫސްވެވަޑައިނުގަންނަވާތި. އިރާދަކުރެއްވިއްޔާ މާތް ﷲ ސުބުހާނަހޫ ވަތަޢާލާގެ ރަހުމަތްފުޅުން 2028 ވަނަ އަހަރު މިގައުމުގައި ބޭއްވޭ ރިޔާސީ އިންތިހާބު ބޮޑުތަނުން ކާމިޔާބުކުރާނީ ރައީސުލްޖުމްހޫރިއްޔާ ޑރ. މުހައްމަދު މުއިއްޒު. އެކަން ކުރާނީ ދިވެހިރައްޔިތުންގެ ލޯތްބާއި އިހުތިރާމު ހޯދައިގެން، ތާއީދު ހޯއްދަވައިގެން ރައްޔިތުންގެ މަޝްވަރާއާއެކީގައި،" އަބްދުއްރަހީމް ވިދާޅުވި އެވެ.
އަބްދުއްރަހީމް ފާހަގަ ކުރެއްވި ގޮތުގައި މުއިއްޒަށް ދެ ވަނަ ދައުރެއް ދޭންޖެހޭ ސަބަބަކީ ގައުމުގެ ކަންކަން ނިންމާނީ ރައްޔިތުން ބޭނުންވާ ގޮތަށް ކަމަށާއި ގައުމުގެ މިނިވަންކަމުގެ ރޮނގު ދަމާނީ ނިކަން ފަލަކޮށް ރަތްކުލައިން ކަމަށް އެމަނިކުފާނު ވިދާޅުވާތީ އެވެ.
އިންޑިއާ ސިފައިން ރާއްޖެއިން ފޮނުވާލުމަކީ ޑިޕްލޮމަސީގެ ރީތި އުސޫލުން ކުރެއްވި ކަމެއް ކަމަށާއި އެކަމާ ގުޅޭގޮތުން އިދިކޮޅުން ދައްކާ ވާހަކަތަކަކީ ކުޑަކުދިން ގާތު ދައްކާ ކަހަލަ ވާހަކަތަކެއް ކަމަށް އަބްދުއްރަހީމް ސިފަކުރެއްވިއެވެ.
"އިންޑިއާ ސިފައިން ވަރަށް ސުލުހަވެރިކަމާއެކީ ޑިޕްލޮމަސީގެ ރީތި އުސޫލުން މިގައުމުން އިންޑިއާ ސަރުކާރުން ގެންދިޔައީމަ މި ބުނަނީ ނޫނެކޭ މިހާރު މަދަނީ މީހުންގެ ޔުނިފޯމު އަޅައިގެންނޭ އައިސް މިތިބެނީ، މިއީ ކުޑަކުދިންގާތު ދައްކާ ކަހަލަ ވާހަކަ. އެހެންވެގެން މިދަންނަވަނީ ކަންކަން މަތިންނާއި މަގުތައް މަތީ ދައްކާ ވާހަކަ އަޑުނާހާށޭ،" އަބްދުއްރަހީމް ވިދާޅުވި އެވެ.
މުއިއްޒުގެ ރިޔާސީ ވައުދަކަކީ އިންޑިއާގެ އަސްކަރިއްޔާ ރާއްޖޭން ބޭރުކުރުމެވެ. ނަމަވެސް އަދިވެސް އިންޑިއާގެ މަތިންދާ ބޯޓާއި ދެ ހެލިކޮޕްޓަރު ރާއްޖޭގައި ބޭނުންކުރަމުންދެ އެވެ.
ކުރީގެ ރައީސް އަބްދުﷲ ޔާމީނަށް ފާޑުވިދާޅުވުމުގެ ގޮތުން އަބްދުއްރަހީމް ވިދާޅުވީ ޕީއެންސީއަކީ ވޯޓުން ބަލިވުމުން ކޯޓަށް ގޮސްގެން ނަތީޖާ ނެރޭ ބައެއް ނޫން ކަމަށާއި، އެއީ ރައްޔިތުންގެ ނިންމުމަށް އިހުތިރާމުކޮށް ރައްޔިތުންގެ ވިންދާ އެއްގޮތަށް ކުރިއަށްދާން ކެރޭ ފިކުރެއް ކަމަށް އޭނާ ވިދާޅުވިއެވެ.
އެ މަނިކުފާނު އިޝާރާތް އެ ކުރެއްވީ 2018 ގެ އިންތިހާބުން ޔާމީން ބަލިވުމުން ކޯޓަށް ދިޔުމަށެވެ. އަބްދުއްރަހީމްގެ ވާހަކަ މިހާރު ބަދަލުވިއިރު އޭރު އެ މަނިކުފާނު ހުންނެވީ ޔާމީނަށް ތާއިދު ކުރައްވައިގެންނެވެ.
