ޒިއުރިކް (މެއި 8) - އިންޓަނޭޝަނަލް އޮލިމްޕިކް ކޮމިޓީ (އައިއޯސީ) އިން ބެލަރޫސަށް ދީފައި އޮތް ސަސްޕެންޝަން އުވާލި ނަމަވެސް، ރަޝިއާ އަށް ދީފައި އޮތް އަދަބު ދަމަހައްޓަން ނިންމައިފި އެވެ.
ރަޝިއާ އާއި ބެލަރޫސް އަށް އައިއޯސީން ސަސްޕެންޝަނެއް ދިނީ 2022 ވަނަ އަހަރު ރަޝިއާ އިން ޔޫކްރެއިނާ ދެކޮޅަށް ފެށި ހަނގުރާމައާ ހެދި އެވެ. އަދި، ރަޝިއާ އެންމެ ފުރަތަމަ ސަސްޕެންޑްކުރިއިރު، އެ ގައުމަށް ސަޕޯޓް ދޭތީވެ، ފަހުން ބެލަރޫސް އަށް ވެސް ފިޔަވަޅު އެޅީ އެވެ.
އެ ގޮތުން، ބެލަރޫސް އަށް ދީފައިވާ އަދަބު އުވާލައިފި ކަމަށް އައިއޯސީން ވަނީ މުބާރާތްތަކުގައި ވާދަކުރާ އޮގަނައިޒަރުންނަށް އަންގައިފަ އެވެ. އެހެން ނަމަވެސް، އެތުލެޓިކްސްގެ ދުނިޔޭގެ ޖަމިއްޔާ، ވޯލްޑް އެތުލެޓިކްސް އިން ނިންމީ އަދިވެސް، ރަޝިއާ އެކޭ އެއްގޮތަށް ބެލަރޫސްގެ ސަސްޕެންޝަން ވެސް ބަދަލެއް ނުގެނެސް ދެމެހެއްޓުމަށެެވެ.
މީގެ ހަތަރު އަހަރު ކުރިން، ރަޝިއާ އާއި ބެލަރޫސް އަށް ދިން މި އަދަބު އެކި ފަހަރު މަތިން އައިއޯސީން ވަނީ މުރާޖާކޮށްފަ އެވެ. އެ ގޮތުން، 2023 ވަނަ އަހަރު އައިއޯސީން ވަނީ މުބާރާތްތަކުގައި ރަޝިއާ އާއި ބެލަރޫސްގެ އެތުލީޓުންނަށް ހުދު ދިދައިގެ ދަށުން، ނިއުޓްރަލް އެތުލީޓުންގެ ގޮތުގައި މުބާރާތްތަކުގައި ވާދަކުރަން ފުރުސަތު ދީފަ އެވެ.
ބެލަރޫސް އަށް ދިން އަދަބު އުވާލުމަށް ފަހު، އައިއޯސީން ނެރުނު ބަޔާނެއްގައި ބުނެފައިވަނީ، ގައުމުތަކުން ނިންމާ ކުޅިވަރުން ބޭރުގެ ކަންކަމާއި ހަނގުރާމައިގެ ސަަބަބުން އޭގެ އަސަރު ކުޅިވަރު އެތުލީޓުންނަށް ކުރުމަކީ އެެދެވޭ ކަމެއް ނޫން ކަމަށެވެ. އަދި، މި ފަދަ ކަންކަން ހިނގާ ގޮތާ މެދު ގައުމުތަކުން ފުޅާ ނަޒަރިއްޔާ އަކުން ވިސްނުން ބައްޓަންކުރުމަށް އައިއޯސީން ވަނީ ގޮވާލައިފަ އެވެ.
ބެލަރޫސް އަށް ނިސްބަތްވާ ގިނަ އެތުލީޓުންތަކެއް ވަނީ އެންމެ ފަހުން އައިއޯސީން އިސްވެ ބޭއްވި އިވެންޓްތަކުގައި ނިއުޓްރަލް އެތުލީޓުންގެ ގޮތުގައި ބައިވެރިވެފަ އެވެ. އެ ގޮތުން، ފްރާންސްގެ ޕެރިހުގައި 2024 ވަނަ އަހަރު ބޭއްވި އޮލިމްޕިކްސް އާއި މި އަހަރު އިޓަލީގެ މިލާނުގައި ބޭއްވި ވިންޓަ އޮލިމްޕިކްސްގައި ވެސް ބެލަރޫސަށް ނިސްބަތްވާ ގިނަ އެތުލީޓުން ވަނީ ވާދަކޮށްފަ އެވެ.
އައިއޯސީގެ މި ނިންމުމަކީ، 2028 ވަނަ އަހަރު އެމެރިކާގެ ލޮސް އެންޖެލްސްގައި ބާއްވާ އޮލިމްޕިކްސް އާއި އިޓަލީގައި ހަމަ އެ އަހަރު ބާއްވާ ވިންޓަ އޮލިމްޕިކްސްގެ ކޮލިފައިން ސައިކަލް ތެރޭގައި ބެލަރޫސް އެތުލީޓުންނަށް ލިބޭ ވަރަށް ބޮޑު ހިތްހަމަޖެހުމެކެވެ.
